މިހާރު ކުރިއަށްދާ ނެޓްބޯޅަ އެސޯސިއޭޝަން ޗެމްޕިއަންޝިޕްގެ ފައިނަލުން ކުލަބު މެޓްރިކްސް އާއި ކުލަބު ގްރީން ސްޓްރީޓްސް ޖާގަ ހޯދައިފި އެވެ.
މި މަހުގެ 10 ވަނަ ދުވަހު ފެށި ނެޓްބޯޅަ އެސޯސިއޭޝަން ޗެމްޕިއަންޝިޕްގައި މި އަހަރު 11 ޓީމެއް ވާދަކުރި އެވެ. ޓީމުތައް ތިން ގްރޫޕަކަށް ބަހާލާފައިވާއިރު ސެމީ ފައިނަލުން ފުރުސަތު ލިބުނީ ކޮންމެ ގްރޫޕެއްގެ އެއް ވަނަ ހޯދި ޓީމްތަކާއި، ދެ ވަނަ އަށް ދިޔަ ޓީމުތަކުގެ ތެރެއިން އެންމެ ރަނގަޅު ނަތީޖާ ހޯދި ޓީމެވެ.
މުބާރާތުގެ ސެމީ ފައިނަލް ފުރަތަމަ މެޗުގައި ވާދަކުރީ ކޭވައިއާރުސީ އާއި ކުލަބު މެޓްރިކްސް އެވެ. މި އަހަރުގެ ގައުމީ ނެޓްބޯޅަ މުބާރާތުގެ ޗެމްޕިއަންކަން ހޯދި ކޭވައިއާރުސީ އަތުން މެޓްރިކްސް މޮޅުވީ އެންމެ ޕޮއިންޓެއްގެ ތަފާތަކުންނެވެ. ފޯރިގަދަ މި މެޗު ނިމުނީ 40-41 ޕޮއިންޓުން މެޓްރިކްސް ކުރީގައި އޮވެގެންނެވެ. މެޗުގެ މޮޅު ކުޅުންތެރިޔާގެ މަގާމް ހޯދީ މެޓްރިކްސްގެ ގޯލް ޝޫޓަރު އައިޝަތު ސަލީމް އެވެ.
ސެމީ ފައިނަލް ދެ ވަނަ މެޗުގައި ކުލަބު ގްރީން ސްޓްރީޓްސް ނުކުތީ ޝައިނިން ސްޓާއާ ދެކޮޅަށެވެ. މި މެޗު ގްރީނުން ކާމިޔާބުކުރީ 46-30 ޕޮއިންޓުންނެވެ.
މެޗުގެ މޮޅު ކުޅުންތެރިޔާގެ މަގާމް ހޯދީ ގްރީންގެ ގޯލް އެޓޭކް ލަޔާން އަލީ ރަޝީދު އެވެ.
މެޓްރިކްސް އާއި ގްރީން ވާދަކުރާ ފައިނަލް މެޗު ކުޅޭނީ މިރޭ އެވެ.
