މާލެ ސިޓީގެ ހެންވޭރުގެ ގެއަކުން ދުން އަރާތީ ރިޕޯޓުކުރުމުން ގޮސް ބެލިއިރު އެ ގޭގައި ދިޔައީ ބަނގުރާ ކައްކަމުން ކަމަށް ފުލުހުން ބުނެފި އެވެ.
ފުލުހުން މައުލޫމާތު ދިން ގޮތުގައި ރޯޝަނީ މަގުގައި ހުންނަ އެ ގެއިން ދުން އަރާ ކަމަށް ބުނެ މިއަދު ހެނދުނު 6:12 ގައި ރިޕޯޓު ކުރުމުން ފުލުހުން އަދި އެމްއެންޑީއެފް އިން އެކުވެގެން އެ ގެއަށް ދިޔަ އެވެ.
އަދި އެ ގޭގެ ދޮރުގައި ތެޅުމުން އެއްވެސް މީހަކު ޖަވާބު ނުދިނުމުން ބާރުގެ ބޭނުން ކޮށްގެން އެ ގެއަށް ވަދެފައިވާ ކަމަށާއި އެ ގެއަށް ވަނުމުން ދުން އަރަމުން ދިޔައީ ބަނގުރާ ކައްކަމުން ދިޔުމުގެ ސަބަބުން ކަން އެނގުނު ކަމަށް ވެސް ފުލުހުން ބުނެފައިވެ އެވެ.
އެ ގެއިން ބަނގުރާ ކެއްކުމަށް ބޭނުންކުރާ ގިނަ ސާމާނުތަކެއް ފެނިފައިވާ ކަމަށް ވެސް ފުލުހުން ބުންޏެވެ.
މި މައްސަލައިގައި މިހާތަނަށް އެއްވެސް މީހަކު ހައްޔަރުކޮށްފައިވާ ކަމެއް ފުލުހުން ހާމައެއް ނުކުރެ އެވެ. އެ ސަރަހައްދުގައި ފުލުހުން ހަރަކާތްތެރިވަމުން އަންނަ ކަމަށް އެ އިދާރާއިން ބުނެ އެވެ.
