ގާނޫނީ ވަކީލުކަމުގެ ހާއްސަ ހުއްދަ 2020 ވަނަ އަހަރު ދީފައިވާ މީހުން ބާ އިމްތިހާނު ހަދަން ނުޖެހޭ ގޮތަށް ރައްޔިތުންގެ މަޖިލީހުގެ މިއަދުގެ ޖަލްސާގައި ފާސްކޮށްފި އެވެ.
ގާނޫނީ ފަންނުގެ ގާނޫނަށް އެ އަހަރު ގެނައި އިސްލާހެއްގެ ދަށުން އެންމެ ފުރަތަމަ ބާ އިމްތިހާނެއް ބޭއްވެންދެން އެހާތަނަށް ކިޔަވައި ނިމިފައި ތިބި މީހުންނަށް ހާއްސަކޮށް ތަމްރީނު ޕްރޮގްރާމެއް ފުރިހަމަ ކުރުމަށް ފަހު ވަކީލުކަމުގެ ހާއްސަ ހުއްދަ ދިނެވެ.
އެހެންނަމަވެސް ގާނޫނުގައި އޮތީ އެންމެ ފުރަތަމަ ބާއްވާ ބާ އިމްތިހާނުގައި އެ މީހުން ބައިވެރިވުން މިހާރު ލާޒިމްވާ ގޮތަށެވެ.
މިކަން ބަދަލުކުރުމަށް އެ ގާނޫނު ބަދަލު ކުރުމަށް ހުށަހެޅުއްވީ ވިލިމާލޭ ދާއިރާގެ މެންބަރު އަހުމަދު އުޝާމެވެ. އުޝާމް ހުށަހެޅުއްވީ ގާނޫނުން މި މާއްދާ އުނިކުރުމަށެވެ.
ޖުޑީޝަރީ ކޮމިޓީން މި ބިލު ދިރާސާކޮށްފައިވަނީ މި ގާނޫނަށް އިސްލާހު ގެނައުމަށް ސަރުކާރުގެ ފަރާތުން ރައްޔިތުންގެ މަޖިލީހުގެ ހޮޅުދޫ ދާއިރާގެ މެންބަރު ޔޫނުސް އަލީ ހުށަހެޅުއްވި ބިލާ އެކުއެކީގަ އެވެ.
ޔޫނުސް ހުށަހެޅުއްވި ބިލުގައި ވަނީ ގާނޫނީ ވަކީލުކަމުގެ ހުއްދައަށް އެދޭ ފަރާތްތަކަށް އެއް އަހަރު ދުވަހުގެ ތަމްރީނު ޕްރޮގްރާމެއް ފުރިހަމަކުރުމަށް ކުރިން ގާނޫނުގައި ލާޒިމްކޮށްފައި އޮތް އޮތުން ބަދަލުކޮށް ދުނިޔޭގެ އެހެނިހެން ގައުމުތަކުގައި ގާނޫނީ ވަކީލުކަމުގެ ހުއްދަ ދިނުމުގެ ކުރިން ފުރިހަމަކުރާ ތަމްރީނުތައް ކުރިޔަށް ގެންދާ ގޮތަށް ރިއާޔަތްކޮށް ރައްޖެއަށް އެންމެ އެކަށޭނަ ތަމްރީނުގެ ނިޒާމެއް އެކުލަވާލައި ތަންފީޒުކުރުމުގެ ބާރު ބާ ކައުންސިލަށް ދިނުމަށް ހިމަނާފަ އެވެ.
ބިލުގައި ވަނީ ބާ ކައުންސިލަށް ލިބޭ އާމްދަނީން އެ ކައުންސިލު ހިންގޭ ފަދަ ގޮތަކަށް ބާ ކައުންސިލުގެ ހިންގުން ބައްޓަންކުރުމަށްޓަކައި ބާ ކައުންސިލަށް އާމްދަނީ ހޯދޭނެ އިތުރު ގޮތްތައް ވެސް ބަޔާންކޮށްފަ އެވެ.
އެގޮތުން، ގާނޫނީ ވަކީލުން ދައްކާ ޗަންދާ އާއި ގާނޫނީ ވަކީލުކަމުގެ ހުއްދަ ދޫކުރުމާއި ހުއްދަ އާކުރުމާއި ސެޓްފިކެޓް އަލުން ހެއްދުންފަދަ ކަންކަމުން ނެގޭ ފީ އިން ކައުންސިލަށް އާމްދަނީ ހޯދޭނެ ކަމަށް ބަޔާންކޮށްފައިވެ އެވެ.
މި ދެ ބިލަށް މަޖިލީހުގެ މިއަދުގެ ޖަލްސާގައި ވަކިވަކިން ވޯޓަށް އެހިއިރު، ދެ ބިލު ވެސް ފާސްކޮށްފައިވަނީ ވޯޓުގައި ބައިވެރިވި ހުރިހާ މެންބަރުންގެ އިއްތިފާގުންނެވެ.
