އައިޖީއެމްއެޗްގައި މަސައްކަތް ކުރި ނަރުސް މޭރީ ގްރޭސް މަރާލިކަމުގެ ތުހުމަތު ރައްދުވާ އޭނާގެ ފިރިމީހާ މާވިން އެސްވައި އާއި ފިރިމީހާގެ ލޯބިވެރިޔާ ހަލީމަތު ލަމްހާގެ މައްޗަށް ހިންގާ ޝަރީއަތުގެ ހެކިބަސް ނެގުމުގެ މަރުހަލާ ސިއްރުނުކޮށް މި މަހުގެ 31 ވަނަ ދުވަހު އެ މަރުހަލާ ފެށުމަށް ނިންމައިފި އެވެ.
އުމުރުން ހަތަރު އަހަރުގެ ކުޑަ އަންހެން ކުއްޖެއް ވެސް ހުންނަ ގްރޭސް މަރާލީ އޮކްޓޯބަރު 19، 2021 ގަ އެވެ. ގްރޭސްގެ މަރު ރިޕޯޓްކޮށް، ހަށިގަނޑު ހޮސްޕިޓަލަށް ގެންދިޔައީ ވެސް މާވިން އެވެ. މާވިން ބުނީ އޭނާއަށް ގްރޭސް ފެނުނީ ދަންޖެހި އަމިއްލައަށް މަރުވެފައި ހުއްޓާ ކަމަށެވެ.
ނަމަވެސް ފުލުހުންގެ ތަހުގީގުން ގްރޭސް މަރާލި ކަމަށް ބެލެވިގެން މާވިން އާއި އޭނާގެ ލޯބިވެރިޔާ ލަމްހާއަށް ދައުވާކޮށް މިހާރު ކްރިމިނަލް ކޯޓުގައި ކުރިއަށް ގެންދާ ޝަރީއަތުގައި މިއަދު ހަމަޖެހިފައި އޮތީ ދައުލަތުން ހުށަހަޅާފައިވާ ހެކިންގެ ހެކިބަސް ނަގަން ފެށުމެވެ.
އަޑުއެހުން ފެށުމާއެކު، ލަމްހާގެ ވަކީލު އަހުމަދު ޔާމީން ވިދާޅުވީ ހެކިބަސް ނެގުމުގެ މަރުހަލާ ސިއްރު ކޮށްދޭން އެދިފައިވަނީ ޖިނާއީ އިޖުރާއަތުގެ ގާނޫނުގެ ދަށުންނެވެ. އެއީ އަޑުއެހުން ހާމަކޮށް ކުރިއަށް ގެންގޮސްފިނަމަ އަދުލުވެރިކަމަށް އަސަރުކޮށްފާނެ ކަމަށް ބުނެ ހުށަހެޅި ހުށަހެޅުމެކެވެ.
ނަމަވެސް މައްސަލަ ބައްލަވާ ގާޒީ ހުސައިންް ފާއިޒު ރަޝާދު ނިންމެވީ ހެކިބަސް ނެގުމުގެ މަރުހަލާ ސިއްރުނުކުރުމަށެވެ.
ލަމްހާގެ ވަކީލު އަބްދުﷲ ޝާއިރު ދެން އެދިވަޑައިގަތީ ދައުލަތުގެ ވަކީލުން ޝަރީއަތަށް ހާޒިރުވެފައިވާތީ ދިފާއީ ވަކީލުން ވެސް ޝަރީއަތަށް ހާޒިރުވެ ހެކިބަސް ނެގުމުގެ މަރުހަލާ ކުރިއަށް ގެންދިއުމަށެވެ. މާވިންގެ ވަކީލު އިސްމާއީލް ވެސް އެ ގޮތަށް އެދިވަޑައިގަތެވެ.
އެ ކަންކަމަށް ރިއާޔަތްކޮށް މިއަދު ހެކިބަސް ނެގުން ކުރިއަށް ނުގެންދަން ގާޒީ ނިންމެވި އެވެ. އަދި މި އޮކްޓޯބަރު މަހުގެ 31 ވަނަ ދުވަހު ހެކިބަސް ނެގުމުގެ މަރުހަލާ ފެށުމަށް ނިންމެވި އެވެ.
މޭރީ މަރާލިކަމުގެ ދައުވާ ސާބިތުކުރަން މާވިންއާއި ލަމްހާއާ ދެކޮޅަށް ވެސް ދައުލަތުން ހުށަހެޅީ އެއް ހެކިތަކެކެވެ. އެއީ ޖުމުލަ 110 ހެއްކެވެ. އޭގެ ތެރޭގައި ހިމެނެނީ 74 ޝަފައީ ހެކިންނާއި 36 ކިތާބީ ހެއްކެވެ.
މޭރީ މަރާލުމުގައި ބައިވެރިވި ކަމުގެ ދައުވާގެ އިތުރަށް އައިޖީއެމްއެޗްއިން ހުއްދަ ނަގައިގެން ނޫނީ އެ ހޮސްޕިޓަލުން ނުގެންދެވޭ ނުރައްކާތެރި ބޭސްތަކެއް ގެންދިޔަ މައްސަލަގާއި އިތުރު ދެ ދައުވާއެއް ވެސް ލަމްހާގެ މައްޗަށް އުފުލާފައިވެ އެވެ.
ހުއްދަ ނަގައިގެން ކުރަން ޖެހޭ ކަމެއް ހުއްދަ ނުނަގާ ކުރުމުގެ ދައުވާއާއި އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ދައުވާ ސާބިތު ކުރަން 11 ޝަފަހީ ހެކިންނާއި ހަތް ކިތާބީ ހެކި ހިމެނޭ ގޮތުން ޖުމުލަ 18 ހެއްކެއް ހުށަހަޅާފައިވެ އެވެ.
ދައުވާތައް ރައްދުވާ ދެ މީހުންގެ ފަރާތުން ދިފާއީ ހެކިން ވެސް ހުށަހަޅާފައިވެ އެވެ.
