އޭޝިއަން ނެޓްބޯޅަ ޗެމްޕިއަންޝިޕުގައި މިއަދު ޖަޕާން ބަލިކޮށް ރާއްޖޭގެ ގައުމީ އަންހެން ނެޓްބޯޅަ ޓީމު ގަދަ އަށް ޓީމުގެ ތެރޭގައި ހިމެނި އޭޝިއަން އިންޑޯ ގޭމްސް އަށް ކޮލިފައިވެއްޖެ އެވެ.
މި މަހުގެ 11 ގެ ނިޔަލަށް ސިންގަޕޫރުގައި ކުރިއަށްދާ މި އަހަރުގެ އޭޝިއަން ނެޓްބޯޅަ ޗެމްޕިއަންޝިޕަ ގިނަ ގޮތްގޮތުން ގައުމުތަކަށް މުހިންމު މުބާރާތެކެވެ. އެ ގޮތުން މުބާރާތުގެ ގަދަ އަށް ޓީމު އޭޝިއަން އިންޑޯ ގޭމްސް އަށް ކޮލިފައިވާއިރު، މުބާރާތުގެ ފައިނަލުގައި ވާދަކުރާ ދެ ޓީމަށް އަންނަ އަހަރު ސައުތު އެފްރިކާގައި އޮންނަ ނެޓްބޯޅަ ވޯލްޑް ކަޕުން ފުރުސަތު ލިބޭނެ އެވެ.
މުބާރާތުގެ ފުރަތަމަ ބުރުގައި ރާއްޖެ ކުޅުނު ދެ ވަނަ މެޗު ކާމިޔާބުކުރީ ޖަޕާންއާ ވާދަކޮށް 56-21 އިންނެވެ. ރާއްޖެ އިން މި މެޗު ފެށީ އިއްޔެ ސިންގަޕޫރު އަތުން ބަލިވި ޑިފެންޑަރު މަރިޔަމް ރަނާ ނުލަ އެވެ. އޭނާގެ ބަދަލުގައި މިއަދު ސްޓާޓް ކުރީ ވިސާހު މުހައްމަދު އެވެ.
ފުރަތަމަ ކުއާޓާ ފަށައިގެން ދެ ޓީމް ވެސް ފެނުނީ ހަމަހަމަކޮށް ކުޅުނު ތަނެވެ. 4-4 އިން ދެ ޓީމު އެއްވަރުވެފައި ވަނިކޮށް، ދިވެހި ޓީމުގެ ދެ ޑިފެންޑަރުން ކަމަށްވާ ވިސާހު އާއި އާމިނަތު ފިރުޝާ ގެ މޮޅު ކުޅުމާ އެކު ދިވެހި ޓީމަށް ކުރިއަށް ޖެހިލަން ފުރުސަތު ލިބުނެވެ. މި ދަނޑިވަޅުގައި ދެ ޝޫޓަރުން ކަމަށްވާ ކެޕްޓަން އީމާ އަބްދުއްސައްތާރު އާއި އައިޝަތު ސަލީމާ ލިބުނު ބޯޅަތައް ސްކޯކޮށް ޕޮއިންޓު ހޯދައިދީ ލީޑު ނަގައިދިނެވެ.
ފުރަތަމަ ކުއާޓާ ނިމުނީ 14-5 އިން ރާއްޖެ ކުރީގައި އޮވެގެންނެވެ.
ދެ ވަނަ ކުއާޓާ ފަށައިގެން ވެސް ރާއްޖެ ފެނުނީ އިތުބާރާ އެކު ކުޅެލިތަނެވެ. ވައިސް ކެޕްޓަން ހަމްނާ އަބްދުއްރަހުމާން އާއި މަރިޔަމް ޝިނާއަތު މިދިޔަ މެޗެކޭ އެއްގޮތަށް މި މެޗުގައި ވެސް ރަނގަޅު ކުޅުމެއް ދެއްކި އެވެ. ދެ ވަނަ ކުއާޓާ ނިމުނީ 28-7 އިން ރާއްޖެ ކުރީގައި އޮވެގެންނެވެ.
