ރާއްޖެއާއި ޗައިނާގެ 50 އަހަރުވީ ހާރިޖީ ގުޅުމަކީ މުޅީން ތަފާތު ދެ ނިޒާމަކާއި ތަފާތު ސަގާފަތެއް އޮންނަ ދެގައުމެއްގެ ދެމެދުގައި، ދެފަރާތަށް ފައިދާވާ ރަނގަޅު ގުޅުމެއް ބޭއްވިދާނެ ގޮތުގެ މިސާލެއް ކަމަަށް ރާއްޖޭގައި ހުންނަވާ ޗައިނާ ސަފީރު ވާން ލިޖިން މިއަދު ވިދާޅުވެއްޖެ އެވެ.
ރާއްޖެއާއި ޗައިނާއާ ދެމެދު ޑިޕްލޮމެޓިކް ގުޅުން ގާއިމްކުރިތާ 50 އަހަރު ފުރުން ފާހަގަކުރަން މީރުމާ ހޮޓަލުގައި މިއަދު ބޭއްވި ރަސްމިއްޔާތެއްގައި ވާން ވިދާޅުވީ މިދިޔަ ފަންސާސް އަހަރު، ރާއްޖެއާއި ޗަައިނާއިން މުއާމަލާތް ކޮށްފައި ވަނީ، ހަމަ ހަމަ ދެ ބައިވެރިންގެ ގޮތުގައި ކަމަށެވެ. އެއްގައުމުން އަނެއް ގައުމަށް އިހުތިރާމުކުރުމާއި އެހީތެރިވުން ވެސް އޮތީ އެ ގޮތުގައި ކަމަށް ވެސް އޭނާ ވިދާޅުވި އެވެ.
"ޗައިނާ-ދިވެހިރާއްޖެ ގުޅުން ވެފައި މިވަނީ، ތަފާތު ނިޒާމުތަކާއި ސަގާފަތްތައް އޮންނަ ގައުމުތަކުގެ ދެމެދުގައި އެކުވެރިކަމާ އެކު މުއާމަލާތްތަކާއި ދެފަރާތަށް ފައިދާކުރަނިވި ގޮތަކަށް ގުޅުން ބޭއްވުމުގެ ރަނގަޅު މިސާލަކަށް،" ވާން ވިދާޅުވި އެވެ.
އޭނާ ވިދާޅުވީ ދެގައުމުގެ ލީޑަރުންގެ އިރުޝާދާ އެކު ޗައިނާއާއި ރާއްޖޭގެ ގުޅުމަށް ފަހަކަށް އައިސް ކުރިއެރުންތައް ލިބިފައިވާ ކަމަށެވެ. ވިޔަފާރިއާއި އިގުތިސާދީ ގޮތުން އޮތް އެއްބާރުލުމުގެ ވަރަށް ރަނގަޅު ނަތީޖާތަކެއް ނެރެވިފައިވާ ކަމަށް ވެސް އޭނާ ވިދާޅުވި އެވެ.
ޗައިނާގެ އެހީތެރިކަމާ އެކު ރާއްޖޭގައި ހިންގާފައިވާ ބައެއް ބޮޑެތި މަޝްރޫއުތައް އޭގެ މިސާލުތަކުގެ ގޮތުގައި އޭނާ ދެއްކެވި އެވެ. ސިނަމާލެ ބްރިޖާއި ހައުސިން މަަޝްރޫއުތައް އޭގެ ތެރޭގައި ހިމެނުއްވި އެވެ.
ރާއްޖެ-ޗައިނާ ޑިޕްލޮމެޓިކް ގުޅުމަށް 50 އަހަރު ފުރުން ފާހަގަކުރަން މިއަދު ބޭއްވި ހަފުލާގައި، ޓޫރިޒަމް މިނިސްޓަރު ޑރ. އަބްދުﷲ މައުސޫމާއި މާލޭގެ މޭޔަރު ޑރ. މުހައްމަދު މުއިއްޒާއި ރާއްޖޭގެ އެހެން ބައެއް އޮފިޝަލުން ވެސް ބައިވެރިވެވަޑައިިގެންނެވި އެވެ.
