ޕްރޮސިކިއުޓާ ޖެނެރަލް(ޕީޖީ)ގެ އޮފީހާއި އެންޓި ކޮރަޕްޝަން ކޮމިޝަން (އޭސީސީ)އާ ދެމެދު އެހީތެރިކަން ބަދަލުކުރުމާއި، އެކުގައި މަސައްކަތްކުރުމާ ގުޅޭ އެއްބަސްވުމެއްގައި ސޮއިކޮށްފި އެވެ.
ޕީޖީ އޮފީހުގައި މިއަދު އޮތް ރަސްމިއްޔާތެއްގައި އެ އެއްބަސްވުމުގައި އެ އޮފީހުގެ ފަރާތުން ސޮއިކުރެއްވީ ޕްރޮސިކިއުޓާ ޖެނެރަލް ހުސައިން ޝަމީމެވެ. އޭސީސީގެ ފަރާތުން ސޮއިކުރެއްވީ އެ ކޮމިޝަންގެ ރައީސް އާދަމް ޝާމިލެވެ.
ދެ މުއައްސަސާގެ މައްޗަށް ގާނޫނުއަސާސީއާއި ގާނޫނުން މަތިކޮށްފައިވާ ޒިންމާތައް އަދާކުރުމުގައި، ގުޅިގެން މަސައްކަތް ކުރެވިދާނެ ދާއިރާތައް ކަނޑައަޅައި، އެ ކަންކަމުގައި އެކުގައި މަސައްކަތް ކުރެވިދާނެ ގޮތްތަކާ މެދު އެއްބަސްވެވިފައިވާ ކަމަށް ޕީޖީ އޮފީހުން ބުނެފައިވެ އެވެ.
އޭގެ ތެރޭގައި ކޮރަޕްޝަން ހުއްޓުވުމަށްޓަކައި ގުޅިގެން މަސައްކަތްކުރުމާއި، ފަންނީ އެހީތެރިކަން ދިނުން ހިމެނެއެވެ.
އޭސީސީން ތަހުގީގު ކުރާ މައްސަލަތައް އެ އޮފީހަށް ހުށަހެޅުމުގައި އަމަލު ކުރާނެ ގޮތްތަކުގެ އިޖުރާއީ ތަރުތީބުތަކާއި، މައްސަލަތަކުގައި އަވަހަށް ގޮތް ނިންމުމާއި، ކޯޓަށް ހުށަހެޅޭ ކޮރަޕްޝަންގެ މައްސަލަތަކާ ގުޅޭ މައުލޫމާތު ވަކި ހަމައަކުން އޭސީސީ ހިއްސާ ކުރަމުން ދިއުމަށް ވެސް އެ އެއްބަސްވުމުގައިވެ އެވެ.
ކޮރަޕްޝަންގެ މައްސަލަތައް ތަހުގީގު ކުރުމާއި، ދައުވާ ކުރުމުގެ ކަންކަން މިހާރު ވެސް ކުރިއަށްދަނީ ދެ މުއައްސަސާ ގުޅިގެން ކަމަށް ޕީޖީ އޮފީހުން ބުންޏެވެ.
އެ ގޮތުން ތަހުގީގު ކުރިއަށްދާ މައްސަލަތަކުގައި ޕީޖީ އޮފީހުގައި ގާއިމުކޮށްފައިވާ ޑިއުޓީ ޕްރޮސިކިއުޝަން ނިޒާމުގެ ތެރެއިން މިހާރު ވެސް އޭސީސީގެ ތަހުގީގުތަކަށް ބޭނުންވާ ލަފައާއި އިރުޝާރު ދެމުންދާ ކަމަށް ޕީޖީ އޮފީހުން ބުންޏެވެ.
މިއަދު ސޮއިކުރި އެއްބަސްވުމުގެ މަގުސަދަކީ އެ ކަން އިތުރަށް ހަރުދަނާކޮށް، ދެމެހެއްޓެނިވި ގޮތެއްގައި މި މަސައްކަތް ކުރުމަށް މަގުފަހިކުރުން ކަމަށް ޕީޖީ އޮފީހުން ބުންޏެވެ.
