ރޭ ދަންވަރު ހުވަދު އަތޮޅުގެ ބައެއް ރަށްތަކަށް ބިންހެލުމުގެ އަސަރެއްކޮށްފި އެވެ.
މޯލްޑިވްސް މީޓިއޮރޮލޮޖީ (މެޓް އޮފީހުން) ރޭ ދަންވަރު ނެރުނު ކުރު ބަޔާނެއްގައި ބުނެފައި ވަނީ ގއ. އަތޮޅުގެ ބައެއް ރަށްތަކުގެ ބިންގަނޑަށް ލޮޅުމެއް އައިކަމުގެ ރިޕޯޓުތައް ލިބުމާ ގުޅިގެން، ބެލި ބެލުމުން ގދ. ކާޑެއްދޫގައި ގާއިމުކޮށްފައިވާ ބިންހެލުން ރިކޯޑުކުރާ މީޓަރަށް ރާއްޖޭ ގަޑިން ރޭ ދަންވަރު 00:11 ހާއިރު ލޮޅުމެއްގެ އަސަރު ކޮށްފައިވާކަން ރިކޯޑު ކުރެވިފައިވާ ކަމަށެވެ.
"މީގެ ސަބަބުން ރާއްޖެއަށް ނުރައްކަލެއް ކުރިމަތި ވާނެ ކަމަށް ލަފައެއް ނުކުރެވެ އެވެ،" މެޓް އޮފީހުގެ ބަޔާނުގައި ބުނެ އެވެ.
އިންޑިއާގެ ނިއު ދިއްލީއަށް ރޭ 9:30 ހާއިރު 2.5 މެގްނިޓިއުޑް ބިން ހެލުމެއް އައިސްފައިވެ އެވެ. އެ ބިންހެލުން އައީ ބިމުގެ 5 ލޯމީޓަރު އަޑިއަށް ކަމަށް އިންޑިއާގެ ނޭޝަނަލް ސެންޓަ ފޯ ސެއިސްމޮލޮޖީ އިން ބުނެއެވެ.
ހުވަދު އަތޮޅަށް އައި ލޮޅުމާއި ނިއު ދިއްލީގެ ބިންހެލުމާ ގުޅުމެއް އޮތް ކަމަށް މެޓް އޮފީހުން ބުނެފައެއް ނުވެ އެވެ.
