ބަދުއަހުލާގީ އަމަލުތައް ގިނަވުމަކީ މިއަދު ރާއްޖެއަށް ކުރިމަތިވެފައިވާ އެންމެ ބޮޑު އެއް ނުރައްކާ ކަމަށާއި އެކަމުން ސަލާމަތް ވުމަށް މިހާރު އޮތް ގާނޫނު ޒަމާނާ ގުޅޭ ގޮތަށް ބަދަލު ކުރަން ޖެހޭ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެ އެވެ.
މިފަދަ އަމަލުތައް ސޯޝަލް މީޑިއާގެ ޒަރީއާއިން ފެތުރުން ހުއްޓުވުމަށް ގާނޫނީ އޮނިގަނޑެއް ވުޖޫދު ކުރަން ޖެހޭ ކަމަށް މީގެ ކުރިން އިމްރާން ކުރެއްވި ޓްވީޓެއްގައި ވިދާޅުވެފައިވެ އެވެ. ނަމަވެސް މިފަދަ މަންޒަރުތައް ފެތުރުމަކީ ގާނޫނުލްއުގޫބާތުގެ ތެރެއިން މިހާރު ވެސް ކުށެކެވެ.
"މިކަމަށް ސީދާ ވަކި ގާނޫނެއް ގެންނަ ވާހަކައެއް ނޫން، މިހާރު އޮތް ގާނޫނަކީ 70ގެ އަހަރުތަކުގެ ގާނޫނެއް، އެހެންވީމާ އެ ގާނޫނަށް އަޅުގަނޑުމެންގެ ތެރެއިން އިތުރަށް މި ޒަމާނުގެ ހާލަތަށް ގުޅުވާ ސާފުކުރަން ޖެހޭ ގިނަ ބައިތަކެއް އެބަހުރި،" މި ނޫހަށް ދެއްވި އިންޓަވިއުއެއްގައި އިމްރާން ވިދާޅުވި އެވެ.
އިމްރާން ވިދާޅުވި ގޮތުގައި މި ގާނޫނަށް ގެންނަ ބަދަލުތަކުގެ ދަށުން ހަދާ ގަވައިދުތަކުން މި ކަން އިތުރަށް ހަރުކަށިކޮށް، ފިޔަވަޅު އެޅޭނެ ފަހިގޮތްތަކެއް ހޯދަން ޖެހޭ ކަމަށެވެ.
ޒަމާނަށް އައިސްފައިވާ ބަދަލާއެކު ބައެއް ގަވައިދުތަކުގައި ވެސް ފުށުއެރުންތަކެއް ހުރިކަން އިމްރާން ފާހަގަކުރެއްވި އެވެ.
"ޓެކްނޮލޮޖީއަށް އައިސްފައި މިވާ ބަދަލުތަކުން މި ދާއިރާއަށް އައިސްފައި ހުރި ބަދަލުތަކާ ފައި ހަމަވާ ގޮތަށް ބަދަލުކުރަން ޖެހޭނެ ކަން އަޅުގަނޑުމެންގެ އެންމެން ވެސް ބުއްދި ގަބޫލުކުރަން ޖެހޭނެ، އޭރުގައި އޮރިޔާން ކާޑޭ ބުނީމާ އޭގެ މާނައަކީ ކޮބައިތޯ، މިއަދު އޭގެ މާނައަކީ ކޮބައިތޯ،" އިމްރާން ވިދާޅުވި އެވެ.
ދުނިޔޭގެ ބައެއް އިސްލާމީ ނޫން ގައުމުތަކުގެ މިސާލު ނަންގަވައި އިމްރާން އިތުރަށް ވިދާޅުވީ އެ ގައުމުތަކުގައި އެ ކަންކަން ހުއްޓުވުމަށް ހަދާފައިވާ ގާނޫނުތަކާއި ގަވައިދުތަކާ އެއްގޮތަށް ރާއްޖޭގެ ނިޒާމު ބަދަލުކުރަން ޖެހޭ ކަމަށެވެ.
އަދި، ގާނޫނާ ގަވައިދުތަކަށް މި ބަދަލު ގެނައުމަކީ ގުޅުން ހުރި ހުރިހާ މުވައްސަސާއެއްގެ ވެސް ޒިންމާއަކަށް ވާން ޖެހޭނެ ކަމަށާއި ގާނޫނު އިތުރަށް ފުރިހަމަ ކުރަން ޖެހޭ ކަންކަން ދެނެގަނެ، ކުރިއަށް އޮތް ތަނުގައި ހިއްސާ ކުރާނެ ކަމަށް ވެސް އިމްރާން ވިދާޅުވި އެވެ.
