އައިޖީއެމްއެޗްގައި ނަރުހެއްގެ ވަޒީފާ އަދާކުރަމުން ދިޔަ މެރީ ގްރޭސް އައިޖީއެމްއެޗަށް ގެންގޮސް ދިން ފަރުވާގެ ޕޭޝަންޓު ޗާޓުތައް، އޭނާ މަރާލި މައްސަލާގައި ދައުވާކުރާ ލަމްހާ އަބްދުލްރަހްމާނަށް ނުލިބޭހާ ހިނދަކު ދައުލަތުން ހުށަހަޅާފައިވާ ނަރުހުންގެ ހެކިބަސް ނެގުން މަޑުޖައްސާލަން ޝަރީއަތުން ނިންމައިފި އެވެ.
މޭރީ ގްރޭސް މަރާލީ ބޮލަށާއި ކަރަށް ހަމަލާދީ ނޭވާ ހާސްކޮށްލައިގެން އޭނާގެ އޮޓޮޕްސީ ރިޕޯޓުން ދައްކާއިރު، އެ ކަން ކުރީ އޭނާގެ ފިރިމީހާ މާވިން އެސްވައި ވާގަސް އާއި އޭނާގެ ލޯބިވެރިޔާ ލަމްހާ ކަމަށް ދައުލަތުން ދައުވާ ކުރެ އެވެ. މާވިން ވެސް މަސައްކަތް ކުރީ އައިޖީއެމްއެޗްގެ ނަރުހެއްގެ ގޮތުގަ އެވެ.
އައިޖީއެމްއެޗްގައި ކޮންމެ ޕޭޝަންޓަކަށް ތައްޔާރު ކުރާ މެޑިކަލް ޗާޓުތަކެއް އޮންނައިރު، އެންމެ ފަހުން މޭރީ ގްރޭސް ގެންދިޔައިރު އެފަދަ ޗާޓެއް އޮންނާނެ ކަމަށް ބެލެވޭނެތީވެ އެ ޗާޓުތައް ދިނުމަށް ލަމްހާގެ ފަރާތުން ހުށަހެޅީ ޝަރީއަތުގެ ކުރިން ހުށަހަޅާ ހުށަހެޅުންތަކުގެ ގޮތުގަ އެވެ.
ކްރިމިނަލް ކޯޓުގައި މިއަދު ބޭއްވި އަޑުއެހުމުގައި ލަމްހާގެ ވަކީލު އަބްދުﷲ ޝާއިރު ވިދާޅުވީ އައިޖީއެމްއެޗުން ފޮނުވި ލިޔެކިއުންތަކުގައި ވަނީ "ޑެތު ސަމަރީ" އެކަނި ކަމަށެވެ. ޕޭޝަންޓު ޗާޓު އަދިވެސް ލިބިފައި ނެތް އިރު، އެ ޗާޓުތައް ނުލިބެނީސް ނަރުހުންގެ ހެކިބަސް ނެގުމަށް އިއުތިރާޒް ކުރައްވާ ކަމަށް ވިދާޅުވި އެވެ.
އެ ކަމާ ގުޅޭ ގޮތުން ސުވާލުކުރުމުން ދައުލަތުގެ ވަކީލު އަހުމަދު ނައުފަލް ވިދާޅުވީ ޕޭޝަންޓު ޗާޓުތައް އޮތް ކަން ނުވަތަ ނޫން ކަން ވެސް އަދި ސާފުވެފައި ނުވާ ކަމަށެވެ. އަދި، މިއަދު އެ ކަން އައިޖީއެމްއެޗުން ސާފުކުރާނެ ކަމަށް ވެސް ވަކީލު ވިދާޅުވި އެވެ.
މައްސަލަ ބައްލަވާ ގާޒީ ހުސައިން ފާއިޒު ރަޝާދު ވިދާޅުވީ ޕޭޝަންޓު ޗާޓު އޮތް ނަމަ، ލަމްހާއަށް ހަވާލުކޮށްދިނުމަށް ޝަރީއަތުން ނެރެފައިވާ އަމުރެއް އޮތުމުން، އެ އަމުރާ އެއް ގޮތަށް އެ ކަން ސާފުކުރުމަކީ ދައުލަތުގެ ޒިންމާއެއް ކަމަށެވެ.
