މައްސަލަތަކުގައި އެކި މީހުނަށް ކުރާ ދައުވާތަކާއި، އެއާ ގުޅިގެން ޝަރީއަތްތަކުން ނިންމާ ނިންމުންތަކުގެ ފަހަތުގައިވާ ޝަރުއީ އަދި ގާނޫނީ ސަބަބުތަކަކީ ކޮބައިކަމާ މެދު އާންމުން ހޭލުންތެރިކުރެވޭ ގޮތަށް ޕްރޮސެކިއުޓާ ޖެނެރަލް އޮފީހުގެ ނިއުސްލެޓާހެޑަކާއި އާ ވެބްސައިޓެއް ފަރުމާކޮށްފި އެވެ.
ޕީޖީ އޮފީހުގެ ނިންމުންތައް ނިންމާ ސަބަބުތައް ހިމެނޭ ގޮތަށް "އުންސުރު" ނަމުގައި ނިއުސްލެޓާއެއް ވަނީ ލޯންޗުކޮށްފަ އެވެ. އަދި އެ އޮފީހުގައި ދުވަހުން ދުވަހަށް ކުރާ މަސައްކަތަކުގެ މައުލޫމާތާއި ތަފާސްހިސާބުތަކާއި އަހަރީ ރިޕޯޓްތައް ފެންނަ ގޮތަށް "އާމަހި" ނަމުގައި ވެބްސައިޓެއް ވެސް ވަނީ ލޯންޗުކޮށްފަ އެވެ.
ޖިނާއީ މައްސަލަތަކުގައި ދައުލަތް ތަމްސީލްކުރާ އިދާރާ، ޕީޖީ އޮފީހުގެ އެ އުފެއްދުންތައް ލޯންޗުކުރުމަށް މިއަދު މެންދުރުފަހު ބޭއްވި ރަސްމިއްޔާތުގައި ޕީޖީ ޝަމީމް ވިދާޅުވީ ދައުވާ ކުރަންވީ ގޮތް ގާނޫނުތަކާއި ގަވާއިދުތަކުގައި ހުރި ނަމަވެސް އޭގެ ހޭލުންތެރިކަން ކުޑަ ކަމަށެވެ.
"މިއަދު މި ތައާރަފުކުރާ ޕީޖީ އޮފީހުގެ ނިއުސްލެޓާ އުންސުރު، މިއީ އާންމުންގެ މެދުގައި ހޭލުންތެރިކަން އިތުރުކުރަން ކޮންމެހެން ކުރަން ޖެހިފައި އޮތް ކަމެއް،" ޝަމީމް ވިދާޅުވި އެވެ.
ޕީޖީ އޮފީހުން މައްސަލައެއްގައި މީހަކަށް ދައުވާ ކުރަން ޖެހޭ ސަބަބާއި، ދައުވާނުކޮށް ދޫކޮށްލާ ސަބަބުތަކުގެ އިތުރަށް ކޯޓުން މައްސަލައެއްގައި ހުކުމަކާ ހަމައަށް ވާސިލްވާ ގޮތްތަކާއި އަދަބު ކަނޑައަޅާން އޮންނަ އުސޫލުތައް އާންމުންނަށް ކިޔައިދޭން ޖެހޭ ކަމަށް ޝަމީމް ވިދާޅުވި އެވެ.
"ރިހާކުރު ފުޅިއެއް ވަގަށް ނެގި މައްސަލާގައި ބޮޑު އަދަބެއް ލިބުނީ ކީއްވެގެން ކަން އާންމުންނަށް އަޅުގަނޑުމެން ކިޔައިދޭން އެބަ ޖެހޭ، އަންގައި ދޭން ޖެހޭ،" ޝަމީމް ވިދާޅުވި އެވެ.
"މި ދާއިރާގައި ދިމާވާ ގޮންޖެހުންތަކާއި ހޯދާ ކުރިއެރުންތައް އާންމުންނާ ހިއްސާކޮށް ތާރީހަށް ދޫކޮށްލުމަކީ އުންސުރުގެ އެންމެ ބޮޑު ބޭނުން،" އޭނާ އިތުރަށް ވިދާޅުވި އެވެ.
އޭގެ އިތުރަށް މިއަދު ލޯންޗުކުރި ވެބްސައިޓް މެދުވެރިކޮށް ޕީޖީ އޮފީހުގައި ދުވަހުން ދުވަހަށް ކުރަމުންދާ މަސައްކަތްތަކާއި، ނިންމުންތައް ބަލައިލެވޭނެ ކަމަށް ޝަމީމް ވިދާޅުވި އެވެ. އެ ވެބްސައިޓްގެ ބޭނުމަކީ ޕީޖީ އޮފީހުން މައުލޫމާތުތައް ހިފަހައްޓައި ސިއްރުކުރުމުގެ ބަދަލުގައި މައުލޫމާތުތައް ދޫކޮށްލުން ކަމަށް ވިދާޅުވި އެވެ.
"އަޅުގަނޑުގެ ތަސައްވުރަކީ ޕީޖީ އޮފީހަށް މީހަކު މައުލޫމާތެއް ހޯދަން އަންނަން ނުޖެހޭ ވަރު ކުރުން، އިސްވެ މައުލޫމާތު ހާމަކުރުން،" ޝަމީމް ވިދާޅުވި އެވެ.
އޭގެ އިތުރަށް ހެއްކާ ބެހޭ ގާނޫނުގެ ޗާޕް ފޮތަކާއި، އެ ގާނޫނު އުފައްދަން ރައްޔިތުންގެ މަޖިލީހުގެ މެންބަރުން ދެއްކެވި ވާހަކަތަކުގެ މައްޗަށް "ހެއްކާ ބެހޭ ގާނޫނާއި ރައްޔިތުންގެ މަޖިލީހުގެ ވިސްނުން" ނަމުގައި ފޮތެއް ލޯންޗުކުރި އެވެ. މިއީ ޕީޖީ އޮފީހާއި އެޓާނީ ޖެނެރަލްގެ އޮފީސް ގުޅިގެން ކުރި މަސައްކަތެކެވެ.
އުންސުރު ނިއުސް ލެޓާ ލޯންޗުކޮށްދެއްވީ ސުޕްރީމް ކޯޓުގެ ފަނޑިޔާރު އައިޝާ ޝުޖޫން އެވެ. އާމަހި ވެބްސައިޓް ލޯންޗުކޮށްދެއްވީ އިންފޮމޭޝަން ކޮމިޝަނަރު އާހިދު ރަޝީދެވެ. އަދި ހެއްކާ ބެހޭ ގާނޫނުގެ ފޮތް ލޯންޗުކޮށްދެއްވީ އެޓާނީ ޖެނެރަލް އިބްރާހީމް ރިފްއަތެވެ.
