މި ސަރުކާރުގެ ފުރަތަމަ 100 ދުވަހުގެ ވައުދުގެ ތެރޭގައި ހިމެނޭ "ޒީރޯ ޓޮލަރެންސް ޓު ކޮރަޕްޝަން" ސިޔާސަތުގެ ދަށުން ކޮރަޕްޝަންގެ މައްސަލަތައް ހުށަހަޅަން އުފެއްދި ވެބްޕޯޓަލް މެދުވެރިކޮށް ހުށަހެޅުނު ޝަކުވާތަކުގެ ތެރެއިން، އެންޓި ކޮރަޕްޝަން ކޮމިޝަން (އޭސީސީ)އަށް ފޮނުވި މައްސަލަތަކުގެ ތެރެއިން ދެ މައްސަލާގައި ދައުވާކުރަން ފޮނުވާފައިވާ ކަމަށް އެ ކޮމިޝަނުން ބުނެފި އެވެ.
ހިޔާނާތް ހުއްޓުވުމުގެ ކެމްޕޭނެއް ލޯންޗުކޮށް، ހިޔާނާތާގުޅޭ ޝަކުވާ ހުށަހަޅަން، ވިސިލްބްލޮއާ ޕޯޓަލް އެއް ތައާރަފުކުރީ 2019 ވަނަ އަހަރުގެ ފެބްރުއަރީ މަހުގެ ތެރޭގަ އެވެ.
މައުލޫމާތު ހޯދާ ލިބިގަތުމުގެ ހައްގުގެ ދަށުން ރައީސް އޮފީހުން ހިއްސާކޮށްފައިވާ މައުލޫމާތުތަކަށް ބަލާއިރު، މިދިޔަ ޖުލައި މަހުގެ ނިޔަލަށް އެ ޕޯޓަލް މެދުވެރިކޮށް ޖުމްލަ 1،011 ޝަކުވާ ވަނީ ހުށަހަޅައިފަ އެވެ.
އޭގެ ތެރެއިން ބައެއް މައްސަލަތައް ތަހުގީގުކުރަން އޭސީސީއަށް ފޮނުވިފައިވާ ކަމަށް ރައީސް އޮފީހުން ބުނެފައިވެ އެވެ.
އެކަމާ ގުޅޭގޮތުން "އަދަދު" އިން ސުވާލުކުރުމުން، އޭސީސީން ހިއްސާކޮށްފައިވާ މައުލޫމާތަކުން ދައްކާ ގޮތުގައި، މިދިޔަ ބުރާސްފަތި ދުވަހުގެ ނިޔަލަށް ޕޯޓަލްއިން ހުށަހެޅުނު މައްސަލަތަކުގެ ތެރެއިން ޖުމްލަ 310 މައްސަލަ އެ ކޮމިޝަނަށް ވަނީ ފޮނުވައިފަ އެވެ.
އޭގެ ތެރެއިން 299 މައްސަލަ ބަލަން ނިންމާފައިވާއިރު، ޖުމްލަ 100 މައްސަލަ އިތުރަށް ތަހުގީގުކުރަންޖެހޭ ތަނެއް ނެތް ކަމަށް ވަނީ ނިންމައިފަ އެވެ.
އަދި 147 މައްސަލައެއް އިތުރަށް ތަހުގީގުކުރަން ނިންމާފައިވާއިރު، އޭގެ ތެރެއިން ތަހުގީގު މަރުހަލާ ނިމިފައިވަނީ 22 މައްސަލާގައި ކަމަށް ކޮމިޝަނުން ބުންޏެވެ.
އޭސީސީން އިތުރަށް ބުނީ އެ 22 މައްސަލައިގެ ތެރެއިން 20 މައްސަލަ ކޮރަޕްޝަންގެ ކުށެއް ނެތް ކަމަށް ތަހުގީގުން ހޯދިފައިވާއިރު، ބާކީ ދެ މައްސަލަ ހިޔާނާތުގެ ދައުވާކުރަން ޕްރޮސެކިޔުޓާ ޖެނެރަލް (ޕީޖީ) އޮފީހަށް ފޮނުވިފައިވާ ކަމަށެވެ.
