އަންނަ ނޮވެމްބަރު މަހު ފަށާ ފުޓުބޯޅަ ވޯލްޑް ކަޕް މުބާރާތުގެ ހުރިހާ މެޗެއް އައިސް ޓީވީ އާއި ރާއްޖެ ޓީވީން ދެއްކުމަށް މީޑިއާ ނެޓާއެކު މިއަދު އެއްބަސްވުމެއްގައި ސޮއިކޮށްފި އެވެ.
ވޯލްޑް ކަޕް ދެއްކުމުގެ ހުއްދަ މިފަހަރު ލިބުނީ މީޑިއާ ނެޓަށެވެ. ރާއްޖެ ޓީވީ އާއި އައިސް ޓީވީއާއެކު މީޑިއާ ނެޓުން އެއްބަސްވުމަކަށް މިއަދު އައީ ގިނަ ބަޔަކަށް އެ މުބާރާތް ބެލުމަށް މަގުފަހިކޮށްދިނުމުގެ ގޮތުންނެވެ.
"މި ފޯރިގަދަ މުބާރާތް ވީހާވެސް ގިނަ ބެލުންތެރިންނަށް ބެލޭނެ އިންތިޒާމް ހަމަޖެއްސުމުގެ ގޮތުން މި ކުންފުނިން ވަނީ އައިލެންޑް ކޮމިއުނިކޭޝަންސް އެންޑް އެންޓަޓެއިންމެންޓް ޕްރައިވެޓް ލިމިޓެޑްގެ 'އައިސް ޕްލަސް' އަދި ރާއްޖެ ޓެލެވިޒަން ޕްރައިވެޓް ލިމިޑެޓްގެ 'ރާއްޖެ ޓީވީ' އާއި އެކު ޕާޓްނާޝިޕް އެގްރީމެންޓްއެއްގައި ސޮއިކޮށްފަ،" މީޑިއާ ނެޓުން ނެރުނު ބަޔާނެއްގައި ބުނެފައިވެ އެވެ.
ރާއްޖެ ޓީވީ އަދި އައިސް ޓީވީން ވޯލްޑް ކަޕުގެ މެޗުތައް ބެލޭނީ މީޑިއާ ނެޓުގެ ނެޓްވޯކުގެ ތެރެއިންނެވެ. އެހެންކަމުން ޓެރެސްޓްރިއަލް ސިގްނަލް މެދުވެރިކޮށް ވޯލްޑް ކަޕެއް ނުބެލޭނެ އެވެ.
"ފުރަތަމަ ފަހަރަށް ރާއްޖެ ސަރަހައްދަށް ސައްތައިން ސައްތަ ދިވެހި ޗެނަލް ތަކަކުން މި ފޯރިގަދަ މުބާރާތް ދެއްކުމުގެ ހުއްދަ ލިބުމުގެ އުފަލާއި ޝަރަފު ތި އެންމެހާ ލޮބުވެތި ރައްޔިތުންނާއި ބެލުންތެރިންނަށް ހިއްސާކުރަން،" އެ ބަޔާނުގައި އިތުރަށް ބުނެފައިވެ އެވެ.
އޭގެ އިތުރުން، ވޯލްޑް ކަޕްގެ ކަވަރޭޖް ސްޕޮންސާ ކުރަން ބޭނުންވާ ފަރާތްތަކަށް މިހާރު އެ ފުރުސަތު ހުޅުވިފައިވާ ކަމަށް ވެސް މީޑިއާ ނެޓުން ބުންޏެވެ. އިސްތިހާރުގެ ކަންކަމާ ގުޅަންޖެހެނީ އެ ކުންފުނީގެ ނަމްބަރު 7783158 އަށެވެ.