ގާޒީ ފާއިޒު ވަނީ ވީ އެންމެ އަވަހަކަށް އެ މައުލޫމާތު ސާފުކުރުމަށް ފަހު، ކޯޓުގެ އިދާރީ މޭޒަށާއި ދިފާއަށް އެ ކަންކަން ހިއްސާ ކުރުމަށް އަންގަވައިފަ އެވެ. އަދި އެ މައުލޫމާތު ސާފުނުކޮށް އެ ކަމާ ގުޅުން ހުރި މީހުންގެ ހެކިބަސް ނުނެގޭނެ ކަމަށް ގާޒީ ވެސް ފާހަގަ ކުރެއްވި އެވެ.
ނަރުހުންގެ ހެކިބަސް ނެގުމަށް ހަމަޖެހިފައި އޮތީ މާދަމާ އެވެ. މިއަދު، އަޑުއެހުން ނިންމާލެއްވުމުގެ ކުރިއަށް ވެސް މާދަމާ އަޑުއެހުން ބާއްވާނެ ކަމަށް ގާޒީ ވިދާޅުވެފައިވެ އެވެ.
މޭރީ އުޅުނު ގޭގައި ދިރިއުޅޭ މީހެއްގެ ހެކިބަސް ނެގި
މިއަދުގެ ޝަރީއަތަށް ހަތަރު ހެއްކެއް ހާޒިރުކުރުމަށް ޗިޓު ފޮނުވި އެވެ. ނަމަވެސް، މިއަދުގެ ޝަރީއަތަށް ހާޒިރުވީ އޭގެ ތެރެއިން އެންމެ މީހެކެވެ.
އެއިން އެކަކު ސިއްހީ ހާލަތު ހުރި ގޮތުން ޝަރީއަތަށް ހާޒިރު ނުވެވޭ ކަމަށް އޮތީ އަންގައިފަ އެވެ. އަދި، އެކަކު ކޯޓަށް ދިޔަ މަގުމަތީގައި އެކްސިޑެންޓެއް ހިނގައިގެން ހާޒިރުނުވެވުނީ ކަން ކޯޓަށް އަންގާފައިވެ އެވެ.
މިއަދު ހެކިބަސް ދިން މީހާ ބުނި ގޮތުގައި މޭރީ މަރުވި ދުވަހުގެ އެއްވެސް ކަމެއް ހަނދާނަކު ނެތް ކަމަށެވެ. އެ ދުވަހު ސިޑި މަތިން މާވިން ފެނުނުތޯ އާއި، ސިޑިން ނުކުމެގެން ދިޔަ ވަގުތު ބަޔަކު ޒުވާބު ކުރާ އަޑު އިވުނުތޯ ސުވާލު ކުރުމުން ވެސް ޖަވާބުގައި ބުނީ ހަނދާނުގައި ނެތް ކަމަށެވެ.
މޭރީއާއި މާވިންގެ ޗެޓް ލޮގްގެ ތަރުޖަމާއެއް ދިނުމަށް އެދުނު
މޭރީ މަރާލުމުގެ ދައުވާ މާވިންގެ މައްޗަށް ސާބިތު ކުރުމަށް ޓަކައި މާވިން އަދި މޭރީއާ ދެމެދު މެސެންޖަރުން ދައްކާފައި ހުރި ވާހަކަތަކުގެ ޗެޓް ލޮގެއް ދައުލަތުން ހެއްކެއްގެ ގޮތުގައި ހުށަހަޅާފައިވެ އެވެ.
ޖުމުލަ 184 މެސެޖް ހިމެނޭ އެ ޗެޓް ލޮގްގައި ވާހަކަ ދައްކާފައި ވަނީ ފިލިޕީންސް ބަހުންނެވެ. އެހެންވެ އޭގެ ދިވެހި ނުވަތަ އިނގިރޭސި ތަރުޖަމާއެއް ދިނުމަށް ލަމްހާގެ ވަކީލުން ވަނީ އެދިފަ އެވެ.
