އަރަބިއްޔާ ސްކޫލުގެ ޕްރިންސިޕަލްގެ މަގާމުގައި ހުންނެވި މުހައްމަދު ޝުޖާއު އެ މަގާމުން ވަކިކޮށްފައި ނުވާ ކަމަށާއި އިދާރީ ގޮތުން ގެނައި ބަދަލަކާ އެކު އޭނާ ނޭޝަނަލް އިންސްޓިޓިއުޓް އޮފް އެޑިއުކޭޝަން (އެންއައިއީ) އަށް މާދަމާއިން ފެށިގެން ބަދަލުކޮށްފައިވާ ކަމަށް އެޑިއުކޭޝަން މިނިސްޓްރީން ބުނެފި އެވެ.
ޝުޖާއު މަގާމުން ވަކިކޮށްފައިވާ ކަމަށް ބުނެ ބައެއް ފަރާތްތަކުން ދައްކަމުންދާ ވާހަކަތަކާ ގުޅިގެން އެޑިއުކޭޝަން މިނިސްޓްރީގެ ޕާމަނަންޓު ސެކްރެޓަރީ އަހްމަދު އަލީ "އަދަދު" ނޫހަށް ވިދާޅުވީ އޭނާ މަގާމުން ވަކިކޮށްފައިވާ ކަމަށް ބުނެ ދައްކަމުންދަނީ ދޮގު ވާހަކަތަކެއް ކަމަށެވެ. އަދި، އޭނާ އެންއައިއީއަށް ބަދަލުކޮށްފައި ވަނީ ވެސް ހަމަ ޕްރިންސިޕަލެއްގެ މަގާމުގައި ކަމަށް ވެސް ވިދާޅުވި އެވެ.
"އަރަބިއްޔާ ސްކޫލުގެ ޕްރިންސިޕަލް އެޑިއުކޭޝަން މިނިސްޓްރީގެ [ދަށުން ހިންގާ]، އެންއައިއީ އަށް މާދަމާގެ ތާރީހުން ފެށިގެން ބަދަލުކޮށްފައި ވަނީ،" އަހްމަދު ވިދާޅުވި އެވެ.
އޭނާ މަގާމުން ވަކިކޮށްފައިވަނީ އަރަބިއްޔާ ސްކޫލުގެ ބެލެނިވެރިން ކުރިއަށްގެންދާ "ސޭވް އަރަބިއްޔާ" ކެމްޕޭން ނުހުއްޓުވައި ބެލެނިވެރިންނާ އެކު އޭނާ ހުންނެވުމުން ކަމަށް ވެސް ބައެއް ފަރާތްތަކުން ދަނީ ބުނަމުންނެވެ. އެހެން ނަމަވެސް، އޭނާ އެންއައިއީއަށް ބަދަލުކުރީ އެ ކެމްޕޭނާ ގުޅިގެން ނޫން ކަމަށް އެޑިއުކޭޝަންގެ ޕާމަނަންޓު ސެކްރެޓަރީ "އަދަދު" އަށް ވިދާޅުވި އެވެ.
"ހުރިހާ ސްކޫލުތަކަށް ވެސް އަޅުގަނޑުމެން ގެންނަ ބަދަލެއް މިއީ. ސްކޫލުތަކުގެ އިދާރީ ހިންގުމުގައި ހުރި މައްސަލަތައް ދިރާސާ ކުރުމަށް ފަހު ގެންނަ ބަދަލުތަކެއް މިއީ. އެހެން ފަރާތަކާ ސްކޫލުތައް ހިންގުން ހަވާލުކުރުން އެއީ އެޑިއުކޭޝަން މިނިސްޓްރީން އާންމުކޮށް ގެންނަ ބަދަލެއް،" އަހްމަދު ވިދާޅުވި އެވެ.
އެ ސްކޫލު ވަގުތީ ގޮތުން ހިންގުން ހަވާލުކޮށްފައި ވަނީ އިސްކަންދަރު ސްކޫލުގެ ޕްރިންސިޕަލްއާ އެވެ.
އޭނާ އެ މަގާމަށް އައްޔަނުކުރީ ޖެނުއަރީ 8، 2018 ގަ އެވެ. އޭގެ ކުރިން އޭނާ ހުންނެވީ އިސްލާމިކް ޔުނިވާސިޓީގެ ފެކަލްޓީ އޮފް ޝަރީއާ އެންޑް ލޯގެ ޑީންގެ މަގާމުގަ އެވެ.
