ހަދަމުންދިޔަ އިމާރާތަކަށް އަރުވަމުންދިޔަ ދަގަނޑުތަކަކުން އެނބުރި ދަގަނޑެއް ވެއްޓި، މަސައްކަތު މީހެއްގެ ހަށިގަނޑަށް ހެރުނު މައްސަލައާ ގުޅިގެން، މަސައްކަތްތެރިންގެ ރައްކާތެރިކަން ކަށަވަރު ކުރުމަށް ވިޔަފާރިވެރިން އަދި ކަމާ ގުޅޭ އެންމެން މަސައްކަތްކޮށްދިނުމަށް އޭޑީކޭ ހޮސްޕިޓަލުން މިއަދު އިލްތިމާސްކޮށްފި އެވެ.
ސެޕްޓެމްބަރު 17، ގައި ހ. ޒާހަމްގައި މަސައްކަތް ކުރަނިކޮށް ހަ ފޫޓުގެ ދަގަނޑެއް ހެރުނީ ރަޝީދް ކާޕެންޓްރީ އެންޑް ކޮންސްޓްރަކްޝަން (އާރްސީސީ) ގެ އުމުރުން 34 އަހަރުގެ ބަންގްލަދޭޝްގެ މުވައްޒަފެއްގެ ހަށިގަނޑަށެވެ. އެ މައްސަލައާ ގުޅިގެން ވާހަކަ ދައްކަވަމުން އޭޑީކޭގެ މެނޭޖިން ޑައިރެކްޓާ އަހުމަދު އަފްއާލް ވިދާޅުވީ، ކޮންސްޓްރަކްޝަން އަދި އެހެނިހެން މަސައްކަތުގެ ދާއިރާތައް ވެސް ހިމެނޭ ގޮތަށް ރާއްޖޭގައި މަސައްކަތް ކުރާ ސައިޓުތަކުގެ ސަލާމަތީ ކަންކަން ވަރަށް ރަނގަޅު ކުރަންޖެހޭ ކަމަށެވެ.
"އަޅުގަނޑުގެ އިލްތިމާސަކީ މިފަދަ ކަންކަމުގައި އިސްކޮށް އުޅުއްވާ ހުރިހާ ބޭފުޅުން ވެސް، އެ ބޭފުޅުން ދިރިއުޅުއްވަން ހޯއްދަވާ އެ އާމްދަނީ ހޯއްދެވުމުގައި، އެހެން ހުރިހާ ފަރާތްތަކެއްގެ ރައްކާތެރިކަން އިސްކަމެއްގެ ގޮތުގައި ބައްލަވައިގެން އެކަމަށް ސަމާލުކަން ދެއްވައި، އެމީހުންގެ ދިރިއުޅުން ހޯދައިދޭން މަސައްކަތް ކުރާ މީހުންގެ ދިރިއުޅުން ދުޅަހެޔޮ، ރަނގަޅު އަނިޔާއިން ރައްކާތެރިވެގެންވާ ދިރިއުޅުމަކަށް ހައްދަވައިދެއްވާށޭ،" މި ނޫހުން ކުރި ސުވާލަކަށް ޖަވާބުދެއްވަމުން އަފްއާލް ވިދާޅުވި އެވެ.
މަސައްކަތްތެރިޔާގެ ހަށިގަނޑަށް ދަގަނޑު ވަދެފައި އިން ގޮތް ދައްކުވައިދޭ އެނިމޭޝަނެއް: އޭނާގެ ހާލު މިހާރު ރަނގަޅު -- ފޮޓޯ: އަބްދުﷲ އިޔާން/އަދަދު
އާރްސީސީ ސައިޓުގައި ހިނގި އެކްސިޑެންޓު ހިނގީ، ވައިގޮޅިން އިމާރާތުގެ ހަ ވަނަ ބުރިއަށް އަރުވަމުންދިޔަ ދަގަނޑުތައް ވެއްޓުނު އަޑަށް އެ ގޮޅިއަށް މަސައްކަތްތެރިޔާ ބޯ ދިއްކޮށްލި ވަގުތެވެ. ހެލްމެޓާއި ސޭފްޓީ ބޫޓަށް އަރައިގެން ހުރި މަސައްކަތްތެރިޔާގެ ހަށިގަނޑަށް ދަގަނޑު ވަނީ ނޭފަތުން ލައިފަ އެވެ.
