ކެއާ ސޮސައިޓީގެ ދަށުން ހިންގާ ކެއާ ޑިވެލޮޕްމެންޓު ސެންޓަރުގެ ޓީޗަރެއްގެ އެއް އަހަރުދުވަހުގެ މުސާރަ ސްޓެލްކޯއިން ހަމަޖައްސައިދިނުމަށް ނިންމައި މެމޮރަންޑަމް އޮފް އަންޑަސްޓޭންޑިން (އެމްއޯޔޫ) އެއްގައި ސޮއިކޮށްފި އެވެ.
މި އެމްއޯޔޫގައި ސްޓެލްކޯގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު އަހުމަދު ޝަރީފެވެ. އަދި، ކެއާ ސޮސައިޓީގެ ފަރާތުން ސޮއި ކުރެއްވީ އެ ސޮސައިޓީގެ އެގްޒެކެޓިވް ޑިރެކްޓަރު އަހުމަދު އާތިފެވެ.
ކެއާ ސޮސައިޓީއާއި އެކު ސްޓެލްކޯއިން ފަހުމުނާމާގައި ސޮއި ކުރަނީ -- ފޮޓޯ: ޓުވިޓާ
ސްޓެލްކޯގެ އިޖުތިމާއީ ޒިންމާގެ ދަށުން ސޮއި ކުރި މި އެމްއޯޔޫގެ ދަށުން ގޮތުންކެއާ ޑިވެލޮޕްމެންޓު ސެންޓަރުގައި މަސައްކަތް ކުރާ ޓީޗަރެއްގެ މުސާރަ އެއް އަހަރުދުވަހުގެ މުއްދަތަކަށް ސްޓެލްކޯއިން ކެއާ ސޮސައިޓީއަށް ދޭނެ އެވެ.
ސްޓެލްކޯއަކީ އާންމު އިޖުތިމާއީ ގިނަ ކަންތައްތަކެއްގައި މުޖުތަމައަށް ބޮޑެތި އެހީތެރިކަން ފޯރުކޮށްދެމުންދާ ކުންފުންޏެކެވެ. އެގޮތުން، މިއަހަރުގެ ޖުލައި މަހު ޑައިބެޓީސް ސޮސައިޓީގެ "ސޭވް އަ ޑައިބެޓިކް ޗައިލްޑް" ޕުރޮޖެކްޓު ވެސް އެކުންފުނިން ވަނީ ސްޕޮންސާ ކޮށްފަ އެވެ. އޭގެ އިތުރުން، އއ. އަތޮޅުގެ އަށް ރަށާއި އދ. އަތޮޅުގެ ނުވަ ރަށުގެ މަގުބައްތި އެ ކުންފުނިން ބަލަހައްޓަމުން ދެއެވެ.
ސްޓެލްކޯގެ އިޖުތިމާއީ ޒިންމާގެ ދަށުން ކުރިއަށް އޮތް ތަނުގައި ވެސް ރާއްޖޭގެ ރައްޔިތުންނަށް މަންފާ ވާނެ އެކި ކަހަލަ ކަންކަމުގައި އެހީތެރިކަން ފޯރުކޮށްދެމުން ގެންދާނެ ކަމުގެ ޔަގީންކަން އެ ކުންފުނިން ދިނެވެ.
