ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް ދިން ބޮމުގެ ހަމަލާއާ ގުޅިގެން ހައްޔަރު ކުރި އަބްދުﷲ އަލިމަނިކާއި މުހައްމަދު ތަސްލީމާ ދެކޮޅަށް ދައުލަތުން ހުށަހަޅާފައިވާ ސިއްރު ހެއްކަކު އޭނަގެ ނަން ހާމަކޮށް ހެކިބަސް ދިނުމަށް މަޖުބޫރުކުރާ ކަމުގެ ތުހުމަތުތަކެއް މިއަދު ކޮށްފި އެވެ.
ސިއްރު ހެކިންގެ ހެކިބަސް އާންމުކޮށް ނަގާނީ، އެހެން ތަނެއްގައި ބޭއްތިބުމަށް ފަހު އެ މީހުން ދައްކާ ވާހަކައިގެ އަޑު އޮންލައިންކޮށް ޝަރީއަތުގެ މަޖިލީހަށް އިވޭ ގޮތަށެވެ. އެ ގޮތަށް އަޑު ދޫކުރާނީ ކާކުގެ އަޑެއްކަން ދެނެނުގަނެވޭ ގޮތަށް އަޑު ބަދަލުކޮށްގެނެވެ.
ހއ. މޮޅަދޫ ބަހާރުގޭ، އަބްދުﷲ އަލިމަނިކު އަދި ހއ. ހޯރަފުށި، އަލަނާސިގޭ، މުހައްމަދު ތަސްލީމްގެ މައްޗަށް ކްރިމިނަލް ކޯޓުގައި ހިންގާ ޝަރީއަތަށް މިއަދު ހާޒިރުކުރި ހެކިވެރިޔާ ވަނީ ތަކުރާރުކޮށް އޭނަގެ ނަން ހާމަކޮށްފަ އެވެ. އަދި ހެކިބަސް ދޭން މަޖުބޫރުކޮށް ޖަލުގައި އަނިޔާ ކުރާ ކަމަށް ބުންޏެވެ.
އެއާއެކު ކުޑައިރުކޮޅަކަށް އަޑުއެހުން މެދުކަނޑާލި އެވެ. އޭގެ ފަހުން އަޑުއެހުން ފެށުމާއެކު، ދައުލަތުން ވަނީ އެ ހެކިވެރިޔާގެ ހެކިބަސް ނެގުމާ ގުޅޭ ގޮތުން އިތުރަށް މަޝްވަރާ ކުރަން ބޭނުންވާ ކަމަށް ބުނެފަ އެވެ. އަދި އެ ފުރުސަތު މައްސަލަ ބައްލަވާ ގާޒީ އަލީ އާދަމް ދައުލަތަށް ދެއްވި އެވެ.
އޭގެ އިތުރުން އެ މައްސަލައިގައި ހިމެނޭ ހެކި ރައްކާތެރިކުރުމުގެ އަމުރެއް ޝަރީއަތުން ނެރެފައިވާތީ އެ ހެކިވެރިޔާގެ ނަން ހާމަކޮށްގެން ނުވާނެ ކަމަށް، އަޑުއެހުމަށް ވަދެ ތިބި ނޫސްވެރިންނާއި އާންމުންނަށް ވެސް ގާޒީ އެންގެވި އެވެ.
މައްސަލައިގެ ފަސްފަހަތް
ރައީސް ނަޝީދު ގެކޮޅުން ނިކުމެވަޑައިގެން ކާރަށް އަރުއްވަނިކޮށް މެއި 6، 2021 ގައި ބޮމެއް ގޮއްވާލާ، އެމަނިކުފާނު އަވަހާރަކޮށްލަން ދިން އެ ހަމަލާ ރޭވުމުގައި އިސްކޮށް އުޅުނު ކަމަށް ފުލުހުން ތުހުމަތު ކުރަނީ އަލިމަނިކާއި ތަސްލީމުގެ މައްޗަށެވެ.