އޭނާގެ ހަށިގަނޑުގެ މުހިންމު ހުރިހާ ދިމާލަކުންހެން ދަގަނޑު ދަތުރުކުރި އެވެ. އެގޮތުން ދަގަނޑު އޭނާގެ ހަށިގަނޑަށް ވަނީ ނޭފަތުގެ ކަށިތައް މުގުރާލުމަށްފަހު އެވެ. ދެން އޭތި ގޮސް ތަލީގައި ޖެހި ތަލި ފުނޑާލުމަށްފަހު ކަރުގެ ފަހަތުން ޖެހުނީ މައިބަދައިގަ އެވެ. މައިބަދައިގެ ފުރަތަމަ ތިން ބަދައަށް ދަގަނޑުން ގެއްލުންވި އެވެ. އެ ހިސާބުން ތިރިއަށް ދަގަނޑު ދަތުރު ކުރަމުން، ފުއްޕާމޭގެ އެއް ބައިގައި ޖެހުމަށްފަހު އޭގެ ތިރިން އިންނަ ޑަޔަފްރަމް މަސްގަނޑާއި ބަނޑުގެ މަސްގަނޑުގެ ފޫއަޅުވާލުމަށްފަހު ގޮސް މައިތިރިވީ އުކުޅުވަޅުގެ ކަށިގަނޑުގައި ޖެހުމުންނެވެ.
ގެއްލުންވި މަސައްކަތްތެރިޔާއާ ގުޅޭ ގޮތުން ވާހަކަ ދައްކަވަމުން އަފްއާލް ވިދާޅުވީ އޭނާގެ ފުރާނަ ސަލާމަތް ކުރެވުނީ ގިނަ ބަޔަކު ކުރި މަސައްކަތާއި ނަސީބާއި ﷲގެ ވާގިފުޅާއެކު ކަމަށެވެ. އަދި ކޮންމެ ފަހަރަކު އެގޮތަށްނުވާނެކަން އޭނާ ފާހަގަ ކުރެއްވި އެވެ. އެހެންކަމުން އެކްސިޑެންޓެއްނުވާނެ ގޮތަށް ހުރިހާ އިންޑަސްތްރީއެއްގެ ކަންކަން ރަނގަޅު ކުރަންޖެހޭ ކަމަށް އަފްއާލް ވިދާޅުވި އެވެ.
"އަޅުގަނޑުމެން އެންމެން އެބަ މަސައްކަތްތަކެއް ކުރަންޖެހޭ އެބަ ހާއްސަކޮށް ކޮންސްޓްރަކްޝަން ދާއިރާ ފަދަ ކަންކަމުގައި ރައްކާތެރިކަން ގާއިމް ކުރުމަށް. މިހެން ދިމާވާ ކޮންމެ ފަހަރަކީ އޭގައި ވަރަށް ބޮޑަށް ނަސީބަކާއި މާތް ﷲގެ ވާގިފުޅާއި އަޅުގަނޑުމެންގެ މަސައްކަތާ މި ހުރިހާ ކަމެއް އެކުލެވިގެންވާ ކަމެއް،" އޭނާ ވިދާޅުވި އެވެ. "ކޮންމެ ފަހަރަކު، އަޅުގަނޑުމެން ކުރާ މަސައްކަތް އެންމެ އެކަށީގެންވާ ގޮތަށް، ނަތީޖާ ނުނެރެވިދާނެ. އެހެންވެސް ވާނެ."
