އަންނަ މަހު ގަތަރުގައި ފަށާ ފީފާ ވޯލްޑް ކަޕުގެ މެޗުތައް ޕަބްލިކް ސާވިސް މީޑިއާ (ޕީއެސްއެމް) ގެ ޔެސްޓީވީން ދެއްކުމުގެ އެއްބަސްވުމުގައި ސޮއިކޮށްފި އެވެ.
ދުނިޔޭގެ އެންމެ ބޮޑު ފުޓްބޯޅަ މުބާރާތް ދައުލަތުގެ މީޑިއާއިން ނުފެނިދާނެ ކަމުގެ ބިރު އޮއްވައި އެ ކުންފުނިން ވަނީ ރާއްޖޭގައި ވޯލްޑް ކަޕް ދެއްކުމުގެ ރައިޓްސް އޮތް މީޑިއާނެޓާ އެކު އެއްބަސްވުމެއްގައި ސޮއިކޮށްފަ އެވެ.
"ވޯލްޑް ކަޕަކީ ޒަމާނުއްސުރެ ދިވެހިންގެ މެދުގައި މަގުބޫލު އަދި ފުޓްބޯޅައިގެ ފޯރި އާއި ޖޯޝު ގެނުވާ މުބާރާތެއް. 2022 ގެ ވޯލްޑް ކަޕް ވެސް ދިވެހިންނާ ހަމައަށް ގެނެސް ދިނުމަށް ވާން ޖެހޭ އެންމެހާ ތައްޔާރީތައް ޕީއެސްއެމްއިން ދަނީ ވަމުން،" ޕީއެސްއެމްގެ ސީއީއޯ އަލީ ޚާލިދު ވިދާޅުވި އެވެ.
މި އެއްބަސްވުމުގައި ޕީއެސްއެމްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަލީ ޚާލިދު އަދި ސޭލްސް އެންޑް މާކެޓިން ޑިރެކްޓަރު އިބްރާހިމް ނަސްރީނު އެވެ. މީޑިއާނެޓުގެ ފަރާތުން ސޮއިކުރެއްވީ މެނޭޖިން ޑިރެކްޓަރު އަހްމަދު ޝަފީއު އަދި ޗީފް އޮޕަރޭޓިން އޮފިސަރު (ސީއޯއޯ) އަހްމަދު ނަބާހު އެވެ.
"މި އަހަރުގެ ވޯލްޑް ކަޕް ސައްތައިން ސައްތަ ދިވެހި ޗެނަލްތަކުން ދެއްކުމަކީ ވަރަށް ބޮޑު ޝަރަފެއް،" މީޑިއާނެޓުގެ ސީއޯއޯ ނަބާހު ވިދާޅުވި އެވެ.
މިއާއެކު، ރާއްޖޭގެ ތިން ޗެނަލަކުން ވޯލްޑް ކަޕުގެ މެޗުތައް ދައްކާނެ އެވެ. އެއީ މީޑިއާނެޓުގެ އައިސްޓީވީ، ރާއްޖެޓީވީ އަދި ޕީއެސްއެމްގެ ޔެސްޓީވީ އެވެ. މިއީ ފަހުގެ ތާރީހެއްގައި މި ގޮތަށް ވޯލްޑް ކަޕް ތަޖުރިބާ ކޮށްލަން ލިބޭނެ ފުރަތަމަ ފަހަރެވެ. ވޯލްޑް ކަޕްގެ ރައިޓްސް މި ފަހަރު ރާއްޖޭން ގަނެފައިވަނީ މީޑިއާނެޓުންނެވެ.
މީޑިއާނެޓްގެ އައިސްގެ ޗެނަލްތަކަކީ މި ވަގުތު ވެސް ދިވެހިންގެ ތެރޭގައި މަގުބޫލު ޗެނަލްތަކެކެެވެ. ދުނިޔޭގެ މަގުބޫލު ފުޓްބޯޅަ ލީގުތައް ކަަމަށްވާ އިނގިރޭސި ޕްރިމިއާ ލީގާއި އިޓާލިއަން ލީގު، ފްރެންޗް ލީގު އަދި ސްޕެނިޝް ލީގުގެ މެޗުތަކުގެ އިތުރުން ކުޅިވަރުގެ މުހިންމު މުބާރާތްތަކުގެ މެޗުތައް ވެސް އައިސް އިން ވަގުތުން ފެނެ އެވެ.
