ލާމު މަސްވެރިންނަށް ލިބެންޖެހޭ ފައިސާ ނުލިބި ލަސްވާތީ އާއި ތެލާއި އައިސް ގަތުމުގައި ދިމާވާ ދަތިތަކަށް ހައްލު ހޯދުމަށް މަޖިލީހަށް މައްސަލަ ހުށަހަޅައިފި އެވެ.
ފޮނަދޫ ދާއިރާގެ މެންބަރު މޫސާ ސިރާޖު މިއަދު ރައްޔިތުންގެ މަޖިލީހުގެ ރައީސް، މުހައްމަދު ނަޝީދަށް ފޮނުއްވި ސިޓީގައި ވަނީ، މަސްވެރިންގެ ކަންބޮޑުވުންތަކަށް ހައްލު ލިބޭނެ މަގެއް ހޯދުމަށް މަޖިލީހުގެ ކަމާބެހޭ ކޮމިޓީން އެ މައްސަލަ ބަލައިދިނުމަށް އެދިފަ އެވެ.
އެ ސިޓގައި ބުނީ ލ. މާންދޫގައި ގާއިމްކޮށްފައިވާ ހޮރައިޒަން ފިޝަރީޒް ޕްރައިވެޓް ލިމިޓެޑުން މަސްވެރިން ބާނާ މަސް ކިރައި، އެމަހުގެ ފައިދާ ދޫނުކޮށް އެތަކެއް ދުވަހެއް ވެފައިވާ ކަމަށާއި، އެ ފައިސާގެ އަދަދު މިހާރު މިލިއަން ރުފިޔާއަށް އުފުލިފައިވާ ކަމަށެވެ. އަދި އެކަމުގެ ސަބަބުން މަސްވެރިންނާއި، މަސްވެރިންގެ އާއިލާތަކަށް ބޮޑެތި ދަތިތަކާ ކުރިމަތިވެފައިވާ ކަމަށް އެ ސިޓީގައި ވެއެވެ.
ސިރާޖު ވިދާޅުވީ މަހަށް އަގު ނުލިބުމުގެ އިތުރުން އެ އަތޮޅު މަސްވެރިންނަށް ތެލާއި އައިސް ހޯދުމަށް ވެސް ގިނަ ދަތިތަކާ ކުރިމަތިވެފައިވާ ކަމަށާއި، ތެލާއި އައިސް ގަންނަންޖެހެނީ ސަރުކާރު ކުންފުނިތަކުން ވިއްކާ އަގަށްވުރެ ބޮޑުތަނުން ބޮޑުކޮށް ކަމަށެވެ. އަދި ދައުލަތުގެ ބަޖެޓުން މަސްވެރިންނަށް ސަބްސިޑީގެ ގޮތުގައި އެތައް މިލިއަނެއް ހިމެނިޔަސް، ލާމު މަސްވެރިންނަށް އެކަމުން ލިބެންޖެހޭ މަންފާ ނުލިބޭ ކަމަށް އޭނާ ވިދާޅުވި އެވެ.
އޭނާ އިތުރަށް ވިދާޅުވީ މަސްވެރިން މަސް ވިއްކަން ޖެހެނީ ސަރުކާރު ކުންފުނިތަކުން މަސް ގަންނަ އަގަށްވުރެ ކުޑަ އަގުގައި ކަމުގައިވީ ނަމަވެސް, ތެލާއި އައިސް ގަންނަން ޖެހެނީ ދެކުނުގެ މަސްވެރިންނަށް ތެލާއި އައިސް ލިބޭ އަގަށްވުރެ މާބޮޑު އަގުގައި ކަމަށެވެ.
މި ކަންބޮޑުވުންތަކާއެކު، މަސްވެރިން މިއަދުން ވަނީ މާންދޫގައި މުޒާހަރާ ވެސް ކޮށްފަ އެވެ.
މާންދޫގައި މިއަދު ކުރިއަށްގެންދިޔަ މުޒާހަރާ ހޫނުވެ ޖުމްލަ ހަތަރު މީހަކަށް ވަނީ އަނިޔާ ވެސް ވެފަ އެވެ. އެގޮތުން، މުޒާހަރާ ކޮންޓްރޯލް ކުރަން އުޅުނު ފުލުހެއްގެ ބޯފަޅައިގެން ގޮސްފައިވާކަން ފާހަގަކޮށްލެވެ އެވެ.
