މާފުށި ޖަލުގައި ޝަރީއަތް ނިމެންދެން ބަންދުކޮށްފައި ހުއްޓައި، މ. މުލި، ހުދުފިނިފެންމާގޭ، މުހައްމަދު ނަޝީދުގެ މިދިޔަ ހަފުތާގައި މަރުވި މައްސަލައިގައި މޯލްޑިވްސް ކަރެކްޝަންސް ސާވިސްގެ އިހުމާލެއް ނެތް ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެ އެވެ.
ނަޝީދު، 43، މަރުވީ އޭނާ ނޭވާ ނުލާކަން ގޮޅީގައި ތިބި އެހެން ގައިދީންތަކެއް އެންގުމުން އިތުރު ފަރުވާ ދެމުން އަންނަނިކޮށް ކަމަށް ކަރެކްޝަންސް އިން މީގެ ކުރިން ބުނެފައިވެ އެވެ. އޭނާ މަރުވުމުގައި ކަރެކްޝަންސްގެ އިހުމާލު އޮތް ކަމަށް އާއިލާއިން ތުހުމަތު ކުރެ އެވެ.
އެކަމާ ގުޅިގެން "އަދަދު" އިން ސުވާލުކުރުމުން މިނިސްޓަރު އިމްރާން ވިދާޅުވި އޭނާގެ މަރުގެ ހަބަރު ލިބުމުން މާފުށީ ޖަލުގައި ތިބި އޮފިސަރުން ހެދި ރިޕޯޓާއި އިތުރު އެހެން މެޑިކަލް ރިޕޯޓުތައް ބެއްލެވި ކަމަށެވެ.
"އެކަމުގައި އަޅުގަނޑަކަށް ކަރެކްޝަންސްގެ އިހުމާލެއް އޮތް ކަމަކަށް އަދި އެއްވެސް މީހެއްގެ ގަސްދުގައި ކޮށްފައި އޮތް އެއްވެސް އަމަލެއް ނެތް. އަޅުގަނޑު ވަރަށް ގާތުން އެކަން ބެލިން،" އިމްރާން ވިދާޅުވި އެވެ.
އިމްރާން ވިދާޅުވީ ޖަލުގައި މިހާރު ހިނގާ ކޮންމެ މަރުގެ ހާދިސާއެއްގެ ތަފްސީލް ވެސް އަންނަނީ ވަރަށް ގާތުން ބަލަމުން ކަމަށެވެ.
"އަދި އިހުމާލެއް ކަމެއް އޮވެއްޖެއްޔާ އެއާމެދުގައި އަޅަން ޖެހޭ ފިޔަވަޅު ވެސް އަޅާފައި ހުންނާނީ،" އިމްރާން ވިދާޅުވި އެވެ.
އެގޮތުން މިފަދަ ބައެއް މައްސަލަތަކުގައި ބައެއް އޮފިސަރުންނާ މެދު ފިޔަވަޅު އަޅާފައިވާ ކަން ވެސް ފާހަގަކުރެއްވި އެވެ.
މުހައްމަދު ނަޝީދަކީ މަސްތުވާތަކެތީގެ މައްސަލައެއްގައި ޝަރީއަތް ނިމެންދެން ބަންދުކޮށްފައި ހުރި މީހެކެވެ. އޭނާ ބަންދުކޮށްފައި ހުރީ 2020 ވަނަ އަހަރު ތެރޭގައި އިރުއަލިމަސް" ކިޔާ ދޯންޏެއްގައި ރާއްޖެއަށް 61 ކިލޯ މަސްތުވާތަކެތި އެތެރެކުރި މައްސަލައިގެ ތުހުމަތުގަ އެވެ.
