ހުޅުމާލޭގައި އަލަށް މީހުން އާބާދުވި ދެވަނަ ފިޔަވަހި ސަރަހައްދުގައި މިއަދު ހުޅުވި ސުކޫލުގެ އިމާރާތް ކުރުމުގެ ފެންވަރާމެދު އަމާޒުވި ފާޑުކިޔުންތަކަށް ސަރުކާރުން ރައްދު ދީފި އެވެ.
މިއަދު، 824 ކުދިންނާއެކު ހުޅުވި ކާމިލްދީދީ ސުކޫލުގައި އެލްކޭޖީއިން ފެށިގެން ގްރޭޑު ހަޔަކާ ހަމައަށް ކިޔަވައިދޭނެ އެވެ. ވަގުތީ ގޮތުން އެ ސަރަހައްދުގައި ހުޅުވި މި ސުކޫލު އިމާރާތްކޮށްފައިވާ ގޮތާ މެދު ގިނަ ބަޔަކު މިއަދު ވަނީ ފާޑުކިޔައިފަ އެވެ.
ފާޑުކިޔުންތަކާ ގުޅިގެން އެޑިއުކޭޝަން މިނިސްޓްރީން ބުނި ގޮތުގައި އެސްޖޭ ކޮންސްޓްރަކްޝަނާ 23 މިލިއަން ރުފިޔާއަށް ހަވާލުކުރީ ދެ ޕްރީސުކޫލު އެޅުމަށެވެ. ދެ ސުކޫލު ވެސް ހަވާލުކުރީ 165 ދުވަސް ތެރޭ ނިންމާ ގޮތަށް ނަމަވެސް އޭގެ ތެރެއިން މިއަދު ހުޅުވި ސުކޫލު އަވަހަށް ނިމުމުން ކިޔަވައިދޭން ފެށީ ކަމުގައި އެޑިއުކޭޝަނުން ބުނެ އެވެ.
ޕްރީ ސުކޫލެއްގެ ގޮތުގައި އިމާރާތް ކުރެވުނު ނަމަވެސް މި ތަން މި ވަގުތަށް ބޭނުން ކުރާނީ ޕްރައިމަރީ ސުކޫލެއްގެ ގޮތުގައި ކަމަށް ވެސް މިނިސްޓްރީން ބުންޏެވެ.
"ހުޅުމާލޭ ފޭސް ދޭއްގައި ގިނަ އަދަދެއްގެ މީހުން އާބާދުވަމުން ދިއުމާ ގުޅިގެން، މި ސުކޫލު ހުޅުވާފައި މިވަނީ އެލްކޭޖީއިން ފެށިގެން ގްރޭޑު ހަޔަޔާ ހަމައަށް ކިޔަވައިދޭ ޕްރައިމަރީ ސުކޫލެއްގެ ގޮތުގައި، އަދި އެ ގްރޭޑުތަކަށް ކިޔަވައިދޭން ބޭނުންވާ ވަސީލަތްތައް ވަނީ ސުކޫލުގައި ގާއިމް ކުރެވިފައި،" މިނިސްޓްރީން ބުނެފައިވެ އެވެ.
ސަރުކާރުގެ އަމާޒަކީ ބެލެނިވެރިންނާ ދަރިވަރުންނަށް ދަތިނުވެ، އަދި ކިޔެވުން ނުގެއްލޭނެ ގޮތަކަށް ދިރާސީ އަހަރު ކުރިއަށް ގެންދިއުން ކަމަށް ވެސް ބުންޏެވެ.
ދެ ވަނަ ފިޔަވަހީގައި މިހާރު ވެސް އަންނަނީ ފައުންޑޭޝަން ސްޓޭޖުން ގްރޭޑު 12 އަށް ކިޔަވައިދޭ ދެ ސުކޫލުގެ މަސައްކަތް ކުރަމުންނެވެ. މީގެ ތެރެއިން ސަލާހުއްދީން ސުކޫލު އަންނަ ޖެނުއަރީ މަހު ހުޅުވޭނެ ކަމަށް އެޑިއުކޭޝަން މިނިސްޓްރީން ބުނެ އެވެ.
