"އިއުލާނު ކުރެވޭ ބިޑުތައް ހުންނަނީ ވަކި މީހަކަށް ފަހާފައޭ ބުންޏަސް ރަނގަޅުވާނެ،"
މިހާރު ކުރިއަށްދާ އެންޓި ކޮރަޕްޝަން ކޮންފަރެންސްގެ އިއްޔެގެ ސެޝަންގައި، ސަރުކާރު ހިއްސާވާ ކުންފުނިތަކުގައި ކޮރަޕްޝަން އޮތް މިންވަރު ހިއްސާ ކުރައްވަމުން އޭސީސީގެ ނައިބު ރައީސް އަބްދުއްސަލާމް ފުރަތަމަ ވެސް ފާހަގަ ކުރެއްވީ މި ވާހަކަ އެވެ.
ކުންފުނިތަކުން ހިންގާ ހިޔާނާތްތަކާއި ބޭނުންކުރާ އުކުޅުތައް އޭނާ ތިލަކޮށް ދެއްވަމުން ގެންދެވި އެވެ. އެގޮތުން މި އަހަރު އެ ކޮމިޝަންގައި ރަޖިސްޓަކޮށްފައިވާ މައްސަލަތަކުގެ ތެރެއިން ކުންފުނިތަކުގެ ބީލަމާ ގުޅޭ މައްސަލަތަކަށް ބަލާއިރު، އެ ބީލަންތައް ހުރީ "ވަކި ކުންފުންޏެއްގެ ސްޕެސިފިކޭޝަން ދިމާވާ މިންވަރަށް ލިބާސް ފަހައި ނިންމާފައި" ކަމަށް އޭނާ ވިދާޅުވި އެވެ.
އެހެންވީމާ އިތުރު ބަޔަކު މި ބިޑަށް ކުރިމަތިލިޔަސް ދެވޭނެ އިތުރު ބައެއް ނޯވޭ. މިއީ ކަނޑައެޅިގެން ރޭވިގެން ހިންގާ ކަންތައްތަކެއް،"
އިތުރު މައްސަލައެއްގެ ގޮތުގައި ސަލާމް ފާހަގަ ކުރެއްވީ މުދަލާއި ހިދުމަތް ހޯދުމަށް ފަހު، އަދި ހަވާލުކުރެވޭ މަސައްކަތަށް ފަހު ފައިސާ ދޫކުރުމުގައި ހިޔާނާތް ހިންގާ ގޮތެވެ. ބިލްތަކަށް ފައިސާ ދޫކުރަނީ މެނޭޖުމެންޓް ބޭނުންވާ ބަޔަކަށް ކަމަށާއި ފައިސާ ދޫކުރަނީ ވެސް ކޮމިޝަން ނުވަތަ ހަދިޔާ ލިބޭ ގޮތަށް ކަމަށް އޭނާ ވިދާޅުވި އެވެ.
ބީލަންތައް ބައްޓަން ކުރަނީ ވެސް ސަލާމް ވިދާޅުވި ގޮތުގައި މިފަދަ ކުންފުނިތަކަށެވެ.
އެންޓި ކޮރަޕްޝަންގެ ކޮންފަރެންސްގެ ތެރެއިން. -- ފޮޓޯ: އޭސީސީ
ނެތް އެމަޖެންސީ ހާލަތާއި އަގުބޮޑުކޮށް މުދާ ހޯދުން
ސަރުކާރުގެ ކުންފުނިތަކުން ބޭނުންކުރާ އެހެން އުކުޅެއްގެ ގޮތުގައި ސަލާމް ފާހަގަ ކުރެއްވީ އެމަޖެންސީ ހާލަތެއް ނެތި، އެފަދަ ހާލަތު އޮތްކަން ހަދައި މާލިއްޔަތު އުސޫލުން ލިބިދޭ ލުއި ކޮރަޕްޝަނަށް ފަހިކުރުމެވެ. އެފަދަ ހާލަތްތަކުގައި "ޕޭޕާ ކުންފުނިތައް" ވެސް ބޭނުންކޮށް މުދަލާއި ހިދުމަތް ހޯދާފައިވާކަން ތަހުގީގަށް ފާހަގަވެފައިވެ އެވެ. އަދި އެފަދަ ބައެއް ފަހަރު މުދާ ނުލިބި ކުންފުންޏަށް ގެއްލުން ވެފައިވާ ކަމަށް ވެސް ސަލާމް ވިދާޅުވި އެވެ.
