އެމްޓީސީސީ ގައުމީ ބަނޑުފިލާ ޗެލެންޖުގެ ޖޫނިއާ ބައިގެ ފައިނަލުން އާމިން އުމަރު މޫސާ އާއި މުހައްމަދު ޖަރީޝް ޖިހާދު ޖާގަ ހޯދައިފި އެވެ.
މި އަހަރުގެ ގައުމީ ބަނޑުފިލާ ޗެލެންޖުގެ ޖޫނިއާ ބައިގައި ވާދަކުރާ އެތުލީޓުން ވަނީ އެހެން އަހަރުތަކާ ހިލާފަށް އެއް ފެންވަރެއްގެ ފެންވަރު ރަނގަޅު ޕާފޯމަންސެއް ދައްކައިފަ އެވެ. އެ ގޮތުން ފައިނަލުން ޖާގަ ހޯދީ ދެ އެތުލީޓުންނަކީ މުބާރާތުގެ އޯޕަން ބައިގެވެސް ރަނގަޅު ހިސާބަކަށް ދަތުރުކުރި ދެ އެތުލީޓުންނެވެ.
ޖޫނިއާ އޯޕަން ބައިގެ ފައިނަލުން އާމިން ޖާގަ ހޯދީ ސެމީ ފައިނަލުގައި މުހައްމަދު ކައިފްގެ މައްޗަށް ކުޑަ ތަފާތަކުން ކުރި ހޯދައިގެންނެވެ. އާމިން އަށް 9.90ގެ ސްކޯއެއް ލިބުނުއިރު، ކައިފް އަށް ލިބުނީ 8.23ގެ ސްކޯ އެކެވެ.
އާމިން އަކީ މި އަހަރުގެ އޮގަސްޓް މަހު ރާއްޖޭގައި އޮތް އައިބީސީ ވޯލްޑް ޓުއާގައި ހިމެނޭ މޯލްޑިވްސް ޕްރޯ ބައިގެ ފައިނަލުގައި ވާދަކުރި އެތުލީޓެވެ. އެ މުބާރާތުގައި އާމިން ދެއްކި ހުނަރާ އެކު ޖޫނިއާ ބައިގެ ދުނިޔޭގެ ރޭންކިންގައި ވެސް ރަނގަޅު ހިސާބެއްގައި އޭނާ ހިމެނުނެވެ.
ގައުމީ ބަނޑުފިލާ ޗެލެންޖުގެ އޯޕަން ބައިގެ ސެމީ ފައިނަލުގައި ވެސް ވާދަކުރި އާމިން ޖޫނިއާ ބައިގެ ކުއާޓާ ފައިނަލުގައި ނުކުތީ މުހައްމަދު ޝިބްތު އާއި މުހައްމަދު އަޒާން އަހުމަދުއާ ދެކޮޅަށެވެ. މި ހީޓު އާމިން ކާމިޔާބުކުރީ ފަސޭހަކަމާ އެކު 8.67ގެ ސްކޯއަކުންނެވެ.
އާމިން ވަނީ އިއްޔެ އެކަނި ވެސް ހަ ހީޓެއްގައި ވާދަކޮށްފަ އެވެ. ގާތް ގާތުގައި ބައެއް ހީޓުތަކުގައި ވާދަކުރަން ޖެހުނުއިރު، އޭގެ ސަބަބުން އޭނާގެ ޕާފޯމަންސަށް ވެސް ކުޑަކޮށް އަސަރުކުރި ކަމަށް ބެލެވެ އެވެ. އެހެންނަމަވެސް މި ޗެލެންޖާ އެކުވެސް ޖޫނިއާ ބައިގެ ފައިނަލުން ޖާގަ ހޯދައި ފިރިހެން އޯޕަން ބައިގެ ސެމީ ފައިނަލުން ޖާގަ ހޯދުމަކީ ރަނގަޅު ކާމިޔާބީއެކެވެ.
ބަނޑުފިލާ ޗެލެންޖުގެ ޖޫނިއާ ބައިގައި ޖަރީޝް ރާޅާ އަޅަނީ - ފޮޓޯ: މުހައްމަދު ޝާބިން / އަދަދު
ޖޫނިއާ ބައިގެ ފައިނަލުން ޖަރީޝް ޖާގަ ހޯދީ ސެމީ ފައިނަލުގައި މުހައްމަދު ޝިބްތު އަތުން މޮޅުވެގެންނެވެ. މި ހީޓު ޖަރީޝް ކާމިޔާބުކުރީ 10.67ގެ ސްކޯ އަކުންނެވެ. ޝިބްތު އަށް ލިބުނީ 7.04ގެ ސްކޯ އެކެވެ.
ޖޫނިއާ ބައިގެ ކުއާޓާ ފައިނަލް ހީޓުގައި ޖަރީޝް ނުކުތީ ކައިފް އާއި އިޔާން އަހުމަދުއާ ދެކޮޅަށެވެ. ގައުމީ ޖޫނިއާ ޓީމުގައި ހިމެނޭ ތިން ބައިވެރިންގެ ހީޓު ޖަރީޝް ކާމިޔާބުކުރީ 8.17ގެ ސްކޯއަކުންނެވެ. ދެން، 7.30ގެ ސްކޯއަކުން ކައިފް ދެ ވަނަ އަށް ދިޔައިރު، ހީޓުގެ ފުލަށް ގޮސް މުބާރާތުން ކެޓީ އިޔަން އަހުމަދު އެވެ.
މި އަހަރު ޖޫނިއާ ބައިގައި 15 އެތުލީޓުން ވާދަކުރިއިރު، އޭގެ ތެރޭގައި 10 އަހަރުން ދަށުގެ ދެ އެތުލީޓުން ހިމެނެ އެވެ.
މުބާރާތުގައި ދެން ކުރިއަށްދާ ހީޓުތަކަށް ބަލާއިރު، ޑްރޮޕް-ނީ ބައިގެ ސެމީ ފައިނަލް ހީޓުތަކާއި ފައިނަލް މިއަދު އޮންނާނެ އެވެ. އަދި މި ފަހަރު އަލަށް ތައާރަފްކުރި މާސްޓާސް ކެޓަގަރީގެ ސެމީ ފައިނަލާއި ފައިނަލް ވެސް މިއަދު އޮންނާނެ އެވެ. މިއަދު ހަވީރު އޮންނަ މުބާރާތުގެ އިނާމް ދިނުމުގެ ރަސްމިއްޔާތުގެ ކުރިން ޖޫނިއާ ބައި އަދި އޯޕަން ބައިގެ ފައިނަލް ހީޓުތައްވެސް ކުރިއަށްދާނެ އެވެ.