އެހެން ނަމަވެސް ދައުލަތުން އެ ދެ މީހުންގެ މައްޗަށް އުފުލީ ޓެރަރިޒަމް މަނާކުރުމުގެ ގާނޫނުގެ ދަށުން، ޓެރަރިސްޓް ޖަމާއަތަކަށް ތާއީދުކުރުމުގެ ކުށުގެ ދައުވާ އެވެ. ދައުލަތް ތަމްސީލް ކުރައްވާ ޕްރޮސެކިއުޓާ ޖެނެރަލް އޮފީހުން ބުނެފައިވާ ގޮތުގައި ހެކި ލިބެމުންދާ ވަރަކަށް އިތުރު ދައުވާތައް އަދި އުފުލާނެ ކަމަށެވެ.
މީގެ ކުރިން ޝަރީއަތަށް ވަނީ އަލި މަނިކާއި ތަސްލީމުގެ މައްޗަށް ފުލުހުންގެ އިންޓެލިޖެންސް ރިޕޯޓް ތައްޔާރުކުރުމުގައި އުޅުނު އޮފިސަރުންގެ ހެކިބަސް ނަގައިފަ އެވެ.
އެގޮތުން، ތަސްލީމަކީ އައިއީޑީ ތައްޔާރު ކުރުމުގެ މާހިރެއް ކަމަށާއި ނަޝީދަށް ހަމަލާ ދޭން ގޮއްވާލި އައިއީޑީ ތައްޔާރުކުރަން އޭނާގެ "އެކްސްޕާޓް އޮޕީނިއަން" ހޯދި ކަމަށް ތަސްލީމާ ގުޅޭ ގޮތުން އިންޓެލިޖެންސް ރިޕޯޓް ތައްޔާރު ކުރި ފުލުސް އޮފިސަރު ހެކިބަސް ދީފައިވެ އެވެ.
މީގެ ކުރިން 2020 ވަނަ އަހަރުގެ ކުރީކޮޅު ހުޅުމާލޭގައި ތިން ފަތުރުވެރިޔަކަށް ދިން ހަމަލާގެ ފަހަތުގައި ހުރީ އަބްދުﷲ އަލިމަނިކު ކަމަށާއި އޭނާ އެ ކަން ކުރީ އޭނާގެ ދަރިން ދައުލަތަށް ނެގުމުން އެ ކަމުގެ ބަދަލު ހިފުމެއްގެ ގޮތުގައި އޭނާގެ މައްޗަށް ރިޕޯޓް ތައްޔާރު ކުރި އޮފިސަރު ހެކިބަސް ދީފައިވެ އެވެ.
ހަމަލާގެ ތުހުމަތާ ގުޅިގެން އަލިމަނިކު ހައްޔަރުކުރީ މެއި 18، 2021 ގައި ފުލުހުން ހިންގި އޮޕަރޭޝަނެއްގަ އެވެ. އޭނާއަކީ 2007 ވަނަ އަހަރު އއ. ހިމަންދޫގައި ފުލުހުންނާ ސިފައިންނާ ހަރުކަށި ފިކުރަށް ނިސްބަތްވާ ބަޔަކާ ހިނގައިދިޔަ ކުރިމަތިލުންތަކެއްގައި އިސްކޮށް އުޅުނު މީހެކެވެ. އަލިމަނިކު އެ މައްސަލައިގަ ޖަލު ހުކުމް ތަންފީޒު ކުރަމުން ދަނިކޮށް ޖަލުން ވެސް ފިލާފައިވެ އެވެ.
ތަސްލީމަކީ ވެސް ހަރުކަށި ފިކުރު ފެތުރުމުގެ ތުހުމަތު ކުރެވިފައި އޮތް މީހެކެވެ. އަދި، މއ. އެނބޫގޭގެ އެޕާޓްމަންޓެެއްގައި އެޓިކް އިންޓަނޭޝަނަލް ޕްރައިވެޓް ލިމިޓެޑް ކިޔާ ކުންފުންޏަކުން ހިންގަމުން ގެންދިޔަ އޮފީސް ތެރޭގައި އައިއީޑީއެއް ހެދުމުގައި އަމަލީ ގޮތުން ހަރަކާތްތެރިވަނިކޮށް އޭނާ ކުރިން ހައްޔަރުކުރި އެވެ.
