ކަނޑުމަހުގެ މަސްވެރިކަން ރާވައި، ހިންގައި، ބެލެހެއްޓުމާ ގުޅޭގޮތުން އެކުލަވާލައި އަމަލުކުރަން ފެށި އާ ގަވައިދާއެކު، މަސްދޯނިތަކުގެ ލައިސަންސަށް ކުރަމުން އައި ހޭދަ ކުޑަވެއްޖެ އެވެ.
ގަވާއިދުގައި ބުނެފައިވާ ގޮތުން ވިޔަފާރި އުސޫލުން މަސްވެރިކަމާއި ޕްރޮސެސްކުރުމުގައި ހަރަކާތްތެރިވާ ފަރާތްތަކުން ފިޝަރީޒް މިނިސްޓްރީން ދޫކުރާ ސައްހަ ލައިސެންސް އެއް އޮންނަންޖެހޭނެ އެވެ.
އެ ލައިސެންސް ދޫކުރަނީ، މަސްވެރިކަން ކުރާ ބާވަތަށާއި އުޅަނދުގެ ބޮޑު މިނަށް ބަލައިފަ އެވެ. އަދި ކަނޑުމަސް ޕްރޮސެސްކުރާ ފަރާތްތަކުން ލައިސެންސް ނަގަންޖެހެނީ އެތަނަކުން ދުވާލަކު ޕްރޮސެސް ކުރެވޭ މިންވަރެއްގެ މަތީންނެވެ.
މިގޮތުން، މަސްވެރިކަންކުރާ އުޅަނދުތަކުގެ ކުޑަ ބޮޑު މިނަށާއި ބާވަތަށް ބަލައި، އެއް އަހަރާއި ދެ އަހަރުގެ މުއްދަތަށް ލައިސެންސް ދޫކުރާއިރު، 49 ފޫޓަށް ވުރެ ކުދި ދޯނިތަކުން ފީގެ ގޮތުގައި 500ރ. އަދި އެއަށްވުރެ ބޮޑެތި އުޅަނދުތަކުން 1500ރ. އާއި 1،800ރ. ދެމެދުގެ އަދަދެއް ދައްކަންޖެހެ އެވެ.
ފިޝަރީޒް މިނިސްޓްރީން ބުނި ގޮތުގައި މިއީ ކުރިން ދައްކަމުން އައި އަދަދުތަކަށް ވުރެ ކުޑަ އަދަދެކެވެ. މިގޮތުން މީގެ ކުރިން 85 ފޫޓަށް ވުރެ ބޮޑެތި އުޅަނދުތަކުން އަހަރަކު 3600ރ. އަދި އެއަށްވުރެ ކުޑަ އުޅަނދުތަކުން 1800ރ. ނަގާ ކަމަށް ބުނެފައިވެ އެވެ.
އާ ގަވައިދުގައި ވަނީ އުޅަނދުގައި ހިންގާ މަސްވެރިކަމުގެ އެންމެހައި ހަރަކާތްތައް ވާންވާނީ، އެ ލައިސަންސު ގައި ކަނޑައަޅައިފައިވާ ސަރަހައްދުތަކުގައި އެ ލައިސަންސަކުން ހުއްދަ ދީފައިވާ މަސްވެރިކަމެއް ކުރުމަށް ހިންގާ ހަރަކާތްތަކަށް ކަމަށް ޝަރުތުކޮށްފަ އެވެ.
