ވިއްސާރައިގެ ސަބަބުން ކްރިމިނަލް ކޯޓުގެ ސާވާ ރޫމްގައި ހުރި ތަކެއްޗަށް ގެއްލުންތަކެއްވެ، މިއަދުގެ ހެނދުނުގެ ސެޝަނަށް އޮންލައިންކޮށް ބާއްވަން ތާވަލުކުރި އަޑުއެހުންތައް ކެންސަލް ކުރަން ޖެހިއްޖެ އެވެ.
ކްރިމިނަލް ކޯޓު ހިންގާ ކުރީގެ އެސްޓީއޯ އިމާރާތަކީ ދުވަސްވެ ބާވެފައިވާ އިމާރާތެކެވެ. ހަތަރު ބުރީގެ އެ އިމާރާތުގެ ފާރުތަކުގައި ރެނދު އަޅާފައިވާއިރު ވިއްސާރަ ދުވަސްދުވަހު ސީލިންގުން ފެން ފޭބުން ފަދަ ކަންކަން ދިމާވެ އެވެ. މިއަދު ކޯޓުގެ ބައެއް ތަކެއްޗަށް ވެސް ގެއްލުން ލިބިފައިވާ ކަން ކޯޓުން ބުނެފައިވެ އެވެ.
"ވިއްސާރައިގެ ސަބަބުން ކޯޓުގެ އިމާރާތުގެ ތެރެއަށް ފެން ވަދެ، މި ކޯޓުގެ ސާވާ ރޫމަށް ފެނުގެ އަސަރު ކުރުމާ ގުޅިގެން ސާވާ ރޫމުގެ ކަރަންޓް ކޭބަލްތަކާއި ނެޓްވޯކް ކޭބަލްތަކަށް ގެއްލުންތަކެއް ލިބިފައިވޭ،" ކްރިމިނަލް ކޯޓުގެ މީޑިއާ އޮފިޝަލް ނޫސްވެރިންނަށް ހިއްސާކުރި މެސެޖްގައިވެ އެވެ.
ކްރިމިނަލް ކޯޓުގެ ސާވާ ރޫމްގެ ތަކެއްޗަށް ލިބުނު ގެއްލުންތަކާ ގުޅިގެން މިއަދުގެ ހެނދުނަށް ތާވަލުކުރެވިފައިވާ މައްސަލަތަކުގެ ތެރެއިން ވީޑިއޯ ކޮންފަރެންސްކޮށް ހިންގުމަށް ތާވަލުކުރެވިފައިވާ ހުރިހާ އަޑުއެހުމެއް ކެންސަލް ކޮފައިވާ ކަމަށް މީޑިއާ އޮފިޝަލް ފޮނުއްވި މެސެޖްގައިވެ އެވެ.
އެހެން ނަމަވެސް ކޯޓަށް ހާޒިރުވެގެން ހިންގުމަށް ތާވަލުކުރެވިފައިވާ އަޑުއެހުންތައް ކުރިޔަށް ދާނެ އެވެ.
ކްރިމިނަލް ކޯޓު މިހާރު ހިނގަމުންދާ އިމާރާތް ރައްކާތެރި ނޫން ކަމަށް ގެޑޯ ޕްރައިވެޓް ލިމިޓެޑްގެ ފަރާތުން ތައްޔާރުކުރި ރިޕޯޓެއްގައި ޖޫން 17، 2021 ގައި ފާހަގަކޮށްފައިވެ އެވެ. އެ ފަހުން މިހާތަނަށް ވެސް އެ ކޯޓު ހިންގާ އިމާރާތް ބަދަލުކޮށްފައެއް ނުވެ އެވެ.
ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އިން އެންމެ ފަހުން މައުލޫމާތު ދިން ގޮތުން، ކޯޓު ކޮމްޕްލެކްސްގެ އިމާރާތް ނިމެންދެން ކްރިމިނަލް ކޯޓު ހިންގާނެ ތަނެއް ހޯދަން އެކި ދުވަސް މަތިން މަސައްކަތްތަކެއް ވަނީ ކޮށްފަ އެވެ.
އެންމެ ފަހުން އެޗްޑީސީއާއެކު ކުރި މަޝްވަރާތަކުގެ ތެރެއިން، ހުޅުމާލޭން ފަސް އަހަރުގެ މުއްދަތަކަށް ނުވަތަ ކޯޓު ކޮމްޕްލެކްސް ނިމެންދެން އަކަފޫޓަކަށް ފަސް ރުފިޔާގެ ރޭޓުން 6275.25 އަކަފޫޓުގެ ބިމެއް ކުއްޔަށް ދެވިދާނެ ކަން އެޗްޑީސީން އަންގާފައިވެ އެވެ. އަދި އެ ބިމުގައި ހަދަން ހުއްދަ ދީފައިވާ އިމާރާތް ބިނާ ކުރަން ޖެހޭނީ ވެސް ޑީޖޭއޭގެ ބަޖެޓުން ކަމަށް އެޗްޑީސީން ވަނީ އަންގައިފަ އެވެ.
ނަމަވެސް, ޑީޖޭއޭގެ ބަޖެޓަކީ އެންމެ އެކަށީގެންނުވާ ބަޖެޓެއް ކަމެއް އަބަދުވެސް އެތަނުން ބުނެ އެވެ. އެ ތަނަށް އޮތީ ބަޖެޓްގެ ދަތިކަން ދިމާވެފަ އެވެ. އެހެންވެ, އަމިއްލަ ހަރަދުގައި އިމާރާތެއް ބިނާ ކުރުމަކީ ޑީޖޭއޭއަށް ގޮންޖެހުމަކަށްވާނެ އެވެ.
ކްރިމިނަލް ކޯޓު އެންމެ ފުރަތަމަ ހިންގީ ޖަސްޓިސް ބިލްޑިންގަ އެވެ. އެސްޓީއޯގެ ކުރީގެ އިމާރާތަށް ބަދަލުކުރީ 2015 ވަނަ އަހަރު އެވެ.
