އިންޑިއާ ނުހިމަނައި، އިންޑިއާ ކަނޑުގެ 19 ގައުމަކާ އެކު ޗައިނާއިން ބޭއްވި ބައްދަލުވުމުގައި ދިވެހި ސަރުކާރުން ބައިވެރިނުވާ ކަމަށް ފޮރިން މިނިސްޓްރީން ބުނެފި އެވެ.
ޗައިނާ-އިންޑިއަން އޯޝަން ރީޖަން ފޯރަމް އޮން ޑިވެލޮޕްމަންޓް ކޯޕޮރޭޝަން ބައްދަލުވުން އޮތީ ނޮވެމްބަރު 21 ވަނަ ދުވަހު އެވެ. އެއީ ޗައިނާގެ ފޮރިން މިނިސްޓްރީއާ ގުޅިގެން ޗައިނާ އިންޓަނޭޝަނަލް ޑިވެލޮޕްމަންޓް ކޯޕޮރޭޝަން އެޖެންސީ (ސިޑްކާ) އިން ބޭއްވި ބައްދަލުވުމެކެވެ.
ޗައިނާއިން ބުނެފައިވާ ގޮތުގައި އިންޑިއާ ކަނޑުގެ 19 ގައުމެއްގެ މަންދޫބުން އެ ބައްދަލުވުމުގައި ބައިވެރިވި އެވެ. އެއީ އިންޑޮނީޝިއާ، ޕާކިސްތާން، މިޔަންމާ، ސްރީލަންކާ، ބަންގްލަދޭޝް، ދިވެހިރާއްޖެ، ނޭޕާލް، އަފްގާނިސްތާން، އިރާން، އޮމާން، ދެކުނު އެފްރިކާ، ކެންޔާ މޮޒަމްބީކް، ޓެންޒޭނިއާ، ސީޝެލްސް، މަޑަގަސްކާ، މޮރިޝަސް، ޖިބޫޓީ އަދި އޮސްޓްރޭލިއާ އެވެ.
ރާއްޖެއިން މި ބައްދަލުވުމުގައި ބައިވެރިވި ކަމަށް ބުނި ނަމަވެސް ފޮރިން މިނިސްޓްރީން މިއަދު ބުނީ އެ ބައްދަލުވުމުގައި ސަރުކާރުން ބައިވެރިނުވާން ނިންމާފައިވަނީ މި މަހުގެ 15 ދުވަހު ކަމަށެވެ.
"އަދި ރާއްޖެއިން ވަކިވަކި ފަރުދުން ނުވަތަ ވަކިވަކި ފަރުދުންގެ ގްރޫޕަކުން ބައިވެރިވުމަކީ ދިވެހި ސަރުކާރު ތަމްސީލު ކުރުން ކަމަކަށް ނުވާނެ،" މިނިސްޓްރީން ބުނެފައިވެ އެވެ.
"އަދަދު" އަށް އެނގިފައިވާ ގޮތުގައި މި ބައްދަލުވުމުގައި ދިވެއްސަކަށް ބައިވެރިވެވަޑައިގެންފައިވަނީ ކުރީގެ ރައީސް ޑރ. މުހައްމަދު ވަހީދު ހަސަނެވެ.
މިކަމާ ގުޅިގެން ޑރ. ވަހީދު "އަދަދު" އަށް ވިދާޅުވީ އެ ބައްދަލުވުމުގައި ބައިވެރިވެވަޑައިގެންނެވީ ޗައިނާ ސަރުކާރުން ދެއްވި ދައުވަތަކަށް ކަމަށެވެ.
ބައްދަލުވުން އޮތީ "ޝެއާޑް ޑިވެލޮޕްމަންޓް: ތިއަރީ އެންޑް ޕްރެކްޓިސް ފްރޮމް ދަ ޕާސްޕެކްޓިވް އޮފް ދަ ބްލޫ އިކޮނޮމީ" މައުލޫގެ ދަށުން ޔުނާން ޕްރޮވިންސްގެ ކުންމިންގްގަ އެވެ.
ސިޑްކާއިން ނެރުނު ބަޔާނެއްގައި ބުނީ ނޮވެމްބަރު 21 ވަނަ ދުވަހުގެ ބައްދަލުވުމުގައި ޗައިނާއިން ހުށަހެޅީ ކާރިސާތަކާ ދުރުވެ ގެއްލުން ކުޑަ ކުރުމަށް އެކުގައި މަސައްކަތް ކުރެވޭނެ ނިޒާމެއް ގާއިމް ކުރުމަށް ކަމަށެވެ.
މާލީ އަދި ޓެކްނިކަލް އެހީ އާއި ވަސީލަތްތައް ބޭނުންވާ ގައުމުތަކަށް އެހީ ފޯރުކޮށްދޭން ޗައިނާ ތައްޔާރު ކަމަށް އެ ބަޔާނުގައި ބުންޏެވެ.
