ގާނޫނީ ވަކީލަކު ގެންގުޅެން ޖެހޭ ސުލޫކީ މިންގަނޑާ ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ހިލާފުވެފައިނުވާނެ ކަމަށް ސުލްތާނު ޗެމްބާސް އިން މިރޭ ނެރުނު ބަޔާނެއް ބުނެފި އެވެ.
ޖަމީލް މިފަދަ ކަމެއް ނުކުރާ ކަމަށް ބުނެ ބަޔާނެއް ނެރެފައިވަނީ އޭނާގެ މައްސަލައެއް ބާ ކައުންސިލަށް ހުށަހެޅި، އެ ކައުންސިލުން އެ މައްސަލަ ބަލަން ފަށާފައި ވަނިކޮށެވެ.
އެ މައްސަލަ އަކީ، އޭނާގެ އަނބިކަނބަލުންގެ އާއިލީ ވިޔަފާރިއާ ގުޅޭ މައްސަލަތަކެއްގައި ކޯޓުގައި އެތައް ދައުވާއެއް އުފުލާފައި ވާއިރު އެއިން މައްސަލައެއްގައި ހިމެނޭ މުހައްމަދު އަނީސް މިދިޔަ މެއި މަހު ހުށަހެޅި މައްސަލައެކެވެ.
އެ މައްސަލާގައި ވަނީ ސުޕްރީމް ކޯޓުގައި ޖަމީލް ވަކާލާތު ކުރައްވަމުން އެއީ އެ ކޯޓަށް ބެލޭނެ މައްސަލައެއް ނޫން ކަމަށް ވިދާޅުވެ ފަނޑިޔާރުންނާ މުހާތަބު ކުރައްވައި ދައްކަވާފައިވާ ވާހަކަތަކުން، ވަކީލެއްގެ ސުލޫކީ މިންގަނޑާ ހިލާފުވެފައިވާ ކަމަށެވެ.
ސުލްތާން ޗެމްބާސްގެ މެނޭޖިން ޕާޓްނަރު ޑރ. ޖަމީލާ ގުޅޭ ގޮތުން ހުށަހަޅާފައިވާ އެ މައްސަލައަކީ ޒާތީ ތައައްސުބެއް އޮވެގެން ކޮށްފައިވާ ކަމަށް އެ ޗެމްބާސް އިން މިރޭ ނެރުނު ބަޔާނުގައިވެ އެވެ. އަދި އެކަމާ ދެކޮޅަށް އަޅަން ޖެހޭ ގާނޫނީ ފިޔަވަޅުތައް އަޅާނެ ކަމަށް ވެސް އޭގައިވެ އެވެ.
"މިފަދަ އަމަލުތަކަކީ މި ޗެމްބަރުގެ ވަކީލުންގެ މަސައްކަތަށް ހުރަސް އަޅައި، މި ޗެމްބަރުން ކްލަޔަންޓުންނަށް ލިބިދީފައިވާ އިތުބާރު ގެއްލުވާލުމަށް ކުރަމުންދާ މަސައްކަތެއް ކަމަށާއި، މި އަމަލުގެ ސަބަބުން މި ޗެމްބަރަށް ލިބޭ ކޮންމެ ގެއްލުމެއްގެ ބަދަލު ހޯދުމަށް އެ ފަަރާތްތަކާ މެދު ގާނޫނީ ގޮތުން އެޅެން ހުރި ފިޔަވަޅުތައް އެޅުމުގެ އިހުތިޔާރު ލިބިގެންވެ އެވެ." ބަޔާނުގައިވެ އެވެ.
މި މައްސަލާގައި ބާ ކައުންސިލުން އަދި ވަކި ގޮތެއް ނުނިންމަ އެވެ.
