މިމަހުގެ 3-11 އަށް ސިންގަޕޫރުގައި އޮންނަ އޭޝިއަން ނެޓްބޯޅަ ޗެމްޕިއަންޝިޕުގައި ވާދަކުރުމަށް ރާއްޖޭގެ ގައުމީ ނެޓްބޯޅަ ޓީމް ސިންގަޕޫރަށް ފުރައިފި އެވެ.
އޭޝިއާގެ މެންބަރު ގައުމުތަކުން ވާދަކުރާ އޭޝިއަން ނެޓްބޯޅަ ޗެމްޕިއަންޝިޕުގައި މިފަހަރު ވާދަކުރަނީ 11 ގައުމަކުންނެވެ. އެއީ ރާއްޖެ، އިންޑިއާ، ސްރީ ލަންކާ، ފިލިޕީންސް، މެލޭޝީއާ، ސިންގަޕޫރު، ހޮންކޮން، ތައިލެންޑް، ޖަޕާން، ބުރުނާއީ އަދި ޗައިނީސް ތައިޕޭ އެވެ. މި 11 ޓީމް ހަތަރު ގްރޫޕަކަށް ބަހާލާފައިވާއިރު ރާއްޖެ ލައްވާލީ ގްރޫޕް ބީގަ އެވެ. މި ގްރޫޕުގައި ހިމެނެނީ ރާއްޖޭގެ އިތުރުން މުބާރާތް ބާއްވާ ގައުމު ސިންގަޕޫރާއި ޖަޕާން އެވެ.
މުބާރާތުގައި ވާދަކުރާ ގައުމީ ޓީމްގެ އަމާޒަކީ ގަދަ 8 ޓީމްގެ ތެރޭގައި ހިމެނި އޭޝިއަން އިންޑޯ ޗެމްޕިއަންޝިޕުން ޖާގަ ހޯދުމެވެ. ގައުމީ ޓީމް އޭޝިއަން ޗެމްޕިއަންޝިޕަށް ތައްޔާރުވުމުގެ ގޮތުން ތަމްރީންތައް ފެށީ މިދިޔަ އަހަރުގެ ފަހުކޮޅުގަ އެވެ. މިއަހަރުގެ ފެބްރުއަރީ މަހުން ފެށިގެން ގައުމީ ޓީމުން އަންނަނީ ގަވާއިދުން ޕްރެކްޓިސް ކުރަމުންނެވެ.
މުބާރާތުގައި ވާދަކުރާ ގައުމީ ޓީމްގެ ކެޕްޓަނަކީ އީމާ އަބްދުއްސައްތާރު އެވެ. ވައިސް ކެޕްޓަނަކަށް ހަމަޖައްސާފައިވަނީ ހަމްނާ އަބްދުއްރަހުމާން (ހަންނަ) އެވެ. އީމާ އާއި ހަންނަގެ އިތުރުން ދެން ޓީމްގައި ހިމެނެނީ މަރިޔަމް ރަނާ، މަރިޔަމް ޝިނާއަތު، ވިސާހު މުހައްމަދު، ފާތިމަތު ނައުފާ، އައިޝަތު ސަލީމާ، އާމިނަތު ފިރުޝާ، އައިޝަތު ސަނާ އިބްރާހިމް، ޖުނައިނާ އަހުމަދު އިޝްހާގު، މަލަކް އިސްމާއިލް މުހައްމަދު އަދި އާމިނަތު އައިނީ އެވެ.
ޓީމްގެ ކޯޗަކީ މިއަހަރުގެ ކުރީކޮޅު އޮތް "މޯލްޑިވްސް ސްޕޯޓްސް އެވޯޑްސް 2022"ގެ މިދިޔަ ތިން އަހަރުގެ އަންހެން އެންމެ މޮޅު ކޯޗުގެ މަގާމް ހޯދި ނީޝާ ހަލީމް އެވެ.
މިފަހަރުގެ ގައުމީ ޓީމްގައި މުޅިން އަލަށް ބައިނަލްއަގްވާމީ މުބާރާތުގައި ވާދަކުރާ ގިނަ ކުޅުންތެރިން ހިމެނެ އެވެ. އޭގެ ތެރޭގައި 19 އަހަރުން ދަށުގެ 4 ކުޅުންތެރިން ހިމެނެ އެވެ.
މުބާރާތުގެ ފުރަތަަމަ ބުރުގައި ރާއްޖެ ދެ މެޗެއް ކުޅޭނެ އެވެ. އޭގެ ފަހުން ޓީމްތައް އެތުރޭ ގޮތަށް ބަލައި ދެވަނަ ބުރަށް ޓީމްތައް ބަހާލެވޭނެ އެވެ. ދެވަނަ ބުރުގައިވެސް ކޮންމެ ޓީމެއް ތިން މެޗު ކުޅޭނެ އެވެ. އަދި އޭގެ ފަހުން މުބާރާތުގެ ވަނަތައް ހިވުމަށް ކުޅޭ ސެމީ ފައިނަލު މެޗުތަކާއި ޕްލޭ އޮފް މެޗުތައް ކުރިއަށްދާނެ އެވެ. ހުރިހާ ވަނަތަކެއް ހޮވާ މެޗުތަކާއި މުބާރާތުގެ އިނާމް ދިނުމުގެ ރަސްމިއްޔާތު އޮންނާނީ ސެޕްޓެމްބަރު 11ގަ އެވެ.
އޭޝިއަން ނެޓްބޯޅަ ޗެމްޕިއަންޝިޕް އެންމެ ފުރަތަމަ ބާއްވާފައިވަނީ 1985 ވަނަ އަހަރުގަ އެވެ. ކުރިން ކޮންމެ ހަތަރު އަހަރުން އެއް ފަހަރު ބާއްވަމުން އައި މުބާރާތް ކޮންމެ ދެ އަހަރަކުން އެއް އަހަރު ބާއްވަން ނިންމީ 2012 ގަ އެވެ. އޭގެ ފަހުން 2020 ވަނަ އަހަރު ބާއްވަން އޮތް މުބާރާތް ކޮވިޑާއި ގުޅިގެންވަނީ ކެންސަލްކޮށްފަ އެވެ. މި އަހަރު މުބާރާތް މި އޮންނަނީ ހަތަރު އަހަރަށް ފަހުގަ އެވެ. މުބާރާތުގެ އެންމެ ކާމިޔާބު ޓީމަކީ ފަސް ފަހަރު ތަށި ހޯދާފައިވާ ސްރީ ލަންކާ އެވެ.
