ފަހި ދިރިއުޅުން ކޯޕަރޭޝަން (އެފްޑީސީ) ގެ ވަޒީފާތަކަށް ބޭނުންވާ މުވައްޒަފުން ހޯދުމަށް މި މަހުގެ 21 އާ ހަމައަށް ކުރިއަށްގެންދާ ހާއްސަ އޯޕެންޑޭއެއް މިއަދު ފަށައިފި އެވެ.
އެ ކުންފުނިން ބުނާ ގޮތުގައި އިމާރާތްކުރުމުގެ ދާއިރާ އަދި އެޑްމިނިސްޓްރޭޝަންގެ ދާއިރާއިން ތަފާތު ގިނަ ފުރުސަތުތަކެއް ވަނީ ހުޅުވާލާފަ އެވެ. އެގޮތުން، ޖުމުލަ 33 ވަޒީފާއަކަށް މުވައްޒަފުން ނަގާނެ ކަމަށް އެފްޑީސީން ބުނެ އެވެ.
ޕްރޮޖެކްޓްސް އާއި ޕްލޭނިންގެ ދާއިރާއިން 21 ފުރުސަތު ހުޅުވާލާފައިވާއިރު ޕްރޮކިޔުމެންޓާއި، އިންފޮމޭޝަން ޓެކްނޮލޮޖީ އަދި ހިއުމަން ރިސޯސް އާއި މާކެޓިން އަދި އެޑްމިނިސްޓްރޭޝަން ދާއިރާއިން ވެސް ފުރުސަތުތައް ވަނީ ހުޅުވާލާފަ އެވެ.
މިއަދާއި މާދަމާ އަދި 21 ގެ ހެނދުނު 9:00 އިން ފެށިގެން މެންދުރުފަހު 2:00 އަށް ވޯކްއިން އިންޓަވިއުތައް އެފްޑީސީގެ އޮފީހުގައި ކުރިއަށްދާނެ އެވެ. އެ ކުންފުނީގެ މައި އޮފީސް ހުންނަނީ ޕޯސްޓް ބިލްޑިންގެ ހަވަނަ ފަންގިފިލާގަ އެވެ.
މި ވަޒީފާތަކަށް ކުރިމަތިލުމަށް ބޭނުންވާ މީހުން ސީވީ އާއި ސެޓިފިކެޓު އަދި އައިޑީ ކާޑު ގެންދަން ޖެހެ އެވެ.
މިއަދު ކުރިއަށްދަނީ ހިއުމަން ރިސޯސް އިންފޮމޭޝަން ޓެކްނޮލޮޖީ، އެޑްމިނިސްޓްރޭޝަން އަދި ޕްރޮކިޔުމަންޓު ދާއިރާތަކުގެ ވަޒީފާތަކުގެ އިންޓަވިއު އެވެ. އަދި، ޕްރޮޖެކްޓްސް އާއި ޕްލޭނިންގެ އިންޓަވިއުތައް ކުރިއަށްދާނީ 20 އަދި 21 ވަނަ ދުވަހު ކަމަށް އެ ކުންފުނިން ބުނެ އެވެ.
އެފްޑީސީ އަކީ ސަރުކާރުގެ ބޯހިޔާވަހިކަމުގެ މަޝްރޫއުތައް ކުރިއަށްގެންދާ ސަރުކާރުގެ ސައްތައިން ސައްތަ ހިއްސާ އޮންނަ ކުންފުންޏެކެވެ. މިވަގުތު އެ ކުންފުނީގެ ދެ ޕްރޮޖެކްޓެއްގެ ދަށުން 4،000 ހައުސިން ޔުނިޓް އެޅުމުގެ މަސައްކަތް ހުޅުމާލެ ފޭސް ދޭއްގައި ކުރިއަށްދެ އެވެ.
