އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ)ގެ ދެ ލޯނެއް ފިޔަވާ އެހެން ހުރިހާ ލޯނެއް ދޫކުރުން ވަގުތީ ގޮތުން މެދުކަނޑާލައިފި އެވެ.
އެސްޑީއެފްސީން ކޮށްފައިވާ އިއުލާނެއްގައި ބުނީ ދެ ލޯނެއް ފިޔަވާ އެހެން ހުރިހާ ލޯނަކަށް އެދުމުގެ ފުރުސަތު ވަގުތީ ގޮތުން މެދުކަނޑާލާފައިވާ ކަމަށެވެ. މިހާރު ހަމައެކަނި އެދެވެނީ ދަނޑުވެރިކަމަށް ހާއްސަކޮށް ދޫކުރާ ލޯނާއި، ކަނޑުފަޅު ނަފާ ލޯނު ކަމަށް އެ އިދާރާއިން ބުންޏެވެ.
އެހެނިހެން ހިދުމަތްތައް ވަގުތީ ގޮތުން މެދުކަނޑާލެވިފައި ވިޔަސް ލޯނާއި ގުޅިގެން ހުށަހަޅަން ޖެހޭ ލިއެކިއުންތައް ޕޯޓަލް މެދުވެރިކޮށް ހުށަހެޅުމާއި މީގެ ކުރިން ހުށަހަޅާފައިވާ ލޯނުތަކުގެ ސްޓޭޓަސް ޕޯޓަލް މެދުވެރިިކޮށް ފެންނާނެ ކަމަށް އެސްޑީއެފްސީން ބުންޏެވެ.
ލޯނުތައް ދޫކުރުން މެދުކަނޑާލީ މިމަހުގެ އެއްވަނަ ދުވަހުން ފެށިގެން ކަމަށް އެސްޑީއެފްސީން ބުންޏެވެ. އެސްޑީއެފްސީން ބުނީ މި ބަދަލު ގެނައީ ހިދުމަތްތައް އިތުރަށް ރަނގަޅުކުރުމަށް ކަަމަށެވެ.
އެސްޑީއެފްސީން އަލުން ލޯނުތަކަށް އެދުމުގެ ފުރުސަތު ހުޅުވާލާނީ ޖެނުއަރީ 31، ގައި ކަމަށް ވެސް އެ އިދާރާއިން ބުންޏެވެ.
އެސްޑީއެފްސީއަކީ ލުއި އިންޓްރެސްޓް ރޭޓެއްގައި ކުދި އަދި މެދުފަންތީގެ ވިޔަފާރިތަކަށް މާލީ އެހީތެރިކަން ފޯރުކޮށްދިނުމަށް ސަރުކާރުން އުފައްދާފައިވާ ކުންފުންޏެކެވެ. އެތަނުން ލޯނުު ދޫކުރާ ދާއިރާތަކުގެ ތެރޭގައި ހިމެނެނީ، ފަށާ ވިޔަފާރި، ވިޔަފާރި ތަރައްގީ، ހަރުމުދާ، ދަނޑުވެރި ނަފާ އަދި ވިޔަފާރި އެހީގެ އިތުރުން ރަށު ފަތުރު އެވެ.