އުފެއްދި ކުންފުނިން [މުދާ] ލިބެން ހުއްޓައިވެސް ޕޭޕަ ކުންފުނިތައް އުފައްދައިގެން އެ މީހުން އަތުން މުދާ ހޯދާ، ނުވަތަ ހިދުމަތް ހޯދާކަން އަޅުގަނޑުމެންނަށް ފާހަގަކުރެވޭ. އޭގެ ސަބަބުން ބައެއް ފަހަރު މުދަލެއް ނުވަތަ އެ ހިދުމަތެއް ފޯރުކޮށް ނުދެވި އެބަދޭ." ސަލާމް ވިދާޅުވި އެވެ.
އަގުހެޔޮކޮށް ލިބެން ހުންނަ މުދާ، އެހެން ކުންފުންޏެއް މެދުވެރިކޮށް އަގުބޮޑުކޮށް ވެސް ހޯދާ ކަމަށާއި އެފަދަ ބައެއް އެއްބަސްވުންތައް ދިގު މުއްދަތަކަށް ހަދާފައި އެބަ ހުއްޓެވެ. އެ އެއްބަސްވުންތަކަކީ ސީދާ ވަކި ބަޔަކަށް މަންފާ ހޯދައިދިނުން ކަމަށް ސަލާމް ވިދާޅުވި އެވެ.
މީގެ އިތުރުން، ރޭވި، ބަޖެޓް ހަމަޖެހިފައި ހުރި މަސައްކަތްތައް ދުރާލައި ކުރުމުގެ ބަދަލުގައި ކުރަން ފަށަނީ ވެސް ވަގުތު ޖެހުމުން ކަމަށާއި، މިއީ ވެސް ހިޔާނާތުގެ އުކުޅެއް ކަމަށް ސަލާމް ފާހަގަ ކުރެއްވެވި އެވެ.
ޕޮލިހުން ފާހަގަ ކުރި ގޮންޖެހުންތައް
"ސްމާޓު" މީހުން ކުރާ ކުށްތަކީ މަގުމަތީގެ ކުށްތަކާ ތަފާތުކޮށް ހިންގާ ކުށްތަކަކަށް ވާއިރު، އެފަދަ މައްސަލަތައް ހޯދައިގަތުމަށާއި ތަހުގީގުކުރުމަށް އެންމެ ބޮޑު ގޮންޖެހުމަކީ ހެކި ހޯދުމާއި، އަސްލު ޑޮކިއުމެންޓް ނެތުން ކަމަށް ފުލުހުންގެ އިކޮނޮމިކް ކްރައިމް ޑިޕާޓްމެންޓްގެ ހެޑް، ޗީފް އިންސްޕެކްޓަ މުހައްމަދު އުސާމަތު ވިދާޅުވި އެވެ.
ހިޔާނާތުގެ މައްސަލަތައް ދިގުލައިގެން ދަނީ ވެސް އެފަދަ ސަބަބުތައް ހުރެގެން ކަމަށް އޭނާ ފާހަގަ ކުރެއްވެވި އެވެ.
"[ހިޔާނާތުގެ މައްސަލަތަކަކީ] ކްރައިމް ސީނެއް އޮންނަ ކަމެއް ނޫން. ކްރައިމް ސީނެއް އޮންނަ ނަމަ ހެކި ދެނެގަންނަން ވަރަށް ފަސޭހަ،" އުސާމަތު ވިދާޅުވި އެވެ.
ކުންފުނިތަކުގެ ހިޔާނާތުގެ މައްސަލަތައް ގުޅިފައި އޮތީ ހަމައެކަނި ރާއްޖޭގެ އެތެރެވަރިއާ ނޫން ކަމަށާއި ބޭރުގެ ފަރާތްތަކާއި ބޭންކުތަކާ ވެސް ގުޅިފައިވާ ކަމަށް ސަލާމް ވިދާޅުވި އެވެ. އަދި ހޯދި ނުހައްގު މުއްސަދިކަން މުދަލަށް ބަލުކޮށްފައިވާ ކަމަށާއި ބޭރުގެ އެކައުންޓްތަކަށް ފައިސާ ވެސް ޖަމާކޮށްފައި ހުރި ކަމަށް ތުހުމަތު ކުރެވޭ ކަމަށް އޭނާ ވިދާޅުވި އެެވެ. މިފަދަ މައްސަލަތައް ބޭރުގެ ފަރާތްތަކާ ގުޅިގެން ކުރިއަށް ގެންދިއުމަށް ވިސްނާ ކަމަށް އޭނާ ވިދާޅުވި އެވެ.
