އައިސް ބޭނުންނުކޮށް، ލޮނުު ފެނުން މަސް ފިނި ކުރާނެ ނިޒާމު ބަހައްޓަން ބޭނުންވާ މަސް ދޯނިތަކަށް ސަރުކާރުން އާދީއްތަ ދުވަހު ލޯނު ދޫކުރަން ފަށައިފި އެވެ.
ފިޝަރީޒް މިނިސްޓްރީން ގެޒެޓު ކުރި އިއުލާނެއްގައި ބުނެފައި އޮތީ ލޯނު ދޫކުރުމުގެ ބޭނުމަކީ "މަސްވެރިކަމުގެ ފަހި މޫސުމުގައި އައިސް ލިބުމުގައި ހުރި ދަތިތަކަށް ލުޔެއް ހޯދައިދިނުން" ކަމަށެވެ.
އެ ޕްރޮގްރާމްގެ ދަށުން 34 މިލިއަން ރުފިޔާގެ ލޯނު ދޫކުރަން ހަމަޖެހިފައިވާއިރު އެ ފައިސާއިން 68 ދޯނީގައި ލޮނު ފެނުން މަސް ފިނިކުރުމުގެ ނިޒާމް ގާއިމް ކުރެވޭނެ ކަމަށް މިނިސްޓްރީން ބުންޏެވެ.
"އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން އާއި ގުޅިގެން ކުރިއަށް ގެންދާ މިލޯނު ޕްރޮގްރާމުގައި ލޯނު ދޫކުރުމަށް ހަމަޖެހިފައިވަނީ ލޯނަށް އެދި ހުށަހަޅާ ތަރުތީބުން އެޕްލިކޭޝަން ވަޒަންކުރުމަށްފަހު،" މިނިސްޓްރީގެ އިއުލާނުގައި ބުނެފައިވެ އެވެ.
ރާއްޖޭގެ ބައެއް ރަށްރަށަށް ޒިޔާރަތްކޮށް މަސްވެރިންނާ ވާހަކަ ދެއްކުމަށްފަހު ފިޝަރީޒް މިނިސްޓްރީން ކުރިން ބުނެފައި ވަނީ މަސްވެރިންގެ އެންމެ ބޮޑު ޝަކުވާއަކީ ބާނާ މަސް ނުކިރެވުމާއި މަސް ފިނި ކުރުމަށް ބޭނުންވާނެ އައިސް ނުލިބުން ކަމަށެވެ.
ރާއްޖޭގެ ހުރިހާ އަތޮޅެއްގައި ވެސް މިހާރު އައިސް ޕްލާންޓު ހުރެ އެވެ. ނަމަވެސް އައިސް ގަތުމުގައި މަސްވެރިންނަށް އަދިވެސް ދަތިތައް ކުރިމަތިވެ އެވެ.
