އިނގިރޭސިވިލާތުގެ ރާނީ އަދި ކޮމަންވެލްތުގެ އެންމެ އިސްވެރިޔާ ކްއީން އެލިޒަބަތު ދެ ވަނަ އަވަހާރަވުމުގެ ހިތާމައިގައި ދިވެހި ގައުމީ ދިދަ ތިން ދުވަސް ވަންދެން ބައިދަނޑި އަށް ތިރި ކުރަން ރައީސް އިބްރާހިމް މުހައްމަދު ސޯލިހު މިރޭ ނިންމަވައިފި އެވެ.
ރައީސް އޮފީހުގެ ތަރުޖަމާން މިއުވާން މުހައްމަދު ވިދާޅުވީ ގައުމީ ދިދަ ތިރިކޮށްފައި ބަހައްޓާނީ މާދަމާއިން ފެށިގެން ކަމަށެވެ.
ރާނީ އެލިޒަބަތަކީ ދިވެހި ދައުލަތުގެ އެންމެ މަތިވެރި އިއްޒަތް، ނިޝާން ޣާޒީގެ ޢިއްޒަތުގެ ވެރިކަމުގެ ލަގަބު އަރުވައިފައިވާ ބޭފުޅެކެވެ.
އެ ލަގަބު އެރުވީ އެކަމަނާ 1972 ވަނަ އަހަރު ރާއްޖެ އަށް ކުރެއްވި ރަސްމީ ދަތުރުފުޅުގަ އެވެ. އެ ދަތުރުފުޅުގައި އޭރުގެ ރައީސް އިބްރާހިމް ނާސިރަށް، ރާނީ ވަނީ ކޭސީއެމްޖީގެ ލަގަބު ވެސް އަރުވައިފަ އެވެ.
މީގެ 70 އަހަރު ކުރިން، 1952 އިން ފެށިގެން އިނގިރޭސި ރަނިކަން ކުރައްވަމުން ގެންދަވި އުމުރުފުޅުން 96 އަހަރުގެ އެލިޒަބަތަކީ އިނގިރޭސި ތަހުތުގައި އެންމެ ގިނަ ދުވަހު އިންނެވި ރާނީ އެވެ.
ރާނީ އަވަހާރަވީ ސްކޮޓްލޭންޑުގެ ބަލްމޯރަލް ކާސަލްގައި ސިއްހީ ހާލުކޮޅު މޮނީޓާކޮށް ފަރުވާދެމުން ދަނިކޮށެވެ.
