މީރާގެ ޖީއެސްޓީ އޮޑިޓް ރިޕޯޓުން ވިޔަފާރިއެއްގެ ޖީއެސްޓީ ބަޔާނުގައި ޓެކްސްގެ ގޮތުގައި ދައްކަން އޮތް އަދަދަކީ ނިސްބަތުން ދަށް އަދަދެއް ކަން އެނގި، މައުލޫމާތު ދިނުމަށް އެއްބާރުލުން ނުދީގެން ކްރިމިނަލް ކޯޓަށް ހުށަހެޅި މައްސަލަ ބަލައިނުގަތީ ރަނގަޅަށް ކަމަށް ހައި ކޯޓުން ނިންމައިފި އެވެ.
މި މައްސާލަގައި ދައުލަތުން ދައުވާ އުފުލީ ސ. ހުޅުދޫ، ނޫރީގެ، މުހައްމަދު ހިސާން އަދި ހޮސްޕިޓަލިޓީ ޑިޕޮޓް ޕްރައިވެޓް ލިމިޓެޑްގެ މައްޗަށެވެ. އެއީ ގާނޫނު ހިންގުމަށް ހުރަސް އެޅުމާއި ދައުލަތުގެ އެހެނިހެން މަސައްކަތްތަކަށް ހުރަސް އެޅުމުގެ ކުށުގެ ހަތް ދައުވާ އެވެ.
އެ ހަތް ދައުވާއަކީ 2017 ވަނަ އަހަރުގެ ހަތަރު ކުއާޓަރުގައި ހުށަހެޅި ޖީއެސްޓީ ބަޔާންތަކާއި، 2018 ވަނަ އަހަރުގެ ފުރަތަމަ ތިން ކުއާޓަރުގައި ހުށަހެޅި ޖީއެސްޓީ ބަޔާންތަކުގެ މައްޗަށް ބިނާކޮށް ކަމަށް ދައުލަތުން ކޮށްފައިވާ ދައުވާގައިވެ އެވެ.
ގާނޫނުލްއުގޫބާތުގައި އެ ދައުވާތައް ކުރުމަށް އޮންނަނީ އެ ކުށް ކުރި ވަގުތުން ފެށިގެން ތިން އަހަރު ދުވަސް ތެރޭގަ އެވެ. ކްރިމިނަލް ކޯޓަށް ދައުވާތައް ހުށަހެޅީ އެ މުއްދަތުގެ ފަހުން ކަމަށް ބުނެ ކްރިމިނަލް ކޯޓުގެ ރެޖިސްޓްރާ ވަނީ މައްސަލަ ބަލައިނުގަތުމަށް ނިންމައިފަ އެވެ.
ނަމަވެސް ދައުލަތުގެ ނުކުތާއަކީ، އެ މައްސަލައަކީ ޓެކްސް ނެގުމާ ބެހޭ އިދާރީ ގާނޫނުގެ ދަށުން ކުރެވިފައިވާ ތަހުގީގުގެ މައްޗަށް ބިނާކޮށް އުފުލި ދައުވާތަކެއް ކަމުން، މުއްދަތު ގުނަން ވާނީ އެ ގާނޫނަށް ރިއާޔަތްކޮށް ކަމަށެވެ. އެއީ ހާއްސަ ގާނޫނާއި ގާނޫނުލްއުގޫބާތު އެއްކޮށް އަންނަ ހާލަތަށް ސުޕްރީމް ކޯޓުން ކަނޑައަޅާފައިވާ ގަޒިއްޔާއަކަށް ވެސް ރިއާޔަތްކޮށެވެ.
އެ ނުކުތާއާއެކު ދައުލަތުން ހައި ކޯޓުގައި އިސްތިއުނާފް ކުރުމުން، އެ ކޯޓުން ކުރި ހުކުމުގައި ވަނީ ދައުލަތުން ފާހަގަކުރާ ސުޕްރީމް ކޯޓުގެ އުސޫލުތަކަށް ބެލުމުން ވެސް ހާއްސަ ގާނޫނުގައިވާ މުއްދަތަށް ރިއާޔަތް ކުރަން ޖެހޭނީ އެ ގާނޫނުގެ ދަށުން ދައުވާކުރާ ހާލަތުގައި ކަން އެނގެން އޮންނަ ކަމަށެވެ.
އެހެންކަމުން ކްރިމިނަލް ކޯޓުގެ ރަޖިސްޓްރާގެ ނިންމުމާއި އެ ނިންމުމަށް ތާއީދުކޮށް ކްރިމިނަލް ކޯޓުގެ ފަނޑިޔާރުންގެ މަޖިލީހުން ނިންމާފައިވާ ނިންމުން ދެމެހެއްޓުމަށް ހައި ކޯޓުގައި އެ މައްސަލަ ބެއްލެވި ތިން ފަނޑިޔާރުންގެ އިއްތިފާގުން ހުކުމްކުރެއްވި އެވެ.
ހައި ކޯޓުގައި މައްސަލަ ބެއްލެވި ފަނޑިޔާރުންގެ ބެންޗުގެ ރިޔާސަތުގައި އިންނެވީ ފަނޑިޔާރު ފާތިމަތު ފަރުހީޒާ އެވެ. ދެން ތިއްބެވީ ފަނޑިޔާރު ހުޒައިފާ މުހައްމަދު އަދި ފަނޑިޔާރު ހުސައިން މަޒީދެވެ.
