އޯޕެކް ޕްލަސް ގައުމުތަކުން ތެޔޮ އުފައްދާ މިންވަރު މަދުކުރަން ނިންމި ނިންމުމަށް ތާއީދުކުރާ ކަމަށް ދިވެހި ސަރުކާރުން މިއަދު ބުނެފި އެވެ.
ސައުދީ އަރަބިއްޔާ އިސްވެ އޮންނަ އޯޕެކް ޕްލަސް ގްރޫޕުން ބުނީ ދުނިޔޭގެ އިގްތިސާދު މަޑުޖެހެމުން ދާތީ ތެލުގެ އަގުތައް ވެއްޓެން ފަށާފައިވާ ކަމަށާއި އެކްސްޕޯޓް މަދު ކުރަން ނިންމީ އަގުތައް އެއްވަރެއްގައި ހިފެހެއްޓުމަށް ކަމަށެވެ.
އެކަމާ ގުޅިގެން އެމެރިކާ ފަދަ ދުނިޔޭގެ ބޮޑެތި ބައެއް ގައުމުތަކުން ސައުދީއަށް ފާޑުކިޔުން އަމާޒުކުރަމުންދާ ދަނޑިވަޅެއްގައި، ރާއްޖޭގެ ފޮރިން މިނިސްޓްރީން ނެރުނު ބަޔާނެއްގައި ބުނީ ސައުދީން ތެޔޮ އުފެއްދުން ލިމިޓު ކުރީ އިގްތިސާދީ ހާލަތްތަކުގެ އިތުރުން ބައެއް ޓެކްނިކަލް ކަންކަމަށް ރިއާޔަތް ކުރުމަށްފަހު ކަމަށް ގަބޫލުކުރެވޭ ކަމަށެވެ.
"އޯޕެކް ޕްލަސް އިން މި ނިންމުން ނިންމާފައިވަނީ މެމްބަރުގެ ގައުމުތަކުގެ އިއްތިފާގުންކަން ދިވެހި ސަރުކާރުން ފާހަގަކުރަން. މީގެ އިތުރުން މި ފިޔަވަޅަކީ ސިޔާސީ ނިންމުމެއްގެ ގޮތުގައި ނުދެކި، ދުނިޔޭގެ ތެލުގެ މާކެޓު ހަމައަކަށް އެޅުވުމަށް އެޅި ރަނގަޅު ފިޔަވަޅެއްގެ ގޮތުގައި ދެކުން މުހިންމު،" އެ ބަޔާނުގައި ބުންޏެވެ.
ފޮރިން މިނިސްޓްރީން އިތުރަށް ބުނީ ދުނިޔޭގެ ހަކަތައިގެ ބާޒާރުގައި ހަމަޖެހުމުން ގާއިމުވެފައި އޮތުން ރާއްޖެފަދަ ތެލަށް ބަރޯސާވެފައިވާ ކުޑަ ގައުމަކަށް މުހިންމު ކަމަށެވެ.
އަންނަ މަހުން ފެށިގެން ތެޔޮ އުފައްދާ މިންވަރު ދުވާލަކު ދެ މިލިއަން ފީފާއަށް މަދު ކުރަން އޯޕެކް ޕްލަސް އިން ވަނީ ނިންމައިފަ އެވެ.