އޭޝިއަން ނެޓްބޯޅަ ޗެމްޕިއަންޝިޕުގައި ރާއްޖޭގެ މަރިޔަމް ޝިނާއަތު ޖަޕާން ކުޅުންތެރިއެއް އަތުން ބޯޅަ ހޯދަން މަސައްކަތްކުރަނީ / ފޮޓޯ: ނެޓްބޯލް ސިންގަޕޯ
ފަހު ދެ ކުއާޓާގައި ދިވެހި ޓީމުން ޓީމަށް ބަދަލުތައް ގެނައެވެ. އެ ގޮތުން ސިންގަޕޫރާއި ދެކޮޅަށް ކުޅުނު މެޗުގައި ފުރުސަތު ނުލިބުނު ދެ ކުޅުންތެރިންކަމަށްވާ އައިޝަތު ސަނާ އިބްރާހިމް އާއި ފާތިމަތު ނައުފާ އަށް މި މެޗުގައި ލިބުނު ވަގުތުކޮޅުގައި ރަނގަޅު ކުޅުމެއް ދެއްކި އެވެ.
މި މެޗުން މޮޅުވުމާ އެކު ރާއްޖެ ދެ ވަނަ ބުރުން ޖާގަ ހޯދީ ގްރޫޕުގެ ދެވަނަ ޓީމުގެ ގޮތުގަ އެވެ. ދެ ވަނަ ބުރުގައި ޓީމުތައް ބެހިފައިވާ ގޮތަށް ބަލާއިރު ރާއްޖެ ހިމެނެނީ ފިލިޕީންސް، ބުރުނާއީ އަދި ތައިލެންޑާ އެއް ގްރޫޕެއްގަ އެވެ. މި ގްރޫޕުގައި ހިމެނޭ ކޮންމެ ޓީމެއް ކޮންމެ ޓީމަކާއި ވާދަކޮށް ކުރި ލިބޭ ދެ ޓީމު ކުޅޭނީ 5 ވަނަ އާއި 6 ވަނަ ހޮވޭ މެޗެވެ. ގްރޫޕުގެ ފުލަށްދާ ދެ ޓީމް ކުޅޭނީ 7 ވަނަ އާއި 8 ވަނަ ހޮވާ މެޗެވެ.
މުބާރާތުގެ ފައިނަލަށް ދިޔުމުގެ ފުރުސަތު އޮތީ ފުރަތަމަ ބުރުގެ ގްރޫޕް ތަކުން އެއް ވަނަ ހޯދި ޓީމްތަކަށެވެ. އެއީ ހޮންގްކޮންގް، ސިންގަޕޫރު، މެލޭޝިއާ އަދި އެންމެ ފަހުގެ ޗެމްޕިއަން ސްރީ ލަންކާ އެވެ.
މި ފަހަރުގެ މުބާރާތަށް ދިޔައިރު ވެސް ނެޓްބޯޅަ ޓީމުގެ ޓާގެޓެއްގެ ގޮތުގައި ކަނޑައަޅާފައިވަނީ ގަދަ އަށް ޓީމުގެ ތެރޭގައި ހިމެނިގެން އިންޑޯ ގޭމްސް އަށް ކޮލިފައިވުމެވެ. ނެޓްބޯޅަ ޓީމުގެ ކޯޗު ނީޝާ ހަލީމް އެ ޓާގެޓް ހާސިލް މި ކުރީ ޓީމެއްގެ ގޮތުގައި ގުޅިގެން ކުރި މަސައްކަތުންނެވެ.
ދެ ވަނަ ބުރުގެ މެޗުތައް މާދަމާ ފަށާނެ އެވެ. ރާއްޖެ މާދަމާ ނުކުންނާނީ ފިލިޕީންސްއާ ދެކޮޅަށެވެ.
