އަންނަ އަހަރަށް ލަފާކޮށް، ސަރުކާރުން ހުށަހަޅާފައިވާ ބަޖެޓުގައި ސިއްހީ ދާއިރާއަށް ފަސް ބިލިއަން ރުފިޔާ ހިމަނައިފި އެވެ.
އަންނަ އަހަރު ސިއްހީ ދާއިރާއަށް ފަސް ބިލިއަން ރުފިޔާގެ ބޮޑު ބަޖެޓެއް ކަނޑައަޅާފައިވާއިރު، މުޅި ރާއްޖޭގެ ސިއްހީ ހިދުމަތުގެ ފެންވަރު ރަނގަޅުކޮށް ހަރުދަނާ ކުރުމަށްޓަކައި، ސިއްހީ ދާއިރާގެ އުމްރާނީ ވަސީލަތްތައް ގާއިމު ކުރުމަށް ޕީއެސްއައިޕީ ބަޖެޓުން 724.9 މިލިއަން ރުފިޔާ ވެސް ސިއްހީ ދާއިރާއަށް ހަރަދު ކުރުމަށް ވަނީ ނިންމާފަ އެވެ.
ޕީއެސްއައިޕީގެ ދަށުން ސިއްހީ ދާއިރާއަށް ހިންގުމަށް ހަމަޖެހިފައިވާ މަޝްރޫއުތަކުގެ ތެރޭގައި ކުޅުދުއްފުށީ ސިޓީ އާއި ގދ. ތިނަދޫގައި އަލަށް އިމާރާތްކުރާ ޓާޝަރީ ހޮސްޕިޓަލާއި، ލ. ގަން އަދި ރ. އުނގޫފާރު ހޮސްޕިޓަލް ޓާޝަރީ ފެންވަރަށް ތަރައްގީ ކުރުން ހިމެނެ އެވެ.
މިހާރު ކުރިއަށްދާ މަޝްރޫއުތަކަށް ބަޖެޓު ކޮށްފައިވާއިރު، އަންނަ އަހަރު ސިއްހީ ދާއިރާގެ އިތުރު މަޝްރޫއުތައް ފެށުމަށް ޑޮމެސްޓިކް ބަޖެޓުގައި ވަނީ 35.1 މިލިއަން ރުފިޔާ ޖަހާފަ އެވެ. އަލަށް ފަށާ މަޝްރޫއުތަކުގެ ތެރޭގައި، ހުޅުމާލެ ހޮސްޕިޓަލުގެ އޮޕަރޭޝަން ތިއޭޓާ ކޮމްޕްލެކްސް ގާއިމުކުރުމާއި، އައިސީޔޫ އަދި އެންއައިސީޔޫގެ ހިދުމަތް ބޮޑުކުރުމުގެ އިތުރުން އަބްދުއްސަމަދު މެމޯރިއަލް ހޮސްޕިޓަލުގެ އޮޕަރޭޝަން ތިއޭޓަރު ބޮޑުކުރުމާއި އައިސީޔޫގެ މަސައްކަތްތައް ކުރުން ހިމެނެ އެވެ.
ހަމައެއާއެކު، ރާއްޖޭގެ އާބާދީ ބޮޑެތި ރަށްތަކުގައި ހޮސްޕިޓަލްތައް ބިނާކުރުމަށް ޑޮމެސްޓިކް ބަޖެޓުގެ އިތުރުން ކުވެއިތު ފަންޑާއި އިންޑިއަން އެގްޒިމް ބޭންކުގެ ލޯނުތަކުން ވެސް ހަރަދު ކުރުމަށް ވަނީ ބަޖެޓުކޮށްފަ އެވެ.
އަންނަ އަހަރުގެ ބަޖެޓުގައި ސިއްހީ ދާއިރާއަށް އެންމެ ބޭނުންތެރި އެއް ކަމަކަށް ހިމަނާފައި ވަނީ މުވައްޒަފުން މުސާރައިގެ އާ އޮނިގަނޑަށް ހިޖުރަކުރުމެވެ. އެގޮތުން، މުސާރަ ހަމަހަމަކުރުމުގެ ސިޔާސަތުގެ ދަށުން ސިއް ދާއިރާގެ ގިނަ މުވައްޒަފުންގެ މުސާރަ އާ އޮނިގަނޑަށް ބަދަލުކުރުމަށް 493.2 މިލިއަން ރުފިޔާ ބަޖެޓުގައި ހިމަނާފައި ވެއެވެ.
އޭގެ އިތުރަށް ސިއްހީ ދާއިރާއަށް އިތުރު 1000 މުވައްޒަފުން އިތުރުކުރުމަށް ރާވާފައިވާތީ، ސިއްހީ ދާއިރާގެ މުވައްޒަފުންނަށް ހިނގާ މުސާރަ އަންނަ އަހަރު ބޮޑުވާނެ ކަމަށް ބަޖެޓުގައި ޖަހާފައި ވެއެވެ.
