އޭޝިއަން ނެޓްބޯޅަ ޗެމްޕިއަންޝިޕުގެ ފުރަތަމަ މެޗުގައި ސަރަހައްދީ ގަދަބާރު, ސިންގަޕޫރު އަތުން ރާއްޖޭގެ ގައުމީ ނެޓްބޯޅަ އަންހެން ޓީމު ބޮޑު ތަފާތަކުން ބަލިވެއްޖެ އެވެ.
ގްރޫޕް ސްޓޭޖުގެ ފުރަތަމަ މެޗުގައި ދިވެހިރާއްޖެ ސިންގަޕޫރު އަތުން ބަލިވީ 96 ޕޮއިންޓު 10 ޕޮއިންޓުންނެވެ.
މިމަހުގެ 11އާ ހަމައަށް ސިންގަޕޫރުގައި ކުރިއަށްދާ އޭޝިއާ ސަރަހައްދުގެ އެންމެ ބޮޑު ނެޓްބޯޅަ މުބާރާތުގައި 11 ގައުމަކުން ވާދަކުރެ އެވެ. އެއީ ރާއްޖެ، އިންޑިއާ، ސްރީ ލަންކާ، ފިލިޕީންސް، މެލޭޝީއާ، ސިންގަޕޫރު، ހޮންކޮން، ތައިލެންޑް، ޖަޕާން، ބުރުނާއީ އަދި ޗައިނީސް ތައިޕޭ އެވެ. މި 11 ޓީމް ހަތަރު ގްރޫޕަކަށް ބަހާލާފައިވާއިރު ރާއްޖެ ލައްވާލީ ގްރޫޕް ބީގަ އެވެ. މި ގްރޫޕުގައި ހިމެނެނީ ރާއްޖޭގެ އިތުރުން މުބާރާތް ބާއްވާ ގައުމު ސިންގަޕޫރާއި ޖަޕާން އެވެ.
އެންމެ ފަހުން ބޭއްވި އޭޝިއަން ޗެމްޕިއަންޝިޕުގެ ދެ ވަނަ ހޯދި ސިންގަޕޫރުން ރާއްޖެއާ ދެކޮޅަށް ކުޅުނުއިރު، ފުރަތަމަ ދެ ކުއާޓާ ނިންމާލިއިރު އޮތީ 47-7 އިން ކުރީގަ އެވެ. ތިން ވަނަ ކުއާޓާ އިން ފެށިގެން ދިވެހި ޓީމުން ވަނީ ޓީމަށް ގިނަ ބަދަލުތަކެއް ގެނެސް އާ ގިނަ ކުޅުންތެރިންތަކަކަށް ފުރުސަތު ދީފަ އެވެ. އޭގެ ތެރޭގައި ޓީމުގައި ހިމެނޭ އެންމެ ޒުވާން ކުޅުންތެރިޔާ 16 އަހަރުގެ އާމިނަތު އައިނީ ފާހަގަކޮށްލެވެ އެވެ. އޭނާ މެޗުގައި ރަނގަޅު ޝޫޓްތަކެއް ކޮށް، ކާމިޔާބު ވެސް ކުރި އެވެ.
މި މެޗުގައި ދިވެހި ޓީމަށް އެންމެ ބޮޑަށް މައްސަލަތައް ދިމާވީ ޓީމުގައި ހުރި އެންމެ އިތުބާރު ޑިފެންޑަރު މަރިޔަމް ރަނާގެ ފަޔަށް އަނިޔާވެ އޭނާ ބަދަލުކުރަން ޖެހުމުންނެވެ. ރަނާގެ ބަދަލުގައި ކުޅެން އެރީ ބައިނަލްއަގްވާމީ ކޯޓަކަށް ފުރަތަމަ ފަހަރަށް ނުކުތް ވިޝާހު މުހައްމަދު އެވެ.
ދިވެހި ޓީމު އަތުން މޮޅުވި ސިންގަޕޫރަކީ އޭޝިއަން ނެޓްބޯޅަ ޗެމްޕިއަންޝިޕުގެ އެންމެ ކާމިޔާބު އެއް ޓީމެވެ. މިހާތަނަށް ބޭއްވި އެއްވެސް އޭޝިއަން ޗެމްޕިއަންޝިޕެއް އެ ޓީމުން ހުސް އަތާ ނިންމާލަން ނުޖެހެ އެވެ. އަބަދު ވެސް ގަދަ ތިން ޓީމްގެ ތެރޭގައި ހިމެނެ އެވެ.
އެ ގޮތުން އޭޝިއަން ޗެމްޕިއަންޝިޕުގެ ރަން މެޑަލް ތިން ފަހަރު، ރިހި މެޑަލް ފަސް ފަހަރު، އަދި ލޯ މެޑަލް ތިން ފަހަރު އެޓީމުން ވަނީ ހޯދައިފަ އެވެ. މި މުބާރާތުގައި ދިވެހިރާއްޖެ ވާދަކުރާ ދެ ވަނަ މެޗުގައި މާދަމާ ނުކުންނާނީ ޖަޕާނާއި ދެކޮޅަށެވެ.
