ބޮޑީބޯޑިންގެ ގައުމީ މުބާރާތް ކަމަށްވާ "ބަނޑުފިލާ ޗެލެންޖު"ގައި މި އަހަރު އަލަށް ތައާރަފްކުރި މާސްޓާސް ޑިވިޝަންގެ ސެމީ ފައިނަލުން އަހުމަދު ފައުޒާން (ކަރޯ)، އަހުމަދު ރިފާއީ، އިބްރާހިމް ޝިމަން، އަދި މުހައްމަދު ރިލްވާން ޖާގަ ހޯދައިފި އެވެ.
މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން އިންތިޒާމްކޮށް މިދިޔަ އާދިއްތަ ދުވަހު ފެށި "ގައުމީ ބަނޑުފިލާ ޗެލެންޖް" އަކީ ގައުމީ ބޮޑީބޯޑިން ލީގުގެ މި އަހަރުގެ އެންމެ ފަހު މުބާރާތެވެ. މި އަހަރުގެ މުބާރާތުގައި ހަތަރު ކެޓަގަރީއެއްގައި 35 އަށްވުރެ ގިނަ އެތުލީޓުން ވާދަކުރެ އެވެ.
ގައުމީ ބަނޑުފިލާ ޗެލެންޖުގައި މި އަހަރު އަލަށް ހިމެނި މާސްޓާސް ކެޓަގަރީގެ ކުއާޓާ ފައިނަލު ހީޓުތައް މިހާރު ނިމިފައިވާއިރު ސެމީ ފައިނަލުން ހަތަރު ބޯޑަކަރަށް ވަނީ ފުރުސަތު ލިބިފަ އެވެ. އެ ގޮތުން ސެމީ ފައިނަލު ހީޓު އެކެއްގައި ވާދަކުރާނީ އަހުމަދު ފައުޒާން އާއި މުހައްމަދު ރިލްވާން އެވެ.
ފައުޒާން ސެމީ ފައިނަލުން ޖާގަ ހޯދީ ކުއާޓާ ފައިނަލް ހީޓު އެކެއް 5.17ގެ ސްކޯއަކުން ކާމިޔާބު ކޮށްގެންނެވެ. ރިލްވާން ވަނީ ކުއާޓާ ފައިނަލް ހީޓު ދޭއްގައި ވާދަކޮށް 5.37ގެ ސްކޯއަކާ އެކު ދެ ވަނަ ހޯދައިފަ އެވެ. ފައުޒާން އާއި ރިލްވާން ވަނީ މުބާރާތުގެ ފުރަތަމަ ބުރުގައި ވެސް ވާދަކޮށްފަ އެވެ. އެ ފަހަރު ރިލްވާންގެ މައްޗަށް ފައުޒާން ކުރި ހޯދީ 6.54 ގެ ސްކޯއަކުންނެވެ. އެ ހީޓުގައި ރިލްވާން އަށް ލިބުނީ 2.77ގެ ސްކޯ އެކެވެ.
މާސްޓާސް ކެޓަގަރީގެ ސެމީ ފައިނަލު ހީޓު ދޭއްގައި ވާދަކުރަނީ އިބްރާހިމް ޝިމަން އާއި އަހުމަދު ރިފާއީ އެވެ.
ޝިމަން ސެމީގެ ޖާގަ ހޯދީ ކުއާޓާ ފައިނަލު ހީޓު ދޭއްގައި ވާދަކޮށް 9.50ގެ ސްކޯއަކުން އެ ހީޓު ކާމިޔާބު ކޮށްގެންނެވެ. ޝިމަން އަކީ މިހާތަނަށް މާސްޓާސް ޑިވިޝަންގައި އެންމެ މަތީ ސްކޯތައް ހޯދި އެތުލީޓެވެ. އޭނާ ވަނީ ފުރަތަމަ ބުރުގައި ވެސް މި ޑިވިޝަންގައި މިހާތަަނަށް ހޯދި އެންމެ މަތީ ސްކޯ ކަމަށްވާ 11.67ގެ ސްކޯއެއް ވެސް ހޯދައިފަ އެވެ.
ސެމީ ފައިނަލު ދެ ވަނަ ހީޓުގައި ޝިމަން އާ ދެކޮޅަށް ނުކުންނަ އަލީ ރިފާއީ އަށް ގަދަ ހަތަރަކުން ފުރުސަތު ލިބުނީ ކުއާޓާ ފައިނަލުގައި އޭނާ ވާދަކުރި ހީޓުން ދެ ވަނަ ލިބުމުންނެވެ. އެ ހީޓުގައި ފައުޒާން އާ ވާދަކޮށް ރިފާއީ އަށް ދެ ވަނަ ލިބުނީ 2.16ގެ ސްކޯ އަކުންނެވެ.
މުބާރާތުގެ އެހެން ކެޓަގަރީތަކަށް ބަލާއިރު ޖޫނިއާ ބައިގައި މިއަދު ކުރިއަށްދާނީ ކުއާޓާ ފައިނަލް ހީޓުތަކެވެ. ޖުމްލަ 15 އެތުލީޓުން ވާދަކުރި ޖޫނިއާ ބައިގެ ކުއާޓާ ފައިނަލު ހީޓު އެކެއްގައި ވާދަކުރާނީ މުހައްމަދު އަޒާން އަހުމަދު ، އާމިން އުމަރު މޫސާ އަދި މުހައްމަދު ޝިބްތު އެވެ.
ކުއާޓާ ފައިނަލް ހީޓު ދޭއްގައި ވާދަކުރާނީ ގައުމީ ޖޫނިއާ ޓީމްގެ ތިން އެތުލީޓުން ކަމަށްވާ މުހައްމަދު ކައިފް، މުހައްމަދު ޖަރީޝް ޖިހާދު އަދި އިޔާން އަހުމަދު އެވެ.
