ޖިނާއީ މައްސަލަތަކުގައި ކޮށްފައިވާ ހުކުމްތަކާ އެއް ގޮތަށް ޖޫރިމަނާ ފައިސާ ނުދައްކާ މީހުނަށް އެއަށް ބޮޑު އަދަބެއް ނުވަތަ ޖަލަށް ލުމަށް އެދި ކޯޓަށް ހުށަހެޅުމުގެ މަސައްކަތް ޕްރޮސެކިއުޓާ ޖެނެރަލް (ޕީޖީ) އޮފީހުން ފަށައިފި އެވެ.
ޝަރީއަތުން އަދަބު ކަނޑައެޅުމުގައި އަމަލު ކުރާނެ ގޮތުގެ އުސޫލުގައި އޮންނަ ގޮތުން، ހުކުމް ކަނޑައެޅިފައިވާ މުއްދަތުގައި ޖޫރިމަނާ ފައިސާ ނުދައްކައިފިނަމަ، އެ މުއްދަތު ފާއިތުވިތާ 30 ދުވަހުގެ ތެރޭގައި ޕީޖީ އޮފީހުން ކޯޓަށް އެކަން އަންގަން ޖެހެ އެވެ.
ޖޫރިމަނާ ނުދައްކާ މީހުންނަށް ބުރަ އަދަބެއް ނުވަތަ ޖަލު އަދަބެއް ކަނޑައެޅުމުގެ އިހުތިޔާރު ފަނޑިޔާރުންނަށް އޮންނަ ކަމަށް ސުޕްރީމް ކޯޓުން ނެރެފައިވާ އެ އުސޫލުގައި ބަޔާންކޮށްފައިވެ އެވެ.
ޕަބްލިކް ޕްރޮސެކިއުޓަރު އަހުމަދު ޝަފީއު "އަދަދު" އަށް ވިދާޅުވީ އުސޫލުގައި ބަޔާންކޮށްފައިވާ ގޮތަށް އަމަލު ކުރުމުގެ ގޮތުން، މޯލްޑިވްސް އިންލެންޑް ރެވެނިއު އޮތޯރިޓީ (މިރާ) މެދުވެރިކޮށް ޖޫރިމަނާ ނުދައްކާ މީހުންގެ މައުލޫމާތު އެއް ކުރުމުގެ މަސައްކަތް ކުރަމުންދާ ކަމަށެވެ.
"މި ވަގުތަށް ދަންނަވަން ދަތި އެ ގޮތަށް ޖޫރިމަނާ ނުދައްކާ ކިތައް މީހުން ތިބި ކަމެއް، އެ މައުލޫމާތު މީރާއިން ހޯދާފައި ކޯޓަށް ހުށަހެޅުމުގެ މަސައްކަތް މި ކުރަނީ،" ޝަފީއު ވިދާޅުވި އެވެ.
ހުކުމާ އެއް ގޮތަށް ފައިސާ ދައްކަމުން ނުދަނީ، އެފަދަ ހާލަތެއްގައި ޖަލަށް ލާން ފަނޑިޔާރަށް ނިންމޭނެކަން ގިނަ މީހުނަށް ނޭނގޭތީ ކަމަށް ވެސް ޝަފީއު ވިދާޅުވި އެވެ.
