ފެން ހޮޅިއެއް ފަޅައިގެން ގޮސް ލިބުނު ގެއްލުން މަރާމާތު ކުރުމަށް ސްޓެލްކޯއިން މާލޭ ބޮޑުތަކުރުފާނު މަގަށް ކޮންކްރީޓު އެޅީ ސިޓީ ކައުންސިލްގެ އެންގުމާ ހިލާފަށް ކަމަށް މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
ސްޓެލްކޯގެ އިންޖީނުގެއަށް ލޮނު ފެން ނެގުމަށް ބޭނުންކުރަމުންދިޔަ ހޮޅިއެއް ފަޅައިގެންގޮސް ބޭރު މަގުގައި އަޅާފައި އޮތް ތާރުގަނޑު ފެޅި ފެން ލީކުވީ މި އަހަރުގެ އޮގަސްޓު މަހުގެ ތެރޭގަ އެވެ. އެ މައްސަލަ ހައްލުކޮށް މަގު މަރާމާތުކުރުމުގެ މަސައްކަތް ސްޓެލްކޯއިން އެ މަހުގެ 19 ވަނަ ދުވަހު ފެށީ ސިޓީ ކައުންސިލްގެ ހުއްދައާ އެކު އެވެ.
މާލެ ސިޓީ ކައުންސިލްގެ ހަތަރު ވަނަ ދައުރުގެ 79 ވަނަ ޖަލްސާގައި މާލޭ މަގުމަތީގައި މަސައްކަތް ކުރުމާ ބެހޭ އުސޫލާމެދު ވާހަކަ ދައްކަވަމުން މުއިއްޒު ވިދާޅުވީ މަގުމަތީގެ ކަންތައްތައް އެކި ކުންފުނިތަކުން ކުރިއަށް ގެންދާއިރު އެކަން ކުރިއަށް ގެންދާ ގޮތް ބަލަންޖެހޭ ކަމަށެވެ. އަދި، ކުންފުނިތަކުން މަގުތަކުގައި އެކި މަސައްކަތް ކުރުމަށްފަހު ބޭނުންގޮތަކަށް މަގު ރޫޅާލާފައި ދާކަމަށްވެސް މުއިއްޒު ވިދާޅުވި އެވެ.
"ކުރިން ދުވަހު އަޅުގަނޑުމެންނަށް ފެނިއްޖެ ބޮޑުތަކުރުފާނު މަގުގަ ތާރުގަނޑުން ވަޅުގަނޑެއް ކޮނެފަ ކޮންކްރީޓު އެޅިތަން، އަޅުގަނޑުމެން އެހެން ނަހަދަން ބުނެފަ އޮއްވާ ކޮންކްރީޓް ކޮޅެއް އަޅާލާފަ ނިންމާލާފަ ދިޔައީ" މުއިއްޒު ވިދާޅުވި އެވެ.
އޭގެ އިތުރުން މުއިއްޒު ވިދާޅުވީ މާލޭގެ މަގުތަކުގައި މިފަދަ ބައިވަރު ކަންކަން ފާހަގަވާ ކަމަށެވެ. އެގޮތުން، ކޮންސްޓްރަކްޝަން މަސައްކަތްކުރާ ގިނަ ފަރާތްތަކުންވެސް ކާނު ތެރެއަށް ކޮންކްރީޓްތަކާ އެކު ދޮވެލާކަން ފާހަގަކުރެއްވި އެވެ.
މިކަމާ ގުޅިގެން ސްޓެލްކޯގެ މީޑިއާ އޮފިޝަލު އަހުމަދު މުހައްމަދު "އަދަދު" އިން ސުވާލުކުރުމުން ވިދާޅުވީ ބޮޑުތަކުރުފާނު މަގަށް ކޮންކްރީޓް ނާޅާ ކަމަށާއި، އެތަން ސްޓޭބަލް ކުރުމަށް ލޭޔާއެއް އަޅާފައިވާ ކަމަށެވެ. އަދި، ބޭރުމަގަށް ކޮންކްރީޓު އެޅިކަމަށް ބުނާ ބުނުން އަހުމަދު ވަނީ ދޮގުކުރައްވާފަ އެވެ.
"އެތަނުގައި ތާރު އެޅުމަށް ބަޔަކު ހޯދުމުގެ މަސައްކަތް މިހާރު މިދަނީ ކުރަމުން، މިހާރުވެސް އިއުލާނު ކުރެވިފައިވީ" އަހުމަދު ވިދާޅުވި އެވެ.
