ހުޅުމާލެ ފޭސް 2ގައި ފަސް ވަނަ ސްކޫލެއް އަޅަން 241.5 މިލިއަން ރުފިޔާއަށް ސަރުކާރުން މިއަދު ބަޔަކާ ހަވާލުކޮށްފި އެވެ.
ކޮންޓްރެކްޓާ ފައިނޭންސް އުސޫލުން، އެ ސްކޫލު އަޅަން ހަވާލުކުރީ އަޒްރޯވާ މޯލްޑިވްސް ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކާއި އެޑްވާޑް އެންޑް ކްރިސްޓީ ނަމަކަށް ކިޔާ ކުންފުންޏެއް ގުޅިގެން އުފައްދާފައިވާ ޖޮއިންޓް ވެންޗާ (ޖޭވީ) އަކާ އެވެ.
އެ މަސައްކަތުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ އެޑިއުކޭޝަން މިނިސްޓަރު ޑރ. އައިޝަތު އަލީ އެވެ. ޖޭވީގެ ފަރާތުން ސޮއިކުރެއްވީ ޑިރެކްޓަރު މުހައްމަދު ހައިޝަމެވެ.
އެޑިއުކޭޝަން މިނިސްޓްރީން މިއަދު ބުނި ގޮތުގައި ޕްރީސްކޫލުން ފެށިގެން ގްރޭޑް 10 އަކާ ހަމައަށް ކިޔަވައިދޭ ގޮތަށް އަޅާ އެ ސްކޫލްގައި 54 ކްލާސްރޫމަކާއި މަލްޓިޕާޕާސް ހޯލެއް ހުންނާނެ އެވެ.
އެ ސްކޫލްގެ މަސައްކަތް ހަވާލުކުރީ ދޮޅު އަހަރު ދުވަހުގެ ތެރޭގައި ނިންމާ ގޮތަށެވެ. އެެޑިއުކޭޝަން މިނިސްޓްރީން ބުނީ 2024 ވަނަ އަހަރުގެ އޮގަސްޓް މަހު އެ ސްކޫލުގައި ކިޔަވައިދޭން ފެށޭވަރު ވާނެ ކަމަށެވެ.
