ސަރުކާރު ހިންގާ މައި ޕާޓީ، އެމްޑީޕީގެ އެންމެ އިސް ގުނަވަން ކަމަށްވާ ގައުމީ މަޖިލީހުގެ ރަސްމީ ވަޓްސްއަޕް ގުރޫޕަށް މެންބަރުންނަށް މެސެޖު ނުކުރެވޭ ގޮތް ހެދުމަކީ އިދާރީ ބޭނުމަކަށް ގެނައި ބަދަލެއް ކަމަށާއި އެކަމުގެ ސަބަބުން ހިޔާލުފާޅުކުރުމުގެ ދޮރު ބަންދުނުވާނެ ކަމަށް އެ ޕާޓީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެ އެވެ.
ވަޓްސްއެޕް ގުރޫޕަށް މެސެޖު ނުކުރެވޭ ގޮތް ހެދީ ޕާޓީގެ ދެ ފެކްޝަނުގެ ކޯޅުން ބޮޑުވެ، ގުރޫޕު ތެރޭގައި ޒުވާބުކުރުން އާންމުވާން ފެށުމުންނެވެ. މިކަމާ ގުޅިގެން ބައެއް މެންބަރުން އަންނަނީ ސޯޝަލް މީޑިއާގައި ވެސް ކަންބޮޑުވުން ފާޅުކުރަމުންނެވެ.
"މިހާރު އެއޮތީ މަނާވެފައި، އެހެންވީމާ ހިޔާލުފާޅުކުރުމުގެ މަގު އިނގޭތޯ ބަންދުވަނީ،" އެކަމާ ގުޅިގެން ކަންބޮޑުވުން ފާޅުކުރައްވަމުން މާފަންނު މެދު ދާއިރާގެ މެންބަރު އިމްތިޔާޒް ފަހުމީ "އަދަދު" އަށް ވިދާޅުވި އެވެ.
މިކަމާ ގުޅިގެން "އަދަދު" އިން ސުވާލުކުރުމުން ފައްޔާޒް ވިދާޅުވީ ގައުމީ މަޖިލީހުގެ ވަޓްސްއެޕް ގުރޫޕަކީ ބަހުސް ކުރުމަށް އުފައްދާފައިވާ ގުރޫޕެއް ނޫން ކަމަށެވެ.
"ގައުމީ މަޖިލިސް ވަޓްސްއެޕް ގުރޫޕަކީ ޕާޓީގެ ސެކްރެޓޭޓުން މެންބަރުންނާ މުއާމަލާތު ކުރުމަށް ބޭނުން ކުރާ އިދާރީ ވަސީލަތެއް،" ފައްޔާޒް ވިދާޅުވި އެވެ.
މި ބަދަލު ގެނައީ އިދާރީ ބޭނުމަށްޓަކައި ކަން ފާހަގަކުރައްވައި ފައްޔާޒް އިތުރަށް ވިދާޅުވީ ބަހުސް ކޮށް ކަންކަމާ މެދު މަޝްވަރާކުރުމަށް ޕާޓީގެ ނުރަސްމީ ގުރޫޕުތައް ހުންނާނެ ކަމަށެވެ.
"ހިޔާލު ވަރަށް ތަފާތުވާނެ، ހުންނާނެ ޕާޓީގެ ނުރަސްމީ ގުރޫޕުތައް ވެސް، [އެ ގުރޫޕުތަކުގައި] ފުރިހަމަ މިނިވަންކަމާއެކު ދަނީ ހިޔާލު ފާޅުކުރަމުން،" އޭނާ ވިދާޅުވި އެވެ.
އެމްޑީޕީގެ ރައީސް މުހައްމަދު ނަޝީދަށް ތާއީދުކުރައްވާ މެންބަރުންނާއި އިސް ލީޑަރު ރައީސް އިބްރާހިމް މުހައްމަދު ސޯލިހަށް ތާއީދު ކުރާ މެންބަރުންގެ މެދުގައި ދޭތެރެ ދޭތެރެއިން އެކި ކަންކަމުގައި ޒުވާބުކުރުމަކީ އާންމު ކަމެކެވެ.
މި ކޯޅުން މި ފަހުން އިތުރަށް ބޮޑުވެފައިވަނީ ބަޖެޓު ބަހުސްގެ ތެރެއިން ނަޝީދު ފެކްޝަންގެ މެންބަރުން ރައީސް ސޯލިހަށް ވަރަށް ބޮޑަށް ފާޑުވިދާޅުވެ، ދެވަނަ ދައުރެއް ދޭން ޖެހޭތޯ ސުވާލު އުފެއްދުމާ ގުޅިގެންނެވެ.
