އޭޝިއަން ނެޓްބޯޅަ ޗެމްޕިއަންޝިޕުގެ ގަދަ އަށަކުން ޖާގަ ހޯދައި އޭޝިއަން އިންޑޯ ގޭމްސް އަށް ކޮލިފައިވީ ޓީމެއްގެ ގޮތުގައި ހުރިހާ ކުޅުންތެރިން ކުރި ބުރަ މަސައްކަތުން ކަމަށް ގައުމީ ނެޓްބޯޅަ ޓީމްގެ ކޯޗު ނީޝާ ހަލީމް ބުނެފި އެވެ.
ސިންގަޕޫރުގައި މިހާރު ކުރިއަށްދާ އޭޝިއާ ސަރަހައްދުގެ ނެޓްބޯޅަ މުބާރާތުގައި ރާއްޖެ ވަނީ ފުރަތަމަ ބުރުގައި ކުޅުނު ދެ މެޗުގެ ތެރެއިން އެއް މެޗު ކާމިޔާބުކޮށް ގްރޫޕުގެ ދެ ވަނަ ޓީމުގެ ގޮތުގައި ދެ ވަނަ ބުރުން ޖާގަ ހޯދައިފަ އެވެ. ފުރަތަމަ ބުރުގައި ރާއްޖެ ބަލިވީ މުބާރާތް ބާއްވާ ގައުމު ސިންގަޕޫރު އަތުންނެވެ. ރާއްޖޭ މޮޅުވީ ޖަޕާން އަތުންނެވެ. މި ނަތީޖާއާ އެކު ރާއްޖެ ވަނީ އޭޝިއަން އިންޑޯ ގޭމްސް އަށް ކޮލިފައިވެފަ އެވެ.
ޖަޕާން އަތުން ހޯދި މޮޅާ ގުޅޭ ގޮތުން "އަދަދު" އަށް ވާހަކަ ދައްކަމުން ނީޝާ ބުނީ ގަދަ އަށް ޓީމުގެ ތެރޭގައި ހިމެނުމަކީ ބޮޑު ހިތްހަމަޖެހުމެއް ކަމަށާއި، ދެ މެޗަށް ބަލާއިރު ވެސް ޓީމުގެ ބައިނަލްއަގްވާމީ ތަޖުރިބާ ނެތްތަން ދެއްކި ކަމަަށެވެ.
ގައުމީ ޓީމަށް ބަލާއިރު ސީނިއާ ލެވެލްގައި ގައުމީ ޓީމަށް ކުޅެފައިތިބީ އެންމެ ދެ ކުޅުންތެރިންނެވެ. އެއީ ކެޕްޓަން އީމާ އަބްދުއްސައްތާރު އާއި ހަމްނާ އަބްދުއްރަހުމާން އެވެ. ބާކީ ތިބި 10 ކުޅުންތެރިންނަށް މިއީ އޭޝިއާގެ އެންމެ މަތީ ފަންތީގެ ފުރަތަމަ މުބާރާތެވެ.
ނީޝާ ބުނީ ޒުވާން ގިނަ ކުޅުންތެރިންތަކެއް ހިމަނައިގެން މިހާ ކުޑަ ދުވަސްކޮޅެއްގެ ތެރޭގައި މިފަދަ ކުރިއެރުމެއް ލިބުމަކީ ނެޓްބޯޅައިގެ މުސްތަގްބަލަށް ބަލާއިރު އުޖާލާ ކަމެއް ކަމަށެވެ. އޭނާ ބުނީ ދިގުރާސްތާ ޕްލޭން އަކާ އެކު މި ޓީމަށް ތަމްރީން ދީގެން ކުޅުމުގެ ފުރުސަތު ހޯދައިދެވިއްޖެ ނަމަ މި އަށް ވުރެ ރަނގަޅު ނަތީޖާއެއް ފެންނާނެ ކަމަށެވެ.
"ޖަޕާން އަތުން މޮޅުވެ ބޭނުންވި ޓާގެޓް ހާސިލްކުރެވުމަކީ ބޮޑު ހިތްހަމަޖެހުމެއް، ޓީމުގެ ތަޖުރިބާ މަދުކަން ފާހަގަކުރެވުނު، ކުރިއަށް އޮތީ ވަރުގަދަ ހަތަރު މެޗު. ވަރުގަދަ ތިން ޓީމު، މި އޮތީ ދެ ވަނަ ބުރުގައި އެއް ގްރޫޕެއްގައި. އަމާޒަކީ ރަނގަޅު ފައިޓެއް ދީ ރޭންކު ރަނގަޅު ކުރުން،" މިދިޔަ އަހަރުގެ އޮކްޓޫބަރު މަހު ގައުމީ ޓީމާއި ހަވާލުވި ކޯޗު ބުންޏެވެ.
ގައުމީ ނެޓްބޯޅަ ޓީމުގެ ކުޅުންތެރިންނާއި ކޯޗިން ސްޓާފުން ފޮޓޯއަކަށް ހުއްޓިލައިގެން.--- ފޮޓޯ: އަބްދުﷲ އިޔާން/ އަދަދު
ފުރަތަމަ ބުރުގައި ކުޅުނު ދެ މެޗަށް ބަލާއިރު، ގައުމީ ޓީމުގައި ތިބި 12 ކުޅުންތެރިންނަށް ވެސް ވަނީ ފުރުސަތު ދީފަ އެވެ. ދެ މެޗުގައި ކޮންމެ ކުޅުންތެރިއަކަށް ވެސް އެކަށީގެންވާ ވަގުތު ކުޅެން ލިބުނެވެ.
ނީޝާ ބުނީ އޭނާ އަށް ލިބޭ އެންމެ ބޮޑު ހިތްހަމަޖެހުމަކީ ބެންޗުން އަރުވާ ކޮންމެ ކުޅުންތެރިޔަކީ ވެސް ހަވާލުކުރާ ޒިންމާ އަށް އެންމެ ރަނގަޅަށް ފުރިހަމަ އަދާކުރާނެ ކުޅުންތެރިއެއް ކަމުގެ އިތުބާރު އޮތުމެވެ.
ގައުމީ ޓީމު މުބާރާތުގައި ކުޅުނު ފުރަތަމަ މެޗުގައި އަނިޔާވި މަރިޔަމް ރަނާގެ އަނިޔާއާ ބެހޭގޮތުން ކޯޗު ބުނީ އޭނާ އަށް މި މުބާރާތުގައި ބާކީ އޮތް ހަތަރު މެޗުގައި ކުޅެވޭނެ ކަމުގެ ޔަގީންކަން ނެތް ކަމަށެވެ. އަދި ޔަގީންކޮށް އެއްޗެއް ބުނަން އެނގޭނީ ދެ ދުވަސްވަރު އޭނާގެ ރިކަވަރީ އަށް ބެލުމަށް ފަހު ކަމަށެވެ.
މުބާރާތުގެ ދެ ވަނަ ބުރުގައި ރާއްޖޭ ކުޅޭ ފުރަތަމަ މެޗުގައި މިއަދު މެންދުރު ނުކުންނާނީ ފިލިޕީންސްއާ ދެކޮޅަށެވެ.