ނަމަވެސް، އެއީ ޝަރީއަތް ފެށުމުގެ ކުރިއަށް އޮންނަ މަރުހަލާގައި ފާހަގަކޮށްދޭން ޖެހޭ ކަމެއް ކަމަށް ދައުލަތުގެ ވަކީލުން ގަބޫލުކުރައްވަ އެވެ. އަދި އޭގައި މައްސަލައާ ގުޅުން ނެތް އެތައް ވާހަކައެއް ވެސް ދައްކާފައި އޮތުމުން، އޭގެ ތަރުޖަމާއެއް މުހިންމު ކަމުގައި ދައުލަތުން ނުދެކެ އެވެ.
އެކަމާ ގުޅިގެން ގާޒީ ފާއިޒު ވިދާޅުވީ، އެ ޗެޓްތަކުގައިވާ ކަންކަން ޝަރީއަތުން ސާފުކުރުމަށް ފަހު އެ ކަމާ ގުޅޭ ގޮތުން ޝަރީއަތެއް ގޮތެއް ނިންމަވާނެ ކަމަށެވެ.
މައްސަލައިގެ ފަސްފަހަތް
މޭރީ ގްރޭސް އަކީ އައިޖީއެމްއެޗްގެ ޑައިލެސިސް ޑިޕާޓްމެންޓްގެ ނަރުހެކެވެ. އޭނާގެ ފިރިމީހާ މާވިންއާއި ލަމްހާއަކީ ކެޝުއަލްޓީގައި މަސައްކަތް ކުރާ ނަރުހުންނެވެ.
އުމުރުން ހަތަރު އަހަރުގެ ކުޑަ އަންހެން ކުއްޖެއް ވެސް ހުންނަ ގްރޭސް މަރާލީ އޮކްޓޯބަރު 19، 2021 ގަ އެވެ. ގްރޭސްގެ މަރު ރިޕޯޓްކޮށް، ހަށިގަނޑު ހޮސްޕިޓަލަށް ގެންދިޔައީ ވެސް މާވިން އެވެ. މާވިން ބުނީ އޭނާއަށް ގްރޭސް ފެނުނީ ދަންޖެހި އަމިއްލައަށް މަރުވެފައި ހުއްޓާ ކަމަށެވެ.
ދަންޖެހިގެން މަރުވި ކަމަށް ބުނެ ރިޕޯޓް ކުރިޔަސް ތުހުމަތު ކުރެވޭ ކަންކަން ހުރުމުން ފުލުހުން ތަހުގީގު ހިންގުމަށް ފަހު މާވިން ހައްޔަރު ކުރީ އޮކްޓޯބަރު 27 ގަ އެވެ. އޭގެ ފަހުން ލަމްހާ ހައްޔަރު ކުރީ އޭގެ 50 ދުވަސް ފަހުން ޑިސެމްބަރު 16 ގަ އެވެ.
މާވިންގެ މައްޗަށް ގަސްތުގައި މީހަކު މަރާލުމުގެ ކުށުގެ ދައުވާ އުފުލާފައިވާއިރު، ލަމްހާގެ މައްޗަށް ކުރަނީ ގަސްތުގައި މީހަކު މަރާލުމުގައި ބައިވެރިވުމުގެ ކުށުގެ ދައުވާ އެވެ.
އޭގެ އިތުރަށް އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ދައުވާއާއި ހުއްދަ ނަގައިގެން ކުރަން ޖެހޭ ކަމެއް ހުއްދަ ނުނަގާ ކުރުމުގެ ދައުވާ ވެސް ލަމްހާގެ މައްޗަށް ކުރެ އެވެ. އެ ދައުވާ ކުރަނީ އައިޖީއެމްއެޗުން ހުއްދަ ނުނަގައި، ނުރައްކާތެރި ބައެއް ބޭސްތަކެއް ލަމްހާ ނެގި ކަމަށް ތުހުމަތުކޮށެވެ.
