އެލުމިނިއަމުން ނަގާ ޑިއުޓީ ކަސްޓަމުން ބޮޑުކޮށްފި ކަމަށް ބުނެ ސެލްބީ އިންވެސްޓްމެންޓްސް އިން މިއަދު ކުރި އިއުލާނު ދޮގުކޮށް މޯލްޑިވްސް ކަސްޓަމްސް ސާވިސް އިން އެ ކުންފުންޏަށް ވަރަށް ބޮޑަށް ފާޑުކިޔައިފި އެވެ.
ސެލްބީން މިއަދު ބުނީ އެލުމިނިއަމުން ނަގާ ޑިއުޓީ ސުން ޕަސެންޓުން 10 ޕަސެންޓަށް ކުރިން އެންގުމަކާ ނުލައި ކަސްޓަމްސް އިން ބޮޑުކޮށްފައިވާ ކަމަށެވެ. އެހެންކަމުން އެ ކުންފުނިން ވިއްކާ އެލުމިނިއަމްގެ އަގު ވެސް ބޮޑުވާނެ ކަމަށް ސެލްބީން ބުނެފައިވެ އެވެ.
"ތިޔަ ބޭފުޅުންގެ ގެދޮރުގެ ބޯހިޔާވަހިކަން ހޯދުމަށް ދޮރުޖަހަން ބޭނުން ކުރާ އެލުމިނިއަމް ފަތިން ނަގަމުން އައި ސުން ޕަސެންޓުގެ ޑިއުޓީގެ ބަދަލުގައި [ކަސްޓަމްސް އިން] މިހާރު ނަގަން ނިންމާފައި ވަނީ 10 ޕަސެންޓުގެ ޑިއުޓީ،" ސެލްބީން ބުނެފައިވެ އެވެ.
ނަމަވެސް ކަސްޓަމްސްގެ ފަރާތުން ސެލްބީއަށް ރައްދު ދީ ނެރުނު ބަޔާނުގައި ބުނެފައި ވަނީ 10 ޕަސެންޓު ޑިއުޓީ ނަގަނީ އެލުމިނިއަމް ދޮރަށް ކަމަަށާއި އެލުމިނިއަމް ފައްޗަށް ނަގަނީ ސުން ޕަސެންޓު ޑިއުޓީ ކަމަށެވެ. އެލުމިނިއަމް ދޮރަށް ދީފައިވާ ކޯޑު ބޭނުންކޮށްގެން ސެލްބީން މުދާތަކެއް އެތެރެ ކުރަން މަސައްކަތް ކުރާ ކަމަށް ވެސް ކަސްޓަމްސް އިން ބުނެ އެވެ.
"ސެލްބީ އިންވެސްޓްމެންޓް ފަދަ ރާއްޖެގައި ދިގު މުއްދަތަކަށް، ފުޅާ ދާއިރާއެއްގައި އިމްޕޯޓް ކުރުމުގައި ހަރަކާތްތެރިވާ ކުންފުންޏަކުން ރައްޔިތުންނަށް ހަގީގަށް އޮޅޭ ގޮތަށް މިފަދަ ބަޔާނެއް ނެރުއްވީތީ މި ސާވިސްގެ ފަރާތުން އެކަން އެންމެ ހަރުކަށި އިބާރާތުން ކުށްވެރިކުރަން،" ކަސްޓަމްސްގެ ބަޔާނުގައިވެ އެވެ.
ސެލްބީއަކީ މީގެ 57 އަހަރު ކުރިން 1965 ވަނަ އަހަރުން ފެށިގެން ރާއްޖޭގައި ވިޔަފާރި ކުރާ ކުންފުންޏެކެވެ. މައިގަނޑު ގޮތެއްގައި އެތެރެ ކުރަނީ ހާޑުވެއާ ސާމާނެވެ. ރާއްޖެއަށް 1980 ވަނަ އަހަރު އެލުމިނިއަމް އަލަށް އެތެރެކޮށް ބާޒާރަށް ނެރުނީ ވެސް ސެލްބީންނެެވެ. އަދި ސިންގަޕޫރުން މުދާ ގެނެސްގެން ރާއްޖޭގައި ފުރަތަމަ ވިއްކަން ފެށީ ވެސް އެ ކުންފުނިންނެވެ.
