ޑެންގީ ހުން ޖެހިގެން ރިޕޯޓުކުރާ މިންވަރު އިތުރުވެފައިވާތީ ސަމާލުވުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފި އެވެ.
އެޗްޕީއޭއިން މިއަދު ބުނީ ކޮންމެ އަހަރެއްގެ ވިއްސާރަ މޫސުމެކޭ އެއް ފަދައިން މިދިޔަ އޭޕްރިލް އިން ފެށިގެން ޑެންގީ ޖެހޭ މީހުންގެ އަދަދު އިތުރުވެފައިވާ ކަމަށެވެ. އަދި މިދިޔަ މަހަށް ވުރެ މި މަހު މިހާތަނަށް ކޭސްތައް ރިޕޯޓުކުރެވިފައިވާ މިންވަރު އިތުރުކަން ފާހަގަކޮށްފައިވެ އެވެ.
ޑެންގީ ފެތުރެނީ، ޑެންގީ ވައިރަސް ހަށިގަނޑުގައި ހިމެނޭ އަންހެން އީޑީޒް މަދިރި އިންސާނުންގެ ގައިގައި ހެފުމުންނެވެ. ގާތްގަނޑަކަށް ހަތަރު ހަފްތާގެ އުމުރުގައި އީޑީޒް މަދިރި، އިންސާނުންގެ މެދުގައި ބަލުފަތުރަމުން ދެ އެވެ.
އެޗްޕީއޭއިން ވަނީ ބަލިން ރައްކާތެރިވުމަށް މަދިރި އުފެދޭ ތަންތަން ނައްތާލުމަށާއި މަދިރިން ރައްކާތެރި ވުމަށް "މޮސްކިޓޯ ރިޕެލެންޓް" ބޭނުން ކުރުމަށް އެދިފަ އެވެ.
ކުޑަކުދިންނާއި މާބަނޑު މީހުންނާއި އުމުރުން ދުވަސްވީ މީހުންގެ އިތުރުން ބޮޑެތި ބަލިތައް ތަހައްމަލުކުރަމުން އަންނަ މީހުނަށް މި ބަލީގެ ސަބަބުން ހާލު އިތުރަށް ގޯސްވާ ކަން ފާހަގަކޮށް އެޗްޕީއޭއިން ވަނީ ތިން ދުވަހަށް ވުރެ ގިނަ ދުވަހު ހުން އަންނަ ނަމަ ނުވަތަ ޑެންގީގެ ނުރައްކާތެރި އަލާމާތެއް ފެންނަނަމަ ލަސްނުކޮށް ޑޮކްޓަރަށް ދެއްކުމަށް އެދިފަ އެވެ.
ޑެންގީގެ ނުރައްކާތެރި އަލާމާތްތަކުގެ ތެރޭގައި ހިމެނެނީ:
- ކުޑަކަމުދެވޭ މިންވަރު މަދުވުން
- މާބޮޑަށް ވަރުދެރަވުން
- ތުއްތުކުދިންނަށް ގާތުން ނުބޮވުން
- ބަނޑުގައި ރިއްސުން
- ގިނައިން ހޮޑު ލެވުން
- ހަށިގަނޑުގެ އެއްވެސް ތަނަކުން ލޭ އައުން
ޑެންގީ ޖެހިގެން ފަރުވާ ދެމުން ދިޔަ ދެ މީހަކު އިއްޔެ ވެސް ނިޔާވެފައިވެ އެވެ. އެއީ 21 އަހަރުގެ ޒުވާނެއްގެ އިތުރުން ނުވަ އަހަރުގެ ކުއްޖެކެވެ.