މަސައްކަތު މީހާގެ ހަށިގަނޑަށް ދަގަނޑު ވަދެފައި އިންދާ ނަގާފައިވާ ސްކޭނެއް: ވަރަށް ބޮޑަށް ދަގަނޑު ވަން ނަމަވެސް މުހިންމު ނާރުތަކާއި ގުނަވަންތަކަށް ގެއްލުމެއް ނުލިބޭ -- ފޮޓޯ: އަބްދުﷲ އިޔާން/އަދަދު
އަފްއާލް ވިދާޅުވީ ކޮންސްޓްރަކްޝަން ފަދަ މަސައްކަތް ކުރާ ތަންތަނުގައި ބަހައްޓަންޖެހޭނީ އެންމެ ވަރުގަދަ އުސޫލުތައް ކަމަށެވެ. އަދި އެފަދަ ރަނގަޅު ސަލާމަތީ މިންގަނޑުތަކާއި އުސޫލުތައް މިހާރު ރާއްޖޭގައި އެކުލަވާލާފައި އޮތް ނަމަވެސް އެއަށް އަމަލު ނުކުރެވޭކަން އޭނާ ފާހަގަ ކުރެއްވި އެވެ.
"ކޮންސްޓްރަކްޝަން މަސައްކަތް ކުރާ ފަރާތްތައް ހިމެނޭ ޖަމިއްޔާއިން ވަރަށް ތަފްސީލު ސޭފްޓީ ސްޓޭންޑާޑްސްތަކެއް ގާއިމްކޮށް އެކަން ކުރުމަށް ހުރިހާ ކޮންސްްޓްރަކްޝަން ކުންފުނިތަކަށާއި އެފަދަ މަސައްކަތް ކުރާ ފަރާތްތަކަށް އަންގާފައިވާތާ މިހާރު އަށް ވަރަކަށް އަހަރުވެއްޖެ،" އަފްއާލް ވިދާޅުވި އެވެ. "ދިވެހިރާއްޖޭގައި މަސައްކަތްތައް ކުރާ ތަންތަނުގެ ސަލާމަތީ ކަންކަން ވަރަށް ބޮޑަށް ވަރުގަދަކޮށް، އެ ވާހަކަ އެބަ ދައްކަންޖެހޭ."
އޭޑީކޭގެ މެނޭޖްމަންޓުގެ ފަރާތުން އަފްއާލް އެދިވަޑައިގަތީ މަސައްކަތްތެރިންގެ ރައްކާތެރިކަން ކަށަވަރު ކުރުމަށް ކަމާގުޅޭ އެންމެން ގުޅިގެން މަސައްކަތް ކުރުމަށެވެ.
"ސިއްހީ ހިދުމަތްތައް ދޭ ފަރާތްތަކުގެ ވެސް ވަރަށް ބޮޑު އިލްތިމާސެއް، [މަސައްކަތް ކުރާ ތަންތަނުގެ ސަލާމަތީ ކަންކަން ރަނގަޅު ކުރުން] މިއީ އަޅުގަނޑުމެން ކުރަންޖެހޭ ކަމެއް. މިފަދަ ކަންކަން ދިމާވިޔަނުދިނުމަށް ވަރަށް ބައިވަރު މަސައްކަތް ކުރަންޖެހޭ،" އޭނާ ވިދާޅުވި އެވެ.
އާރްސީސީގެ މަސައްކަތްތެރިޔާގެ ފުރާނަ ސަލާމަތްވީ އޭޑީކޭ ހޮސްޕިޓަލުން ގާތްގަނޑަކަށް ނުވަ ގަޑިއިރުވަންދެން ކުރި ސިލްސިލާ ސާޖަރީތަކަކަށްފަހެވެ. މިހާރު އޭނާ ހޮސްޕިޓަލުގައި އޮންނަތާ 11 ދުވަސްވެފައިވާއިރު ހިނގާބިނގާވެ، ވާހަކަ ދައްކާ ހެދެ އެވެ. އަދި ޑޮކްޓަރުން ވިދާޅުވީ ކުރިމަގުގައި ވެސް އޭނާއަކީ މަސައްކަތުގެ އެކި ދާއިރާތަކުގައި އުޅެވޭނެ މީހެއް ކަމަށެވެ.
