މަސްތުވާތަކެތީގެ ވިޔަފާރިކޮށްގެން ހޯދި ކަމަށް ޝައްކު ކުރެވޭ ފައިސާ ބޭނުންކޮށްގެން މަންފާ ހޯދި ކަމަށް ތުހުމަތުކޮށް އުފުލި މަނީ ލޯންޑަރިންގެ ފުރަތަމަ ދައުވާ ކްރިމިނަލް ކޯޓުން ބޭރުކޮށްލަން ނިންމި ނިންމުން ހައި ކޯޓުގައި އިސްތިއުނާފުކޮށްފި އެވެ.
އެ މައްސަލާގައި ދައުލަތުން ދައުވާ އުފުލީ ގދ. ތިނަދޫ, ލަކީލާސްޓް, ރާމިޒާ އަލީގެ މައްޗަށެވެ. އޭނަގެ މައްޗަށް ކުރާ ދައުވާ ކްރިމިނަލް ކޯޓުން ބާތިލްކުރުމުން، އެ މައްސަލަ ހައި ކޯޓުގައި އިސްތިއުނާފުކުރިކަން ޕްރޮސެކިއުޓާ ޖެނެރަލްގެ އޮފީހުން ވަނީ މިއަދު ޔަގީންކޮށްދީފަ އެވެ.
ރާމިޒާގެ މައްޗަށް ދައުވާ ކުރީ އޭނާގެ ފިރިމީހާ ގދ. ތިނަދޫ، ރަންގަލް، ހަސަން ލޫތު، އިތުރު ބަޔަކާއެކު މަސްތުވާތަކެތީގެ ވިޔަފާރި ކޮށްގެން ހޯދި ކަމަށް ޝައްކު ކުރެވޭ ފައިސާ އޭނާގެ އެކައުންޓަށް ޖަމާކުރުމުން، އޭގެން މަންފާ ހޯދާފައިވާތީ އެވެ.
އެ މައްސަލައިގައި ދައުލަތުން ރާމިޒާގެ މައްޗަށް ހުށަހެޅި 23 ހެއްކެއް ބަލައިނުގަތުމަށް އޭނާ ވަނީ ކްރިމިނަލް ކޯޓުގައި އެދިފަ އެވެ. އޭނާ މައިގަނޑު ސަބަބަކަށް ފާހަގަކުރީ ގިނަ ހުށަހެޅި ހެކިތަކަކީ އޭނާގެ މައްޗަށް އުފުލާފައިވާ ދައުވާއާ ނުގުޅޭ ހެކިތަކަކަށް ވުމެވެ.
ދިފާއުން ހުށަހެޅި ހުށަހެޅުންތަކުގެ ރައްދުގައި ދައުލަތުން ވަނީ ހެކި ބަލައިނުގަތުމަށް ދިފާއުން އެދުނު ނަމަވެސް އެކަމަށް އެއްވެސް ހުއްޖަތެއް ދެއްކިފައިނުވާ ކަން ފާހަގަކޮށްފަ އެވެ. އަދި، ގުޅުން ހުރި ހެއްކެއް ނޫން ކަމަށް ދިފާއަށް ފެނުމަކީ ހެކި ބަލައިނުގަތުމަށް އޮތް ހުއްޖަތެއް ނޫން ކަމަށް ވެސް ބުނެފައިވެ އެވެ.
އަދި، ދައުލަތުން ހުށަހަޅާފައިވާ ހެކިތަކަކީ ޖިނާއީ އިޖުރާއަތުގެ ގާނޫނުގެ ދަށުން މައްސަލައާ ގުޅުން ހުރި ހެކި ކަމަށް ވެސް ބުނެފައިވެ އެވެ.
ދެ ފަރާތުގެ ހުށަހެޅުންތަކަށް ފަހު ޝަރީއަތުން ވަނީ ރާމިޒާގެ މައްޗަށް އުފުލާފައިވާ މަނީ ލޯންޑްރިންގެ ކުށުގެ ދައުވާގައި ދައުލަތުން ސާބިތުކޮށްދޭން ޖެހޭނީ އޭނާގެ ފިރިމީހާ މަސްތުވާތަކެތީގެ ވިޔަފާރިކުރާ ކަން އެނގިހުރެ، އެކަމުން ހޯދި ފައިސާ ބޭނުން ކުރި ކަން ކަން ވަނީ ފާހަގަކޮށްފަ އެވެ.
ކްރިމިނަލް ކޯޓުގެ ގާޒީ އަލީ އާދަމްގެ ނިންމެވުމުގައި ވަނީ ގިނަ ހެކިތަކުން ރާމިޒާ މަނީ ލޯންޑްރިން ކުށުގެ އަމަލެއް ކޮށްފައިވާކަން ޝަރީއަތަށް ސާބިތުކޮށްދެވޭ ވަރަށް ދައުލަތުން ހެކި ހުށަހަޅާފައިނުވާ ކަމަށެވެ.
"އަދި މި ހެކިންނަކީ މި މައްސަލައިގެ ސީދާ މައުލޫއާ ގުޅުން ހުރި ހެކިތަކަކަށް ނުވާއިރު، އަދި ވަށައިގެންވާ އެންމެހާ ކަންކަމަށް ރިއާޔަތްކޮށް މި މައްސަލަ ނިންމުމަށް ބަލާއިރު ވެސް، މި ހެކިތަނުން ރާމިޒާ އަލީގެ މައްޗަށް މަނީ ލޯންޑަރިންގެ އަމަލެއް ކޮށްފައިވާކަން ދަލާލުކޮށްދޭ އެއްވެސް ހެއްކެއް ފެންނަން ނެތަތީ،" ގާޒީ އަލީ އާދަމްގެ ނިންމެވުމުގައި ވެ އެވެ.
ކްރިމިނަލް ކޯޓުން މި މައްސަލަ ކުރިއަށް ގެންދެވޭނެ ކަމަށް ނެތް ކަމަށް ނިންމުމުން، އެ ދައުވާ ވަނީ ބާތިލް ވެފަ އެވެ.
