ރެހެންދި ސްކޫލްގެ އަންހެން ދަރިވަރުންގެ ކަރާމަތަށް ގެއްލުންވާ ފަދަ އިބާރާތްތައް ބޭނުންކޮށްގެން ބައެއް މީޑިއާތަކުން މިއަދު ފެތުރި ހަބަރު އެ ސްކޫލުން ދޮގުކޮށް އެކަން ކުށްވެރިކޮށްފި އެވެ.
ބައެއް މީޑިއާތަކުން މިއަދު ފެތުރި ހަބަރެއްގައި ތުހުމަތުކޮށްފައިވާ ގޮތުގައި ރެެހެންދި ސްކޫލުގައި ބޭއްވި ކެޑޭޓް ހަރަކާތެއްގައި އެ ސްކޫލްގެ ދަރިވަރުންތަކަކަށް އަނިޔާއަކަށް ވާ ފަދަ އަދި ދަރިވަރުންގެ ކަރާމަތަށް ގެއްލުންވާ ފަދަ ކަމެއް ކުރި އެވެ. ކުރިކަމަށް އެ ހަބަރުގައި ތުހުމަތުކޮށްފައިވާ އަމަލުގެ ތަފްސީލާ އެކު ލިޔެ ޝާއިއުކުރި އެ ހަބަރު ވެސް އޮތީ ދަރިވަރުންގެ ކަރާމަތަށް ގެންލުންވާ ގޮތަށެވެ.
އެ ހަަބަރު ދޮގުކޮށް ރެހެންދި ސްކޫލުން ނެރުނު ބަޔާނުގައި ބުނީ މިމަހުގެ 10 ވަނަ ދުވަހުން ފެށިގެން 12 ވަނަ ދުވަހާ ހަމައަށް އެ ސްކޫލުގައި ހިންގި ކެޑޭޓް ކޭމްޕްގައި، އެ ހަބަރުގައި ތުހުމަތުކޮށްފައިވާ ފަދަ އެއްވެސް ކަމެއް ހިނގި ކަމަށް އެއްވެސް ބެލެނިވެރިއަކު ރިޕޯޓްކޮށްފައި ނުވާ ކަމަށެވެ.
ރެހެންދި ސްކޫލްގެ ބެލެނިވެރިއެއް ކަމަށް ބުނެ، އެ ހަބަރަށް މައުލޫމާތު ދިނީ ބެލެނިވެރިއެއްގެ ގޮތުގައި އެ ސްކޫލްގައި ރަޖިސްޓްރީ ވެފައި ނުވާ ފަރާތެއް ކަމަށް ވެސް އެ ބަޔާނުގައި ބުންޏެވެ.
"...ސްކޫލްގެ ބެލެނިވެރިއެއްގެ ހައިސިއްޔަތުން ކަމަށް ބުނެ، ސްކޫލްގެ ރަޖިސްޓްރީގައި ނެތް ފަރާތަކުން ސްކޫލްގެ ނަމާއި ކެޑޭޓްކޯ އަދި ދަރިވަރުންގެ އަބުރާއި ކަރާމަތަށް ގެއްލުން ލިބޭ ފަދަ ވާހަކަތައް ފަތުރަމުން ދާތީ މި ބީދައިން [އަމަލު]ނުކުރުމަށް އިލްތިމާސްކުރަމެވެ،" ރެހެންދި ސްކޫލްގެ ބަޔާނުގައި ބުންޏެވެ.
ކެޑޭޓް ކޭމްޕްގައި އަންހެން ދަރިވަރުންނަށް އިރުޝާދުދޭން އަންހެން މުދައްރިބުން އަދި ފިރިހެން ދަރިވަރުންނަށް ފިރިހެން މުދައްރިބުން ހަރަކާތްތެރިވި ކަމަށާއި ހުރިހާ ވަގުތެއްގައި ކެޑޭޓް މުދައްރިސުން ވެސް ހަރަކާތްތެރިވި ކަމަށް ވެސް ރެހެންދިސްކޫލުން ބުންޏެވެ.
"ކޭމްޕް ނިމިދިޔަ އިރު ވެސް އެއްވެސް ދަރިވަރެއްގެ ފަރާތުން ވެސް އަދި ޓީޗަރެއްގެ ފަރާތުން ވެސް މިފަދަ އެއްވެސް މައްސަލައެއްގެ ވާހަކަ ހިއްސާކޮށްފައިނުވާ ކަން މައުލޫމާތަށް ޓަކައި ދަންނަވަމެވެ،" ރެހެންދިސްކޫލްގެ ބަޔާނުގައި ބުންޏެވެ.
