އަންނަ އަހަރުގެ ބަޖެޓަށް ބޭނުންވާ ޖުމްލަ ފައިސާގެ 38 ޕަސެންޓް މިހާރު ވެސް ހަމަޖެހިފައިވާ ކަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެ އެވެ.
އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ބަޖެޓް ދިރާސާކުރާ ކޮމިޓީން އިއްޔެ ބޭއްވި ބައްދަލުވުމުގައި އަމީރު ވިދާޅުވީ އަންނަ އަހަރަށް "ފައިނޭންސިން ގެ ގޮތުގައި" (ދައުލަތަށް ލިބޭ އާމްދަނީގެ އިތުރުން) ޖުމްލަ 11.4 ބިލިޔަން ރުފިޔާ ހޯދަން ޖެހޭ ކަމަށެވެ. އެއީ ބަޖެޓް ޑެފިސިޓް ހަމަޖައްސަން ބޭނުންވާ 8.4 ބިލިޔަން ރުފިޔާއާއި ލޯނުތައް އަނބުރާ ދައްކަން ބޭނުންވާ 2.1 ބިލިޔަން ރުފިޔާ އާއި ސޮވްރިން ޑިވެލޮޕްމެންޓް ފަންޑަށް ޖަމާކުރާ 871 މިލިޔަން ރުފިޔާ އެވެ.
އެ ފައިސާގެ ތެރެއިން 6.4 ބިލިޔަން ރުފިޔާ ހޯދަން ހަމަޖެހިފައި ވަނީ ރާއްޖޭން ބޭރުން ކަމަށާއި އެތެރޭގެ ފަރާތްތަކުން ފަސް ބިލިޔަން ރުފިޔާ ހޯދަން ހަމަޖެހިފައިވާ ކަމަށް ވެސް މިނިސްޓަރު ވިދާޅުވި އެވެ.
"އަޅުގަނޑު ފާހަގަކޮށްލަން ބޭނުންވާ 2023 ވަނަ އަހަރު ބޭނުންވާ ޖުމްލަ ފައިނޭންސިންގެ ތެރެއިން 38.5 އިންސައްތަ މިހާރު ވެސް ވަނީ ހަމަޖެހިފައި،" އަމީރު ވިދާޅުވި އެވެ.
ހަމަޖެހިފައިވާ ފައިސާގެ ތަފްސީލު ދެއްވަމުން އޭނާ ވިދާޅުވީ އެކި މަޝްރޫއުތަކަަށް ނަގާފައިވާ ލޯނުތަކުން ދޫކުރާ 4.1 ބިލިޔަން ރުފިޔާ އޭގެ ތެރޭގައި ހިމެނޭ ކަމަށެވެ. ބޭރުގެ ބާޒާރުތަކަށް 771 މިލިޔަން ރުފިޔާގެ ގްރީން ނުވަތަ ބްލޫ ބޮންޑް ވިއްކާނެ ކަަމަށާއި 100 މިލިޔަން ރުފިޔާގެ ކޮންސެޝަނަލް ބަޖެޓް ސަޕޯޓް ލޯނު ހޯދަން ރާވާފައިވާނެ ކަމަށް ވެސް އޭނާ ވިދާޅުވި އެވެ.
ރާއްޖޭގެ ބާޒާރަށް ޓްރެޝަރީ ބިލާއި ބޮންޑް ވިއްކައިގެން 4.7 ބިލިޔަން ރުފިޔާ އަންނަ އަހަރު ހޯދާނެ ކަމަށް ވެސް މިނިސްޓަރު ވިދާޅުވި އެވެ.
އެ ގޮތް ގޮތުން ފައިސާ ހޯދުމާއެކު ދައުލަތުގެ ދަރަނި އަންނަ އަހަރު 9.2 ޕަސެންޓުން އިތުރުވާނެ އެވެ. އަމީރު ވިދާޅުވި ގޮތުގައި ދައުލަތުގެ ސީދާ ދަރަނީގެ ޖުމްލަ އަންނަ އަަހަރު 101 ބިލިޔަން ރުފިޔާއަށް އަރާނެ އެވެ.
