އޭޝިއަން ނެޓްބޯޅަ ޗެމްޕިއަންޝިޕްގެ ދެވަނަ ބުރުގައި ފިލިޕީންސް އަތުން ބަލިވި ކަމުގައިވިޔަސް ދިވެހިރާއްޖެ ގައުމީ ޓީމުން އުއްމީދީ ކުޅުމެއް ދައްކައިފި އެވެ.
މުބާރާތުގެ ފުރަތަމަ ބުރުގެ މެޗުތައް ނިމި ދެވަނަ ބުރުގެ މެޗުތައް ފަށާފައިވަނީ އިއްޔެ އެވެ. ފުރަތަމަ ބުރުގެ ގްރޫޕް ސްޓޭޖު މެޗުތަކަށް ފަހު ހަތަރު ގްރޫޕުން އެއްވަނަ ހޯދި ހަތަރު ޓީމް ވާދަ ކުރަނީ ފައިނަލުގެ ޖާގައެއް ހޯދުމަށެވެ. ގްރޫޕުތަކުން ދެވަނަ އަށް ދިޔަ ޓީމްތަކުން ފަސް ވަނައިން ފެށިގެން އަށް ވަނަ އަށް ރޭންކިންގެ މެޗުތައް ކުޅޭނެ އެވެ. ރާއްޖެ އަށް ގަދަ އަށަކުން ޖާގަ ލިބުނު ނަމަވެސް، ފުރަތަމަ ބުރުގައި ރާއްޖެ އަށް ލިބުނީ ގްރޫޕުގެ ދެވަނަ އެވެ.
ދެވަނަ ބުރުގައި ރާއްޖެއާ އެއް ގްރޫޕެއްގައި ހިމެނެނީ ފިލިޕީންސް އަދި ބުރުނާއީ އެވެ. ފުރަތަމަ ބުރުގެ މެޗުތަކަށް ފަހު ތައިލެންޑު ވެސް މި ގްރޫޕުގައި ހިމެނުނު ނަމަވެސް، ތައިލެންޑުން ވަނީ މުބާރާތުގެ ބާކީ ހުރި މެޗުތައް ނުކުޅެ މުބާރާތުން ވަކިވާން ނިިންމާފަ އެވެ. އެހެން ކަމުން ކުރިން އޮތް ފޯމެޓަށް ބަދަލު ގެނެސް މިހާރު ރާއްޖެ ހިމެނޭ ގްރޫޕުގެ ތިން ޓީމް ކޮންމެ ޓީމެއް ކޮންމެ ޓީމަކާއި ދެކޮޅަށް ދެ ފަހަރު ކުޅޭނެ އެވެ. އޭގެ ފަހުން ޓީމްތައް އެތުރޭ ގޮތަށް ބަލައި ފަހަކުން ހަތަކަށް ރޭންކު ކުރެވޭނެ އެވެ. ކުރިން ރާވާފައި އޮތީ ރޭންކިން މެޗުތައް ފައިނަލް މެޗުތަކާއިއެކު ކުޅުމަށެވެ.
ފިލިޕީންސްއާ ދެކޮޅަށް ކުޅުނު ފުރަތަމަ މެޗުގައި ރާއްޖެ ބަލިވީ 59 ޕޮއިންޓު 41 ޕޮއިންޓުންނެވެ. މި މެޗުގައި މައިގަނޑު ގޮތެއްގައި ފެނުނީ އިސްކޮޅުގެ ތަފާތެވެ. އަދި މެޗުގެ މުހިންމު ދަނޑިވަޅުތަކުގައި ފިލިޕީންސް ޓީމުން ތަޖުރިބާގެ ބޭނުން ކުރި އެވެ. ރާއްޖޭގެ ގިނަ ޒުވާން ކުޅުންތެރިންނަށް ޕްރެޝަރު ދަނޑިވަޅުތަކުގައި މިސްޓޭކްތައް ހެދުނު ތަން ފެނުނެވެ.
މި މެޗުގައި ދިވެހި ޓީމުން އުއްމީދީ ކުޅުމެއް ދެއްކިއިރު، ފުރަތަމަ މެޗުގައި އަނިޔާވި މަރިޔަމް ރަނާ މި މެޗުގައި ކުޅުނެވެ. ރަނާ ކުޅެން ނުކުތީ މެޗުގެ ތިންވަނަ ކުއާޓާގެ ފަހުކޮޅުގަ އެވެ.
ދެވަނަ ބުރުގައި ރާއްޖެ ކުޅޭ ދެވަނަ މެޗުގައި ބުރާސްފަތި ދުވަހު ނުކުންނާނީ ބުރުނާއީއާ ދެކޮޅަށެވެ. އޭގެ ފަހުން ހުކުރު ދުވަހު އަނެއްކާ ވެސް ފިލިޕީންސްއާ ދެކޮޅަށް ކުޅޭނެ އެވެ. މުބާރާތުގައި ރާއްޖެ ކުޅޭ ފަހު މެޗުގައި އާދިއްތަ ދުވަހުގެ ހެނދުނު ނުކުންނާނީ ބުރުނާއީއާ ދެކޮޅަށެވެ.
މުބާރާތަށް ދިވެހިރާއްޖެއިން ކަނޑައެޅި އަމާޒަކީ ގަދަ އަށް ޓީމްގެ ތެރޭގައި ހިމެނި އޭޝިއަން އިންޑޯ ގޭމްސް އަށް ކޮލިފައިވުމެވެ. ފުރަތަމަ ޓާގެޓް ހާސިލްވުމާއިއެކު މިހާރުގެ އަމާޒަކީ ރޭންކު ރަނގަޅު ކުރުމެވެ.
