މާލޭގައި މިނީ ބަހުގެ ހިދުމަތް ފެށުމަށް، ބައެއް މަގުތަކުގައި ޕާކް ކުރުން މަނާކުރަން ނިންމާފައިވާތީ ޕާކް ކުރުމަށް ގެއްލޭ ޖާގައިގެ ބަދަލުގައި އަމީނީ މަގު މާފަންނު ދަނޑުތައް ހުންނަ ސަރަހައްދުގައި ޕާކިން ޒޯނެއް ހަދައިފި އެވެ.
މާލެ ސިޓީގެ މޭޔަރު ޑރ. މުހައްމަދު މުއިއްޒު ކުރެއްވި ޓްވީޓެއްގައި ވިދާޅުވީ އަލަށް އުފެއްދި ޕާކިން ޒޯނަކީ 335 ސައިކަލު ޕާކް ކުރެވޭނެ ޖާގަ ހިމެނޭ ޒޯނެއް ކަމަށެވެ.
"މިއީ މާލޭގައި މާލޭގައި މިނީ ބަހުގެ އޮޕަރޭޝަންތައް ހިންގުމަށް މަގުތަކުން ޖާގަ އުފެއްދުމަށް ކުރެވޭ މަސައްކަތުގެ ތެރެއިން ބައެއް،" މުއިއްޒު ލިޔުއްވާފައިވެ އެވެ.
މިނީ ބަހުގެ ހިދުމަތް ފެށުމަށް އަމީނީ މަގުގެ އިތުރަށް އޯކިޑް މަގާއި ފަރީދީ މަގުގައި ވެސް ޕާކް ކުރުން މަނާ ކުރާނެ އެވެ. މަޖީދީ މަގުގައި މިހާރު ވެސް ވަނީ ޕާކް ނުކުރެވޭ ގޮތަށް ހަދައިފަ އެވެ.
އަމިއްލަ އުޅަނދުފަހަރު ގެންގުޅޭ މީހުން ޕާކްކުރަން ހުންނަ މި ސަރަހައްދުތަކުގެ ބަދަލުގައި ޕާކިން ޒޯންތަކެއް ހެދުމަށް ނިންމާފައިވެ އެވެ.
އެކުވެނި ދަނޑު ހިމެނޭ ސަރަހައްދުން މި ހެދި ޕާކިން ޒޯނުގެ އިތުރަށް ދަރުބާރުގެ އިރަށް އޮތް ހުސް ބިމާއި، މަޖީދީ މަގުގައި ހުރި ސަރުކާރުގެ ހުސް ބިމެއްގެ އިތުރުން ކޮރަލް ބުލެވާޑް ކައިރީ އޮތް ހުސް ބިމުގައި ވެސް ޕާކިން ޒޯނެއް ހަދާނެ އެވެ.
މިނީ ބަހުގެ ހިދުމަތް އަންނަ ހޯމަ ދުވަހު ފަށާނެ އެވެ. އަދި ފުރަތަމަ ދެ ހަފުތާ އެއްވެސް އަގެއް ނުދީ ދަތުރު ކުރެވޭނެ އެވެ. އެ ފަހުން ކޮންމެ ދަތުރަކަށް ކަނޑައަޅާފައިވާ އަގަކީ ހަތް ރުފިޔާ އެވެ.
ނަމަވެސް ސްކޫލްތަކުގެ ދަރިވަރުންނާއި، 65 އަހަރުން މަތީގެ މީހުންނާއި، ތިން އަހަރުން ދަށުގެ ކުދިން އަދި ހާއްސަ އެހީއަށް ބޭނުންވާ މީހުންނަށް މުޅިން ހިލޭ ދަތުރު ކުރެވޭނެ އެވެ.
މާލޭގައި މިނީ ބަހުގެ ހިދުމަތް ފެށުމަށް 18 ބަހެއް އެމްޓީސީސީން ގެނެސްފައިވާއިރު، ހޯމަ ދުވަހުން ފެށިގެން ބަސް ދަތުރުތައް އޮންނާނީ ފަތިހު 5:45 އިން ފެށިގެން ރޭގަނޑު 12:15 އާ ހަމައަށެވެ.
