އާސަންދައިގެ ކަސްޓަމާ ސާވިސް ފްރަންޓް އޮފީސް ފެން ބިލްޑިންއަށް ބަދަލުކޮށްފި އެވެ.
ކުރިން އާސަންދައިގެ ކަސްޓަމާ ސާވިސް ފްރަންޓް އޮފީސް ހިންގީ އެސްޓީއޯ ޓްރޭޑް ސެންޓަރުގެ ތިން ވަނަ ފަންގިފިލާގަ އެވެ. ނަމަވެސް މިހާރު ގެނައި ބަދަލާއެކު، އާސަންދައިގެ ހިދުމަތްތައް ލިބޭނީ ފެންބިލްޑިންގުގެ ތިން ވަނަ ފަންގިފިލާގައި ގާއިމްކޮށްފައިވާ އާ ފްރަންޓް އޮފީހުންނެވެ.
އެއާއެކު އާސަންދަ ސްކީމުގެ ދަށުން ރާއްޖެއިން ބޭރަށް ފުރުމަށް ހުށަހަޅަންޖެހޭ ލިޔެކިޔުންތައް ހުށަހެޅުމުގެ ކަންކަން ދެން ކުރިއަށްދާނީ ފެން ބިލްޑިންގުގައި ހުރި ކަސްޓަމާ ސާވިސް ކައުންޓަރުތަކުންނެވެ.
އާސަންދައިން ބުނީ، ކަސްޓަމާ ސާވިސް ފްރަންޓް އޮފީހުން ހިދުމަތް ދޭނީ ސަރުކާރު ބަންދުނޫން ކޮންމެ ދުވަހެއްގެ ވެސް ހެނދުނު 08:00 އިން ހަވީރު 4:00 އަށް އަދި ހޮނިހިރު ދުވަސްތަކުގައި ހެނދުނު 09:00 އިން މެނދުރު 1:00 އަށް ކަމަށެވެ.
އޭގެ އިތުރުން، ކުރިއެކޭ ވެސް އެއްގޮތަށް ރަސްމީ ގަޑީގެ ބޭރުން އިމަޖަންސީ ކޭސްތަކުގެ ލިޔެކިއުންތައް ކަސްޓަމާ ސާވިސް ސެންޓަރުން ބަލައިގަންނާނެ ކަމަށް ވެސް އާސަންދައިން ބުނެ އެވެ.
އެ ކުންފުނިން ބުނީ، އާސަންދަ ސްކީމުގެ ދަށުން ރާއްޖެއިން ބޭރަށް ފުރުމަށް ހުށަހަޅަންޖެގޭ ލިޔެކިޔުންތައް ހުށަހެޅުމަށް ރައްޔިތުންނަށް މިހާރަށްވުރެ ފަސޭހަ ގޮތްތަކެއް ހަމަޖައްސައިދިނުމަށް އެ ކުންފުނިން ދަނީ މަސައްކަތް ކުރަމުންނެވެ.
